Rais wa Jamhuri ya Muungano wa Tanzania, Mheshimiwa Dkt. Samia Suluhu Hassan, ameungana na Rais wa Benki ya Maendeleo ya Afrika (AfDB), Mheshimiwa Dkt. Akinwumi Adesina, katika ziara ya kukagua maendeleo ya ujenzi wa barabara ya mzunguko wa nje ya Jiji la Dodoma (Dodoma Outer Ring Road) yenye urefu wa kilomita 112.3, leo tarehe 14 Juni 2025 katika eneo la Mtumba, jijini Dodoma.
Ziara hiyo imebeba uzito wa kipekee, ikionesha mshikamano wa kidiplomasia, maono ya pamoja ya maendeleo, pamoja na dhamira ya dhati ya Serikali ya Awamu ya Sita kuhakikisha kuwa miradi mikubwa ya kimkakati inatekelezwa kwa viwango vya kimataifa na kwa faida ya wananchi wote.
Katika tukio hilo, viongozi hao wawili walipata fursa ya kuzungumza na wananchi zaidi ya 10,000 waliokusanyika kwa shauku na furaha kushuhudia maendeleo hayo. Umati huo mkubwa wa wakazi wa Dodoma na maeneo ya jirani ulijitokeza kwa wingi kutoa heshima na kuonesha mshikamano wao na juhudi za Serikali.
Katika hotuba yake kwa wananchi, Mheshimiwa Rais Samia aliwahakikishia kuwa Serikali itaendelea kutekeleza miradi ya maendeleo kwa kasi na weledi, huku akisisitiza kuwa maendeleo haya ni ya wote, na kila Mtanzania anapaswa kuyahisi kwa vitendo. Alieleza kuwa barabara hiyo ya mzunguko inalenga kufungua fursa zaidi za biashara, usafirishaji, na kuboresha maisha ya watu kwa ujumla.
Mheshimiwa Dkt. Adesina, kwa upande wake, alitoa salamu za pongezi kwa wananchi wa Tanzania na kuonesha kufurahishwa na namna nchi inavyojipanga kubadilika kupitia uwekezaji wa kimkakati. Alisisitiza kuwa Benki ya Maendeleo ya Afrika itaendelea kuunga mkono juhudi za maendeleo ya Tanzania kwa kuhakikisha rasilimali na utaalamu vinapatikana kwa wakati.
Aidha, viongozi hao walitembelea sehemu mbalimbali za mradi na kujionea maendeleo ya kazi zinazotekelezwa na wakandarasi kwa usimamizi wa TANROADS. Mradi huu ni sehemu ya Mpango wa Tatu wa Maendeleo wa Taifa wa Miaka Mitano (FYDP III), unaolenga kuimarisha miundombinu ya kiuchumi na kijamii nchini.
Tukio hilo limeonesha dhahiri kuwa Tanzania ipo kwenye mwelekeo sahihi wa maendeleo, ikiongozwa na Serikali inayoweka maslahi ya wananchi mbele na yenye mshikamano na washirika wa maendeleo kwa ajili ya kuijenga Tanzania mpya, imara na yenye ushindani wa kikanda na kimataifa.
No comments:
Post a Comment