RAIS SAMIA AWEKA AFRIKA KATIKA RAMANI MPYA YA UWEKEZAJI WA KIMATAIFA KUPITIA GAIS DUBAI

Rais wa Jamhuri ya Muungano wa Tanzania, Dkt. Samia Suluhu Hassan, ameshiriki uzinduzi wa Global Africa Investment Summit (GAIS) jijini Dubai.

Tukio lililoashiria mwanzo wa sura mpya ya Afrika katika kuvutia mitaji ya kimataifa kupitia uwekezaji uliopangiliwa, wenye uthabiti wa kifedha na matokeo ya muda mrefu.

Akihutubia viongozi wa kisiasa, wawekezaji na wadau wa kimataifa jana usiku, Rais alisisitiza kuwa katika mazingira ya sasa ya uchumi wa dunia, wawekezaji hawatafuti fursa pekee, bali uaminifu—uthabiti wa sera, taasisi imara na serikali zinazotekeleza ahadi zake kwa vitendo. 

Alieleza kuwa Tanzania imejikita katika kujenga misingi imara ya uwekezaji kupitia mageuzi ya sera na uwekezaji mkubwa katika nishati, reli ya kisasa, bandari na miundombinu ya uchukuzi, sambamba na uanzishwaji wa Maeneo Maalum ya Uwekezaji na Dirisha Moja la Uwekezaji, ili kurahisisha na kuharakisha huduma kwa wawekezaji.

Ushiriki wa Tanzania katika GAIS unaakisi dhamira ya nchi ya kuingia kwenye ushirikiano wa kimkakati unaopangiliwa vizuri, unaozingatia vipaumbele vya maendeleo ya taifa na matarajio ya wawekezaji wa kimataifa, kwa lengo la kujenga uchumi shindani na jumuishi.

GAIS inalenga kuoanisha uongozi wa kisiasa, rasilimali za kitaifa na mitaji ya kimataifa, na kuifanya Afrika—na hususan Tanzania—kuwa kitovu cha uwekezaji unaozalisha matokeo halisi, fursa za ajira na maendeleo endelevu kwa kizazi cha sasa na kijacho.

#GAIS2026 #EconomicDiplomacy #TanzaniaNaUwekezaji #RaisSamia #GlobalAfricaInvestmentSummit #KaziNaUtuTunasongaMbele