MAKAMU WA RAIS AAGIZA TAKUKURU, POLISI KUCHUNGUZA BILIONI 4.22 ZA MRADI WA LINDI

▪️ Ahoji malipo ya mabilioni wakati ujenzi umefikia asilimia 24 pekee

▪️ Akataa maelezo ya barua 16 alizoandikiwa mkandarasi bila hatua madhubuti

▪️ Ataka taarifa ya uchunguzi ili aiwasilishe kwa Rais Samia

Makamu wa Rais wa Jamhuri ya Muungano wa Tanzania, Mhe. Deogratius Ndejembi, ameagiza Taasisi ya Kuzuia na Kupambana na Rushwa (TAKUKURU) na Jeshi la Polisi kuchunguza matumizi ya shilingi bilioni 4.22 zilizolipwa kwa mkandarasi anayetekeleza mradi wa kuboresha miundombinu ya Manispaa ya Lindi, baada ya kubainika kuwa ujenzi umefikia asilimia 24 pekee licha ya asilimia 80 ya muda wa mkataba kuwa umetumika.

Makamu wa Rais ametoa agizo hilo leo, wakati wa ziara yake mkoani Lindi, baada ya kupokea taarifa ya maendeleo ya mradi huo wenye thamani ya shilingi bilioni 19.06.

Amesema hali hiyo inahitaji uchunguzi wa kina ili kubaini fedha zilizolipwa zimetumikaje, kwa nini ujenzi unasuasua na iwapo taratibu za malipo zilifuatwa ipasavyo.

Aidha, ameagiza taarifa ya uchunguzi huo iwasilishwe kwake moja kwa moja ili aweze kuiwasilisha kwa Rais wa Jamhuri ya Muungano wa Tanzania, Mhe. Dkt. Samia Suluhu Hassan.

BARUA 16 BILA MATOKEO

Katika hatua nyingine, Makamu wa Rais ameonesha kutoridhishwa na maelezo ya viongozi wa Halmashauri kwamba walimwandikia mkandarasi barua 16 kumtaka kuongeza kasi ya ujenzi.

Amehoji umuhimu wa kuendelea kuandika barua wakati mradi unasuasua na fedha nyingi za umma tayari zimelipwa.

Pia amehoji sababu za mkandarasi kuendelea kupokea malipo mengine wakati Halmashauri ilikuwa imebaini kuwa hakuwa na nidhamu katika matumizi ya fedha za malipo ya awali.

Amesisitiza kuwa kinachohitajika ni hatua madhubuti za kuhakikisha fedha za umma zinalindwa na miradi inakamilika kwa wakati ili wananchi wapate huduma zilizokusudiwa.

BILIONI 4.22 ZILILIPWAJE?

Kwa mujibu wa taarifa iliyowasilishwa wakati wa ukaguzi, mradi huo unatekelezwa na kampuni ya Hamerkop International Limited JV KIKIM Contractor's Limited.

Hadi sasa, mkandarasi amelipwa jumla ya shilingi bilioni 4.22, ambapo shilingi bilioni 2.86 zilikuwa malipo ya awali na shilingi bilioni 1.36 zililipwa kupitia hati ya pili ya malipo.

Hata hivyo, maendeleo ya ujenzi yamefikia asilimia 24 tu, wakati kwa mujibu wa mpango wa utekelezaji, kazi zilipaswa kuwa zimefikia asilimia 80.

Hii ina maana kwamba mradi uko nyuma ya ratiba kwa pointi 56 za asilimia.

MRADI UNAHUSISHA NINI?

Mradi huo unatekelezwa kupitia Mpango wa Uboreshaji wa Miundombinu ya Miji Tanzania (TACTIC), kwa ufadhili wa Benki ya Dunia kupitia Serikali chini ya TAMISEMI.

Unahusisha ujenzi wa Soko Kuu la Matopeni, barabara zenye urefu wa kilomita 5.3, Stendi ya Mabasi ya Mitwero pamoja na Ofisi ya Uratibu wa Mradi.

Mkataba wa ujenzi ulisainiwa Juni 25, 2025, mjini Dodoma, na kazi kuanza Novemba 7, 2025. Mradi umepangwa kukamilika Februari 5, 2027.

Usimamizi wa kitaalamu unafanywa na kampuni ya Inter-Consult Limited kwa kushirikiana na Tanzo Vision Engineering Limited.

HATUA ZILIZOCHUKULIWA AWALI

Kabla ya agizo la Makamu wa Rais, Waziri anayehusika na TAMISEMI, Profesa Riziki Shemdoe, alikagua mradi huo Septemba 14, 2026, na kuagiza hatua za haraka kuchukuliwa ili kuokoa muda wa utekelezaji.

Miongoni mwa hatua alizoelekeza ni mkandarasi kutafuta wakandarasi wadogo wenye uwezo wa kutekeleza baadhi ya kazi, pamoja na kuundwa kwa timu maalumu ya kufuatilia maendeleo ya mradi.

Baada ya kufanya tathmini, timu hiyo ilibaini kuwa mkandarasi mkuu hana uwezo wa kukamilisha mradi wote ndani ya muda uliopangwa.

Kutokana na hali hiyo, ilipendekezwa mkandarasi mkuu aendelee na ujenzi wa Soko Kuu la Matopeni, huku kazi za barabara, stendi na ofisi zikabidhiwe kwa wakandarasi wadogo.

Taarifa zinaonesha kuwa mkandarasi mdogo wa ujenzi wa barabara tayari amepatikana, wakati taratibu za kupata wakandarasi wa stendi na ofisi zikiendelea.

FEDHA ZA UMMA LAZIMA ZILINDWE

Agizo la Makamu wa Rais linaweka msisitizo katika uwajibikaji wa wote wanaohusika na utekelezaji na usimamizi wa miradi ya maendeleo.

Lengo ni kuhakikisha fedha zinazotolewa kwa ajili ya miradi zinatumika kwa madhumuni yaliyokusudiwa na wananchi wanapata huduma bora kwa wakati.

Uchunguzi ulioagizwa unatarajiwa kusaidia kubaini chanzo cha ucheleweshaji, uhalali wa malipo yaliyofanyika na hatua zinazostahili kuchukuliwa kwa mujibu wa sheria na taratibu.