🔥 DKT. SAMIA AICHANGAMSHA HANANG! 🔥

“Maendeleo ni Kazi, Umoja ni Nguvu!” — Samia Awaahidi Wananchi wa Manyara Mageuzi Zaidi

Mgombea wa nafasi ya Rais wa Jamhuri ya Muungano wa Tanzania kwa tiketi ya Chama Cha Mapinduzi (CCM) na Mwenyekiti wa CCM Taifa, Ndugu Dkt. Samia Suluhu Hassan, ameendelea na kampeni zake kwa kishindo mkoani Manyara, ambako amekutana na mamia ya wananchi na wanachama wa CCM wilayani Hanang, tarehe 3 Oktoba 2025.

Akipokelewa kwa shangwe, nyimbo na vifijo, Dkt. Samia aliwahakikishia wananchi wa Hanang kuwa serikali ya Awamu ya Sita itaendelea kusukuma mbele gurudumu la maendeleo, ikiwemo ujenzi wa miundombinu, kuboresha huduma za afya, elimu, maji na makazi bora kwa Watanzania wote.

“Serikali tunayoiongoza ni ya watu wote — wakulima, wafanyabiashara, vijana na wanawake. Tumejipanga kuhakikisha kila Mtanzania ananufaika na rasilimali za nchi yake,” alisema Dkt. Samia huku akishangiliwa na umati mkubwa.

Dkt. Samia pia aliwasisitizia wananchi umuhimu wa kudumisha amani, umoja na mshikamano, akibainisha kuwa hayo ndiyo nguzo kuu za maendeleo endelevu.

“Tunataka Tanzania yenye umoja, yenye maelewano, inayosonga mbele bila migawanyiko. Tuchague maendeleo, tuchague amani, tuchague CCM!” aliwataka wananchi.

Wananchi wa Hanang walionekana kufurahia hotuba hiyo yenye matumaini, wakionesha imani kubwa kwa sera za Dkt. Samia zinazolenga kuleta uchumi jumuishi, ajira kwa vijana na uwezeshaji wa wananchi kiuchumi.

Muendelezo wa kampeni za CCM unaendelea katika mikoa mingine ya Kanda ya Kati, ambapo Dkt. Samia anatarajiwa kuzungumza na wananchi kuhusu dira ya maendeleo ya Tanzania mpya — yenye fursa, nidhamu na matokeo chanya kwa wote.

TANZANIA NA ZIMBABWE ZASAINI MAKUBALIANO KUIMARISHA USHIRIKIANO WA KIBIASHARA

Chemba ya Biashara, Viwanda na Kilimo Tanzania (TCCIA) na Chemba ya  Biashara ya Taifa la Zimbabwe (ZNCC) wamesaini hati ya makubaliano (MoU) yenye lengo la kuimarisha ushirikiano wa kibiashara kati ya Tanzania na Zimbabwe. Hafla ya utiaji saini imefanyika pembezoni mwa Mkutano wa 22 wa Mawaziri wa Mambo ya Nje wa Afrika na Nchi za Nordic uliofanyika mjini Victoria Falls, Zimbabwe tarehe 2 na 3 oktoba,2025.

Makubaliano hayo yamesainiwa na Rais wa TCCIA, Bw. Vicent Minja, na Naibu Rais wa ZNCC, Bi. Josephine Takundwa, yakilenga kuhamasisha, kukuza na kuwezesha ushirikiano wa kiuchumi kati ya sekta binafsi za nchi hizo mbili. Tukio hilo limeshuhudiwa na Balozi wa Tanzania nchini Zimbabwe, Kamishna wa Polisi (CP) Suzan S. Kaganda, pamoja na Katibu Mkuu wa Wizara ya Mambo ya Nje na Biashara za Kimataifa ya Zimbabwe, Balozi Albert Chimbindi.

