MAKAMU WA RAIS DKT. MPANGO AIPONGEZA TANAPA KWA KULINDA MALIASILI NA KUITANGAZA TANZANIA KIMATAIFA

 

Makamu wa Rais wa Jamhuri ya Muungano wa Tanzania, Mheshimiwa Dkt. Philip Mpango, ameipongeza kwa dhati Shirika la Hifadhi za Taifa Tanzania (TANAPA) kwa juhudi kubwa na za mfano katika kulinda rasilimali za taifa na kuendeleza utalii wa ndani na wa kimataifa.

Dkt. Mpango ametoa pongezi hizo leo, Julai 15, 2025, jijini Arusha, alipotembelea banda la TANAPA katika Mkutano wa Pili wa Baraza la Vyombo vya Habari Afrika, unaoendelea katika Ukumbi wa Mikutano wa Kimataifa wa AICC.

Katika hotuba yake, Makamu wa Rais amesifu TANAPA kwa namna ambavyo imeendelea kuenzi urithi wa Taifa, kulinda mazingira na kuchangia kwa kiasi kikubwa ukuaji wa uchumi kupitia sekta ya utalii.

“TANAPA mnafanya kazi kubwa. Mmeendelea kulinda na kutangaza vivutio vyetu vya kipekee—kuanzia mbuga zetu maarufu hadi uoto wa asili—na mnaendelea kuiweka Tanzania kwenye ramani ya dunia kwa heshima kubwa,” alisema Dkt. Mpango.

Aidha, Dkt. Mpango amepongeza ushindi wa TANAPA wa tuzo saba za kimataifa za utalii zilizotolewa na World Travel Awards, akisema ushindi huo ni uthibitisho wa kujitoa kwa watumishi wa TANAPA, pamoja na uongozi thabiti wa shirika hilo tangu kuanzishwa kwake mwaka 1959 chini ya muasisi wa Taifa, Hayati Mwalimu Julius Kambarage Nyerere.

“Tuzo hizi ni zaidi ya heshima—ni alama ya ubora, uadilifu, na uaminifu mkubwa ambao TANAPA imejijengea ndani na nje ya nchi,” aliongeza.

Mkutano huo wa Baraza la Vyombo vya Habari Afrika unawakutanisha wadau mbalimbali kutoka mataifa tofauti, ukiwa na lengo la kuimarisha uhuru wa vyombo vya habari na mchango wake katika maendeleo ya Afrika.