RAIS DKT. SAMIA SULUHU HASSAN AJUMUIKA NA VIONGOZI WA DINI, WAZEE WA MKOA WA ARUSHA NA MAKUNDI MBALIMBALI KWENYE FUTARI ILIYOANDALIWA NA YEYE MWENYEWE

Arusha, 08 Machi 2025 – Rais wa Jamhuri ya Muungano wa Tanzania, Mhe. Dkt. Samia Suluhu Hassan, amejumuika na viongozi wa dini, wazee wa Mkoa wa Arusha, pamoja na makundi mbalimbali ya wananchi katika futari aliyowaandalia kwenye viwanja vya Ikulu Ndogo ya Arusha.

Hafla hiyo ya futari imehudhuriwa na viongozi wa madhehebu yote ya dini, wawakilishi wa serikali, wazee wa mkoa, wafanyabiashara, vijana, pamoja na wananchi kutoka makundi tofauti ya kijamii. Tukio hilo limeonesha mshikamano, umoja na kudumisha maadili ya mshikamano wa kitaifa, huku likiwa sehemu ya juhudi za Rais kuendelea kujenga uhusiano mzuri kati ya serikali na wananchi wa kada mbalimbali.

Katika hotuba yake kwa wageni waalikwa, Mhe. Rais Dkt. Samia amepongeza mchango wa viongozi wa dini katika kudumisha amani, mshikamano na maendeleo ya jamii. Ameeleza kuwa viongozi wa dini wana nafasi muhimu katika kulea jamii na kuhimiza maadili mema, hivyo serikali itaendelea kushirikiana nao ili kuhakikisha maendeleo na ustawi wa taifa yanaendelea kuimarika.

“Mwezi Mtukufu wa Ramadhani ni kipindi cha kutafakari, kushiriki na kusaidiana kama jamii moja. Leo tumejumuika hapa siyo tu kwa ajili ya kufuturu, bali kuonesha mshikamano wetu kama Watanzania. Naomba tuendelee kushikamana na kusaidiana ili kuendelea kujenga taifa letu kwa pamoja,” alisema Rais Dkt. Samia.

Kwa upande wao, viongozi wa dini walimshukuru Rais kwa mwaliko huo na kusisitiza kuwa mshikamano wa kitaifa ni jambo la msingi katika kulinda na kuendeleza amani na maendeleo. Walisema kuwa ni jambo la kipekee kwa kiongozi wa nchi kuonesha upendo na mshikamano kwa vitendo kwa kuwashirikisha wananchi katika hafla kama hizi.

Aidha, wazee wa Mkoa wa Arusha walieleza furaha yao kwa kupata fursa ya kushiriki futari hiyo na kumsifu Rais kwa juhudi zake za kuwaleta Watanzania pamoja, pamoja na kuendelea kusikiliza changamoto za wananchi na kuzitatua kwa vitendo.

Hafla hiyo imehitimishwa kwa dua maalum ya kuwaombea viongozi wa nchi, amani ya taifa, na mafanikio ya Watanzania wote. Tukio hili limeendelea kudhihirisha dhamira ya Mhe. Rais Dkt. Samia Suluhu Hassan katika kujenga umoja wa kitaifa na kushirikiana na makundi yote ya jamii kwa maendeleo ya nchi.

Mwisho.