Kupitia makubaliano hayo, pande zote zimekubaliana kuandaa misafara ya kibiashara, maonesho, warsha na mikutano ya kibiashara kwa lengo la kukuza biashara na uwekezaji. Pia, zitabadilishana taarifa muhimu za kiuchumi na takwimu zitakazowezesha wanachama kufanya biashara kwa ufanisi na kuongeza tija.

Makubaliano hayo yanalenga pia kushughulikia changamoto za kibiashara, hususan vikwazo visivyo vya kiforodha, pamoja na kujenga mitandao ya kibiashara itakayowaunganisha wafanyabiashara na wawekezaji kuanzisha miradi ya pamoja yenye manufaa kwa pande zote.

Hati hii ya makubaliano itadumu kwa kipindi cha miaka sita kuanzia Oktoba 2025, ikiwa na uwezekano wa kuongezwa kwa makubaliano ya maandishi kati ya pande mbili. Hatua hii inalenga kuhakikisha uendelevu wa ushirikiano wa kibiashara na manufaa ya muda mrefu kwa wananchi wa Tanzania na Zimbabwe.

Kupitia ushirikiano huu, nchi hizo mbili zinatarajiwa kufungua fursa mpya za uwekezaji, kuongeza ajira, na kuimarisha nafasi ya sekta binafsi katika kukuza uchumi wa kikanda. Hatua hii pia inaonesha dhamira ya dhati ya Tanzania na Zimbabwe kuimarisha uhusiano wa kiuchumi na kukuza maendeleo endelevu barani Afrika.

ZOEZI LA KUHAMISHA TEMBO TAKRIBANI 500 KUTOKA KYERWA KWENDA BURIGI - CHATO LAENDELEA KUFANIKIWA.

Na. Jacob Kasiri - Kyerwa.

Zoezi la kuhamisha tembo takribani 500 kutoka katika maeneo ya wananchi na mwekezaji wilayani Kyerwa na Karagwe kuelekea Hifadhi ya Taifa Burigi-Chato linalotekelezwa kitaalam bila adha wala bughudha kwa wananchi na mali zao likiendeshwa na TANAPA kwa kushirikiana na Jeshi la Wananchi wa Tanzania (JWTZ) linaendelea kufanikiwa kwa kiasi kikubwa.

Tayari makundi makubwa mawili yenye tembo zaidi ya mia moja (100) waliotembea umbali wa zaidi ya kilometa 150 kutoka Kyerwa wameshaingia ndani Hifadhi ya Taifa Burigi - Chato na kuonesha dalili zote za kutokurudi walipotoka. Hatua hii imekuja baada ya wataalamu wa Ikolojia kutoka shirika hilo kuyafuatilia makundi hayo kwa ukaribu zaidi.

Zoezi hilo linaloendelea kila siku la kuwaswaga tembo kwa kutumia Helikopta mbili (2) za Jeshi la Wananchi wa Tanzania (JWTZ) na kwa magari ambapo leo Oktoba 03, 2025 zaidi ya tembo 105 waliokuwa katika makundi mawili (2) wameendelea kuswagwa kutoka Kyerwa yalipo mashamba ya mwekezaji wa Kiwanda cha Sukari (Kagera Sugar) hadi eneo liitwalo Golini ulipo mpaka wa wilaya ya Kyerwa na Karagwe kuelekea Hifadhi ya Taifa Burigi - Chato.

Ikumbukwe kuwa Septemba 30, 2025 wakati alipozuru na kushiriki doria ya kuswaga tembo hao, Naibu Kamishna wa Uhifadhi na Maendeleo ya Biashara TANAPA Massana Mwishawa aliridhishwa na zoezi zima linaloendelea uwandani na alisema;

“Zoezi linaendelea vizuri licha ya changamoto kadhaa zinazojitokeza kwa tembo wakolofi ambao hujitenga na wenzao, pia endeleeni kuyafuatilia yale makundi ambayo mmeshayafikisha hifadhini ili yasirudi tena na kwenda kusababisha karaha kwa wananchi na mali zao japo kwa umbali waliotembea na misukosuko waliyoipata ni vigumu kurudi, ila tuendelee kuwachunguza kwa ukaribu.”

