Rais Samia Ashiriki Mkutano wa Viongozi wa Afrika Kuhusu Mabadiliko ya Tabianchi Jijini Addis Ababa

 

Addis Ababa, Ethiopia – Rais wa Jamhuri ya Muungano wa Tanzania, Mhe. Dkt. Samia Suluhu Hassan, ameshiriki Mkutano wa Kamati ya Wakuu wa Nchi na Serikali wa Afrika kuhusu Mabadiliko ya Tabianchi (CAHOSCC) uliofanyika pembezoni mwa Mkutano wa Kawaida wa 38 wa Wakuu wa Nchi na Serikali wa Umoja wa Afrika (AU) tarehe 16 Februari, 2025.

Mkutano huo umefanyika jijini Addis Ababa, Ethiopia, ukihusisha viongozi wa mataifa mbalimbali barani Afrika ili kujadili athari za mabadiliko ya tabianchi na hatua za pamoja za kukabiliana nazo kwa maendeleo endelevu ya bara hilo.

Katika hotuba yake, Rais Samia ameweka mkazo katika umuhimu wa Afrika kuwa na mkakati wa pamoja wa kupambana na mabadiliko ya tabianchi kwa kutumia mbinu za kisayansi, teknolojia na ushirikiano wa kimataifa. Ameeleza kuwa Tanzania inaendelea kuchukua hatua madhubuti za kupunguza athari za mabadiliko ya tabianchi kwa kuhimiza matumizi ya nishati jadidifu, uhifadhi wa mazingira, na miradi ya upandaji miti ili kukabiliana na mmomonyoko wa ardhi na ukame.

Aidha, Rais Samia amepongeza juhudi za Umoja wa Afrika katika kusimamia ajenda za mazingira na kueleza kuwa Tanzania itaendelea kushirikiana na mataifa mengine ya Afrika katika kutekeleza makubaliano mbalimbali ya kimataifa yanayolenga kupunguza uzalishaji wa hewa ya ukaa na kulinda vyanzo vya maji.

Viongozi wa Afrika walioshiriki mkutano huo wamejadili pia namna ya kuhakikisha bara hilo linapata rasilimali na msaada wa kifedha kutoka kwa nchi zilizoendelea ili kutekeleza miradi ya kukabiliana na athari za mabadiliko ya tabianchi.

Mkutano wa Kamati ya Wakuu wa Nchi na Serikali wa Afrika kuhusu Mabadiliko ya Tabianchi ni jukwaa muhimu kwa viongozi wa bara hili kushirikiana katika kusaka suluhisho la pamoja kwa changamoto zinazotokana na mabadiliko ya tabianchi, hususan katika sekta za kilimo, maji, nishati, na maendeleo ya miji.

Mkutano wa Kawaida wa 38 wa Wakuu wa Nchi na Serikali wa Umoja wa Afrika (AU) unaendelea jijini Addis Ababa, ukiwa na ajenda mbalimbali zinazohusu maendeleo ya Afrika, usalama, biashara, na ustawi wa wananchi wa bara hili.