Waziri Mkuu Kassim Majaliwa Aungana na Watanzania Kusafiri kwa Treni ya Umeme ya Kiwango cha Kimataifa (SGR)

 

Waziri Mkuu wa Jamhuri ya Muungano wa Tanzania, Mheshimiwa Kassim Majaliwa Majaliwa (Mb), ameandika historia mpya mnamo Agosti 18, 2025, baada ya kusafiri kwa mara ya kwanza kwa Treni ya Umeme ya Kiwango cha Kimataifa (Standard Gauge Railway – SGR) kutoka Dodoma kuelekea Dar es Salaam. 

Safari hiyo imeonesha kwa vitendo hatua kubwa iliyopigwa na Serikali ya Awamu ya Sita chini ya Uongozi wa Mheshimiwa Rais Dkt. Samia Suluhu Hassan katika kutekeleza miradi mikubwa ya kimkakati.

Safari ya Mheshimiwa Waziri Mkuu si tu ilikuwa ni sehemu ya usafiri wa kawaida, bali pia ni alama ya matumaini makubwa kwa Watanzania kuhusu mustakabali wa sekta ya usafiri na usafirishaji nchini. Mradi wa SGR unatajwa kuwa miongoni mwa miradi ya kimkakati itakayobadili kabisa mfumo wa usafirishaji nchini, kwa kurahisisha safari, kupunguza gharama za usafirishaji, kuongeza ufanisi wa biashara na kuvutia wawekezaji wa ndani na nje ya nchi.

Kupitia usafiri huo wa majaribio, Watanzania wameshuhudia dhamira ya Serikali ya kuimarisha miundombinu ya usafirishaji kwa kutumia teknolojia za kisasa, zenye usalama na uharaka, ikiwa ni mwendelezo wa jitihada za kuijenga Tanzania ya viwanda na uchumi shindani. 

Waziri Mkuu Majaliwa alibainisha kuwa, treni ya SGR ni chachu ya mabadiliko katika maisha ya wananchi kwani itawawezesha kufanya safari zao kwa haraka na kwa uhakika huku ikihifadhi muda na kuongeza tija katika shughuli za kiuchumi.

Kwa mara nyingine, tukio hili limeweka historia mpya katika safari ya maendeleo ya Taifa letu, likithibitisha kwa vitendo kuwa ndoto ya Watanzania kuona treni za kisasa zikifanya safari kwa urahisi na haraka, sasa inakaribia kuwa uhalisia.