Naye, Mkuu wa Hifadhi ya Taifa Ibanda - Kyera ACC  Fredrick Mofulu ambaye ndio msimamizi na mratibu wa operesheni hii alisema kuwa watahakikisha tembo wote waliosalia wanahamishwa ili kumaliza kabisa adha waliyokuwa wakiipata wananchi ya kuharibiwa mazao yao na kuhatarishiwa maisha yao na wanyamapori hao.

Sanjari na hilo zoezi hilo pia leo limewahusisha Makamishna Waandamizi wa Uhifadhi ambao ni Charles Ngende - Mkuu wa Hifadhi ya Taifa Rumanyika - Karagwe na Catherine Mbena, Mkuu wa Kitengo cha Mawasiliano - TANAPA. 

Zoezi hili pia limeshirikisha taasisi nyingine za uhifadhi zilizo chini ya Wizara ya Maliasili na Utalii zikiwemo taasisi za Utafiti wa Wanyamapori Tanzania (TAWIRI) na Mamlaka ya Usimamizi wa Wanyamapori Tanzania (TAWA) mkoani Kagera.

WAMILIKI WA LESENI ZA MADINI WATAKIWA KUWAJIBIKA KWA JAMII

Ruvuma

Mwenyekiti wa Tume ya Madini, Dkt. Janet Lekashingo, amewataka wamiliki wa leseni za uchimbaji wa madini kuhakikisha wanatekeleza wajibu wao kwa jamii ili kuweka mazingira salama na yenye tija kwa shughuli za uchimbaji.

Dkt. Lekashingo alitoa wito huo Oktoba 2, 2025, wakati alipofungua mafunzo ya Ushirikishwaji wa Watanzania katika Sekta ya Madini na Wajibu wa Kampuni za Madini kwa Jamii (CSR) yaliyowashirikisha wadau wa sekta hiyo mkoani Ruvuma.

Alisema lengo kuu la mafunzo hayo lilikuwa ni kuhakikisha jamii inanufaika kiuchumi na kimazingira kutokana na shughuli za madini, sambamba na utekelezaji wa sera za maendeleo ya taifa.

“Msingi wetu ni  kufanya kazi kwa haki, uwazi na kushirikiana na wadau wote ili rasilimali za madini ziwe nguzo ya maendeleo ya taifa na chanzo cha ustawi kwa kila Mtanzania,” alisema Dkt. Lekashingo.

Aidha, alisisitiza kuwa kupitia uwekezaji katika mafunzo, teknolojia za kisasa, ujenzi wa viwanda na uwajibikaji wa kampuni kwa jamii na mazingira, Tanzania itaweza kupata mageuzi makubwa katika Sekta ya Madini.

Alibainisha pia kuwa mafunzo hayo ni sehemu ya utekelezaji wa azma ya Serikali ya Awamu ya Sita chini ya Rais Dkt. Samia Suluhu Hassan, kuhakikisha Sekta ya Madini inachangia ipasavyo Pato la Taifa na kufungamanishwa na sekta nyingine za kiuchumi ili kuleta maendeleo endelevu.

Kwa upande wake, Mwenyekiti wa Kamati ya Ushirikishwaji wa Watanzania katika Sekta ya Madini, Dkt. Theresia Numbi, alisema mabadiliko ya Sheria ya Madini ya mwaka 2010 yameweka msisitizo wa kushirikisha Watanzania ipasavyo katika sekta hiyo. 

Aliongeza kuwa hatua hiyo ilisababisha kutungwa kwa kanuni za ushirikishwaji wa Watanzania mwaka 2018 ambazo zimeendelea kufanyiwa maboresho.

