RAIS DKT. SAMIA SULUHU HASSAN AWASILI ADDIS ABABA, ETHIOPIA KUSHIRIKI MKUTANO WA 38 WA WAKUU WA NCHI NA SERIKALI WA UMUA WA AFRIKA

 

Addis Ababa, Ethiopia - 14 Februari 2025: Rais wa Jamhuri ya Muungano wa Tanzania, Mhe. Dkt. Samia Suluhu Hassan, amewasili katika Uwanja wa Ndege wa Kimataifa wa Bole, jijini Addis Ababa, Ethiopia, kwa ajili ya kushiriki Mkutano wa Kawaida wa 38 wa Wakuu wa Nchi na Serikali wa Umoja wa Afrika (AU).

Mkutano huu wa AU ni jukwaa muhimu linalokutanisha viongozi wa nchi wanachama wa Umoja wa Afrika ili kujadili masuala ya maendeleo, usalama, na mustakabali wa bara la Afrika. Katika mkutano huu wa mwaka 2025, viongozi wanatarajiwa kujadili ajenda mbalimbali zinazolenga kuinua uchumi wa Afrika, kukuza amani na usalama, pamoja na kuimarisha mshikamano wa nchi wanachama.

Mbali na kushiriki mkutano wa Wakuu wa Nchi na Serikali wa Umoja wa Afrika, Mhe. Rais Dkt. Samia pia atashiriki mkutano wa Baraza la Amani na Usalama la Umoja wa Afrika, chombo kinachohusika na masuala ya usuluhishi wa migogoro, uimarishaji wa demokrasia, na kulinda amani katika bara la Afrika.

Aidha, Rais Dkt. Samia anatarajiwa kushiriki mijadala na mikutano mingine ya kimkakati pembezoni mwa mkutano huo, ikiwemo mikutano na viongozi wa mataifa mbalimbali pamoja na mashirika ya kimataifa yanayojihusisha na maendeleo ya bara la Afrika. Uwepo wake katika mkutano huu ni fursa adhimu kwa Tanzania kuendelea kuimarisha mahusiano ya kimataifa, kushirikiana na mataifa mengine katika kukuza uchumi, na kushiriki juhudi za pamoja za kuimarisha amani na maendeleo barani Afrika.

Kwa kushiriki mkutano huu, Tanzania inaendelea kudhihirisha nafasi yake kama mshirika muhimu katika masuala ya maendeleo na ushirikiano wa kimataifa, huku ikichangia kwa kiasi kikubwa katika kutafuta suluhisho la changamoto zinazolikabili bara la Afrika.

Mkutano wa 38 wa Wakuu wa Nchi na Serikali wa Umoja wa Afrika unatarajiwa kujadili masuala muhimu kama vile maendeleo ya uchumi wa kijani, mabadiliko ya tabianchi, ukuaji wa biashara ndani ya bara kupitia Mpango wa Eneo Huru la Biashara la Afrika (AfCFTA), na juhudi za pamoja za kukabiliana na changamoto za usalama.

Tutaendelea kutoa taarifa za kina kuhusu ushiriki wa Rais Dkt. Samia Suluhu Hassan katika mkutano huu na matokeo yake kwa Tanzania na Afrika kwa ujumla.