RAIS SAMIA AZINDUA KIWANDA CHA KUCHAKATA PAMBA MEATU, SIMIYU – AJENGA MATUMAINI KWA WAKULIMA

 

MEATU, SIMIYU – Juni 17, 2025:
Rais wa Jamhuri ya Muungano wa Tanzania, Mheshimiwa Dkt. Samia Suluhu Hassan, ameweka historia nyingine ya maendeleo kwa kuzindua rasmi Kiwanda cha kuchakata pamba cha Biosustain Tanzania Limited kilichopo wilayani Meatu, mkoani Simiyu.

Uzinduzi huo ni sehemu ya mwendelezo wa ziara yake ya kikazi mkoani humo, ambapo Rais Samia ameendelea kushuhudia mafanikio ya mikakati ya Serikali ya Awamu ya Sita ya kuinua viwanda, kuongeza thamani ya mazao ya wakulima, na kuongeza ajira kwa Watanzania.

Akizungumza mara baada ya kuzindua kiwanda hicho, Rais Samia alisema kuwa uwekezaji huo mkubwa katika sekta ya kilimo na viwanda ni ishara ya Tanzania mpya inayojielekeza kwenye uchumi wa viwanda unaotegemea malighafi za ndani.

"Leo tumefungua ukurasa mpya kwa wakulima wa pamba hapa Meatu na mikoa mingine ya Kanda ya Ziwa. Badala ya kuuza pamba ghafi kwa bei ya chini, sasa tunachakata hapa hapa nyumbani – tukizalisha ajira, kipato na kuongeza thamani ya mazao yetu," alisema Rais Samia kwa msisitizo.

KIWANDA CHA KISASA – FURSA KWA WENGI

Kiwanda cha Biosustain Tanzania Limited kinatajwa kuwa miongoni mwa viwanda vya kisasa kabisa vya kuchakata pamba nchini, chenye uwezo wa kuchakata maelfu ya tani za pamba kwa mwaka. Kiwanda hiki kimeajiri mamia ya watu kutoka maeneo ya jirani na kinatarajiwa kusaidia pia wakulima kwa kuwa na soko la uhakika.

Rais Samia alisisitiza kuwa Serikali itaendelea kuvutia wawekezaji wa ndani na nje ili kuharakisha mabadiliko ya kiuchumi kupitia viwanda, huku akiwataka wakulima kuendelea kulima kwa tija na kuzingatia ubora wa mazao yao ili waweze kunufaika zaidi.

WANANCHI WAMPOKEA KWA FURAHA

Uzinduzi wa kiwanda hicho uliambatana na shangwe kutoka kwa wananchi wa Meatu na maeneo jirani, waliomiminika kushuhudia tukio hilo la kihistoria. Wakizungumza kwa nyakati tofauti, wananchi hao walimpongeza Rais Samia kwa hatua hiyo, wakisema sasa maisha yao yanakwenda kubadilika kwa kasi kutokana na fursa mpya zinazojitokeza.

Rais Samia ameendelea kutumia ziara yake mkoani Simiyu kukagua na kuzindua miradi mbalimbali ya maendeleo, sambamba na kukutana na wananchi na kuwasikiliza changamoto zao moja kwa moja – ikiwa ni utekelezaji wa dhamira yake ya kujenga Tanzania yenye maendeleo jumuishi na ya watu wote.