“Matokeo ya maboresho hayo yamewezesha Watanzania wengi kupata ajira katika migodi, kupata mafunzo ya kuwajengea uwezo, kuimarishwa kwa uhamishaji wa teknolojia na kuongeza uelewa wa jamii kuhusu dhana ya ushirikishwaji,” alisema Dkt. Numbi.

Naye Mwakilishi wa Katibu Tawala wa Mkoa wa Ruvuma, Jumanne Mwankhoo, aliishukuru Tume ya Madini kwa kupeleka mafunzo hayo mkoani humo kwa mara ya kwanza na kuahidi  kuhakikisha mafunzo yaliyotolewa yanatekelezwa kikamilifu

TFRA YATOA ELIMU YA MATUMIZI SAHIHI YA MBOLEA NJOMBE

Kuelekea msimu mpya wa kilimo mwaka 2025/2026 kwa kushirikiana na Wizara ya Kilimo, Mamlaka ya Udhibiti wa Mbolea Tanzania (TFRA) imeendesha mafunzo ya matumizi sahihi ya mbolea kwa wakulima wa Mkoa wa Njombe, kata ya Makowo, ili kuongeza tija na uzalishaji. 

Mafunzo hayo yaliyoanza kutolewa katika kijiji na Kata ya Makowo leo tarehe 2 Oktoba, 2025  yanalenga wakulima wa mazao mbalimbali yakiwemo ya kibiashara kama Viazi, Mahindi, Parachichi na Chai.

Akizungumza wakati wa mafunzo hayo, Mkurugenzi Mtendaji wa TFRA, Joel Laurent, amesema elimu hiyo inalenga kuwajengea uwezo wakulima juu ya matumizi sahihi ya mbolea za kupandia, kukuzia na kubebeshea, ili kuepuka hasara na mavuno hafifu kutokana na kutokuzingatia matumizi sahihi ya mbolea. Matumizi sahihi ya mbolea yanaenda sambamba na utambuzi wa afya ya udongo na matumizi ya visaidizi vya mbolea.

Hata hivyo Mkurugenzi Mamlaka ya Udhibiti wa Mbolea Tanzania (TFRA) ameahidi kupeleka kifaa cha upimaji afya ya udongo (Soil Scanner) Halmashauri ya Njombe mji ili kuwawezesha wataalamu kubaini mahitaji halisi ya udongo na kushauri aina bora ya mbolea kwa wakulima.

Kwa upande wake, Bwana Shamba wa kampuni ya mbolea ya OCP, Joshua Joel, amewataka wakulima kutumia mbolea kwa kuzingatia upatikanaji na zinazowawezesha kupunguza gharama za uzalishaji huku kampuni ikiwahakikishia wakulima kufikishia pembejeo hizo kwa wakati.

Wakulima walioshiriki mafunzo hayo, akiwemo Agnes Mgaya, Costa Abeck na Sabas Mwalongo, wameshukuru kwa kupewa elimu ya mbolea na kueleza imewapa mwanga mkubwa kwani awali walikuwa wakichanganya mbolea zaidi ya moja bila kufuata utaratibu wa kitaalamu jambo lililowapotezea rasilimali fedha. 

Aidha, wamemshukuru Rais wa Jamhuri ya Muungano wa Tanzania kwa kuwapa mbolea za ruzuku zilizopunguza gharama kubwa za uzalishaji na kueleza wanazipata kwa wakati katika maeneo yao.

Kwa upande wake, Mwenyekiti wa kijiji cha Makowo, Sabas Mwalongo, amewasisitiza wakazi wa eneo hilo kuhakikisha wanayafanyia kazi mafunzo waliyopewa ili yaweze kuwasaidia kufanya uzalishaji wenye tija kwa zao la viazi kwa kuwa ndiyo uchumi wa wananchi wa kata ya Mkowo.

Ameishukuru Serikali kwa kuwezesha mafunzo hayo kufanyika katika kijiji cha Makowo na Marimba, huku akiomba zoezi hilo liwe endelevu.

