Rais wa Jamhuri ya Muungano wa Tanzania, Mhe. Dkt. Samia Suluhu Hassan, ameendeleza dhamira ya Serikali ya kusukuma mbele ajenda ya nishati safi na lishe bora kwa vitendo, baada ya kushiriki kikamilifu katika shughuli za Mama na Baba Lishe zilizofanyika katika Kituo cha Mikutano cha Kimataifa cha Julius Nyerere (JNICC), jijini Dar es Salaam, tarehe 21 Aprili, 2026.
Mara baada ya kuwasili katika ukumbi huo, Rais Samia alipata fursa ya kukagua mabanda ya maonesho ya mapishi yaliyoandaliwa na Mama na Baba Lishe kutoka maeneo mbalimbali ya nchi. Katika ziara hiyo, alijionea ubunifu wa wahudumu hao katika kuandaa vyakula salama na vyenye kuzingatia viwango vya lishe, huku akisisitiza umuhimu wa kuboresha ubora wa huduma za chakula kama sehemu ya kulinda afya za Watanzania.
Akizungumza na washiriki wa maonesho hayo, Rais Samia alibainisha kuwa sekta ya Mama na Baba Lishe ina mchango mkubwa katika ajira na uchumi wa watu wa kipato cha chini, hivyo inahitaji kuendelezwa kwa kuzingatia usalama wa chakula, usafi na matumizi ya teknolojia rafiki kwa mazingira.
Katika hatua nyingine yenye uzito wa kipekee, Rais Samia aligawa mitungi ya gesi kwa Mama na Baba Lishe ikiwa ni sehemu ya juhudi za Serikali kuhamasisha matumizi ya nishati safi ya kupikia. Hatua hiyo inalenga kupunguza utegemezi wa nishati chafu kama kuni na mkaa, ambayo imekuwa na athari hasi kwa afya na mazingira.
Ugawaji huo wa mitungi ya gesi umechukuliwa kama chachu ya mabadiliko kwa wahudumu hao, wengi wao wakiwa wanawake, kwa kuwa utawawezesha kupunguza gharama za uendeshaji, kuongeza ufanisi wa kazi, na kulinda afya zao dhidi ya madhara ya moshi.
Tukio hilo limeonesha kwa vitendo mwelekeo wa Serikali katika kuunganisha ajenda ya lishe bora, afya ya jamii na matumizi ya nishati safi, huku likitoa ujumbe mpana wa kuwahamasisha Watanzania kubadili mtindo wa maisha kwa manufaa ya kizazi cha sasa na kijacho.
No comments:
Post a Comment