RAIS SAMIA AZINDUA MPANGO WA MIAKA MITANO WA CHANJO NA UTAMBUZI WA MIFUGO NCHINI – ATOA WITO KWA WAFUGAJI KUCHANGAMKIA FURSA

Rais wa Jamhuri ya Muungano wa Tanzania, Mhe. Dkt. Samia Suluhu Hassan akipokea Tuzo ya heshima na shukrani kutoka kwa Mwenyekiti wa wafugaji Ndugu Mrida Mshote mara baada ya kuzindua Mpango wa Miaka Mitano wa Chanjo na Utambuzi wa Mifugo katika viwanja vya Nanenane Bariadi Mkoani Simiyu tarehe 16 Juni, 2025.

Rais wa Jamhuri ya Muungano wa Tanzania, Mhe. Dkt. Samia Suluhu akihutubia viongozi mbalimbali, wafugaji pamoja na wananchi waliohudhuria uzinduzi wa Kampeni ya Kitaifa ya Chanjo na Utambuzi wa Mifugo katika viwanja vya Nanenane Bariadi Mkoani Simiyu tarehe 16 Juni, 2025.

Shamrashamra za uzinduzi wa Kampeni ya Kitaifa ya Chanjo na Utambuzi wa Mifugo katika viwanja vya Nanenane Bariadi Mkoani Simiyu tarehe 16 Juni, 2025.

Bariadi, Simiyu – Tarehe 16 Juni, 2025.

Rais wa Jamhuri ya Muungano wa Tanzania, Mheshimiwa Dkt. Samia Suluhu Hassan, ameongoza uzinduzi rasmi wa Mpango wa Kitaifa wa Chanjo na Utambuzi wa Mifugo kwa kipindi cha miaka mitano (2024/2025–2028/2029) katika viwanja vya Nanenane, Bariadi mkoani Simiyu. Mpango huo unalenga kuongeza tija kwenye sekta ya mifugo, kuboresha afya ya mifugo, na kuwezesha utambuzi rasmi wa mifugo kote nchini.

Katika hotuba yake mbele ya viongozi wa serikali, wadau wa mifugo, na maelfu ya wananchi waliohudhuria hafla hiyo, Rais Samia alisisitiza umuhimu wa kutumia sayansi na teknolojia katika usimamizi wa mifugo. Alibainisha kuwa mpango huo utahakikisha mifugo yote inapatiwa chanjo dhidi ya magonjwa hatari, sambamba na utambuzi wa kimfumo ili kurahisisha ufuatiliaji, biashara na huduma za bima ya mifugo.

“Wafugaji wanapaswa kuelewa kuwa afya ya mifugo ni msingi wa mafanikio ya uchumi wao. Kupitia mpango huu, tunawawekea mazingira rafiki ya kisasa ya ufugaji kwa kutumia teknolojia na takwimu,” alieleza Rais Samia.

Katika kilele cha tukio hilo, Rais Samia alipokea Tuzo ya Heshima na Shukrani kutoka kwa Mwenyekiti wa Wafugaji, Ndugu Mrida Mshote, ikiwa ni ishara ya kutambua mchango wake mkubwa katika kuboresha maisha ya wafugaji nchini. Tuzo hiyo ni sehemu ya pongezi kutoka kwa jamii ya wafugaji waliothamini jitihada za serikali kuwekeza katika afya na utambuzi wa mifugo yao.

Mpango huu wa miaka mitano unajumuisha:

• Chanjo dhidi ya magonjwa sugu kama Kimeta, Homa ya Mapafu ya Ng’ombe (CBPP), na Ndigana.

• Utambuzi kwa teknolojia ya hereni za kielektroniki kwa kila mnyama.

• Uanzishaji wa kanzidata ya kitaifa ya mifugo, itakayowezesha uratibu wa huduma za mifugo kwa ufanisi.

• Elimu kwa wafugaji juu ya mifumo bora ya ufugaji wa kisasa.

Katika shamrashamra zilizopamba tukio hilo, vikundi vya ngoma, maonyesho ya mifugo bora, na huduma za mifugo bure zilikuwepo, huku wafugaji wakionesha shukrani kwa serikali kwa kuwa karibu nao na kusikiliza maoni yao.

Mpango huu unaendana na dhamira ya serikali ya awamu ya sita chini ya uongozi wa Rais Samia Suluhu Hassan ya kuinua sekta ya mifugo kuwa miongoni mwa vyanzo vikuu vya pato la taifa, ajira na usalama wa chakula.

Wizara ya Mifugo na Uvuvi imetakiwa kuhakikisha utekelezaji wa mpango huu unafanyika kwa ufanisi, kwa kushirikiana na sekta binafsi, mamlaka za serikali za mitaa, taasisi za utafiti, na wafugaji wenyewe.