Rais wa Jamhuri ya Muungano wa Tanzania, Mhe. Dkt. Samia Suluhu Hassan akiwa kwenye Maadhimisho ya miaka 30 ya kuanzishwa kwa Mamlaka ya Mapato Tanzania (TRA) katika ukumbi wa Mlimani City Jijini Dar es Salaam.
Rais wa Jamhuri ya Muungano wa Tanzania, Mhe. Dkt. Samia Suluhu Hassan, leo Julai 1, 2026, ameongoza Maadhimisho ya Miaka 30 ya kuanzishwa kwa Mamlaka ya Mapato Tanzania (TRA) yaliyofanyika katika Ukumbi wa Mlimani City, jijini Dar es Salaam.
Mara baada ya kuwasili katika ukumbi huo, Rais Samia alitembelea maonesho maalumu yaliyoandaliwa na TRA na kupata maelezo kuhusu historia ya mamlaka hiyo, mafanikio yaliyopatikana katika kipindi cha miaka 30 pamoja na mchango wake katika kuongeza mapato ya Serikali na kuchochea maendeleo ya kiuchumi nchini.
Maadhimisho hayo yamewakutanisha viongozi wa Serikali, taasisi za umma na binafsi, wadau wa kodi pamoja na washirika wa maendeleo kwa lengo la kuadhimisha mafanikio ya TRA tangu kuanzishwa kwake na kujadili mikakati ya kuendelea kuimarisha ukusanyaji wa mapato kwa maendeleo endelevu ya Taifa.
Kwa kipindi cha miaka 30, TRA imeendelea kuwa mhimili muhimu katika ukusanyaji wa mapato ya ndani, hatua iliyowezesha Serikali kugharamia utekelezaji wa miradi mikubwa ya maendeleo katika sekta mbalimbali zikiwemo elimu, afya, miundombinu, maji na huduma nyingine za kijamii.
Maadhimisho hayo pia yametoa fursa ya kutafakari mafanikio yaliyofikiwa, changamoto zilizopo na kuweka mikakati ya kuifanya TRA iendelee kuwa taasisi imara, bunifu na inayotoa huduma bora kwa walipakodi, sambamba na kuimarisha uchumi wa Taifa.
