Fainali za Kiduku

Fainali ya mashindano ya kucheza mtindo wa taarabu unaoitwa KIDUKU (Pichani) ambao vijana wa kiume huvaa nguo za kike na kukata mauno kama wanawake ilifanyika Mei 2 huku shutuma kali zikiwaendea waandaaji wa mashindano hayo kuwa wana malengo ya kuwaharibu watoto wa kiume. Mtindo wa KIDUKU uliobuniwa na mtangazaji mahiri aliyekuwa akitangaza
katika kituo cha televisheni ya Afrika Mashariki EATV, Maimartha wa Jesse umekuwa gumzo katika jiji la Dar es Salaam, kutokana na jinsi mchezo huo ulivyo wahusisha vijana wenye umri chini ya miaka 18.

Wengi wa vijana huwa ni watoto wa shule za msingi na sekondari wengine wakitokea tu mitaani kushindana kucheza mchezo wa Kiduku.

Hivi karibuni Maimartha aliandaa shindano la kumtafuta bingwa wa kiduku mwaka 2010 ambalo limewashirikisha vijana toka maeneo mbalimbali ya jiji la Dar es Salaam.

Miongoni mwa vikundi vinavyoshiriki ni Vidoleki, Mazombi, Wanaume fasti, Wakali wa kitengo, Wakupoteza, Stavanga na Mazombi.

Katika shindano hilo mshindi wa kwanza alitarajiwa kupata zawadi ya dola 250, mshindi wa pili atapata music system na watatu wangeambulia feni. Fainali ya mashindano hayo ilifanyika Mei 2 mwaka huu katika ukumbi wa Travertine uliopo magomeni.

Kwa upande mwingine wapenzi wa muziki wa taarab wamekuwa na maoni tofauti kutokana na vijana hao kucheza huku wakiwa wamevalia nguo za akina dada jambo ambalo wengi wanalihisi kuwa linaweza likawa ni njia mojawapo ya kuwapotosha vijana hao kwa kujiingiza katika njia ya uasherati ikiwa ni pamoja na kuwa mashoga.