UJIRANI MWEMA KATI YA NGORONGORO NA VIJIJI VYA JIRANI WAZIDI KUIMARISHWA

 

Na Mwandishi Wetu

Naibu Kamishna wa Uhifadhi wa Mamlaka ya Hifadhi ya Ngorongoro anayesimamia Uhifadhi, Utalii na Maendeleo ya Jamii, Joas Makwati, ameongoza kikao cha ujirani mwema na viongozi wa vijiji vinavyopakana na hifadhi hiyo mnamo Oktoba 1, 2025, ambapo alisisitiza umuhimu wa mshikamano na ushirikiano kati ya wananchi na Mamlaka hiyo.

Katika kikao hicho kilichohusisha viongozi wa vijiji vya Wilaya za Karatu na Monduli, Makwati aliambatana na Kamishna Msaidizi Mwandamizi anayeshughulikia Maendeleo ya Jamii, Bi. Gloria Bideberi, pamoja na watendaji wengine waandamizi wa Mamlaka.

Viongozi wa vijiji waliwasilisha changamoto mbalimbali zinazowakabili wananchi, kubwa ikiwa ni uvamizi wa wanyamapori wakali na waharibifu – hususan tembo na nyati – wanaoingia makazi na mashamba na kusababisha uharibifu wa mazao. Walisema hali hiyo imekuwa tishio kwa usalama na maendeleo ya kiuchumi ya kaya nyingi zinazotegemea kilimo kama njia kuu ya kujipatia kipato.

Akizungumza baada ya majadiliano hayo, Naibu Kamishna Makwati alisema kikao hicho ni hatua muhimu ya kuimarisha ujirani mwema na kuweka mikakati ya pamoja ya kudhibiti changamoto zinazojitokeza baina ya binadamu na wanyamapori.

“Tunapaswa kushirikiana kwa karibu ili kulinda hifadhi na wakati huo huo kulinda maisha na mali za wananchi. Huu ni mwanzo mzuri wa kujenga uelewano endelevu,” alisema Makwati.

Kwa upande wake, Bi. Bideberi alisisitiza kuwa Mamlaka itaendelea kushirikiana na wananchi kupitia vikao vya majadiliano na mipango ya pamoja ya kijamii ili kuhakikisha jamii za jirani na hifadhi zinanufaika zaidi na uwepo wa hifadhi hiyo.

Mamlaka ya Hifadhi ya Ngorongoro imekuwa ikiendesha ziara na mikutano katika vijiji mbalimbali ili kusikiliza changamoto za wananchi na kuimarisha mahusiano ya ujirani mwema, lengo likiwa ni kulinda maliasili kwa manufaa ya kizazi cha sasa na kijacho.

NHC Yazindua Mauzo ya Nyumba Dar, Tanga na Tabora

Shirika la Nyumba la Taifa (NHC) limezindua rasmi mauzo ya nyumba katika miradi mikubwa ya kisasa jijini Dar es Salaam na mikoa ya Tanga na Tabora. 

Uzinduzi huo umefanyika Makao Makuu ya NHC, Kambarage House, ukiongozwa na Meneja Mauzo na Masoko, Deogratius Batakanwa, ambaye amesema hatua hii inalenga kuhakikisha Watanzania wanapata makazi bora, ya kisasa na yenye thamani ya kudumu.

 

Amesema kuwa Jijini Dar es Salaam, NHC imezindua mauzo ya nyumba kwenye mradi wa Boulevard Residence yenye nyumba za chumba kimoja (37.7 sqm), vyumba viwili (103.5 sqm) na vyumba vitatu (124.2 sqm), Katika mradi huu mauzo yanaanzia shilingi milioni 248 yakiwa na VAT.

 

Kwa upande wa nyumba za mradi wa Samia Housing Kijichi Residence wenye nyumba za chumba kimoja (32.02 sqm), vyumba viwili (62.70 sqm) na vyumba vitatu (95.30 sqm). Katika mradi huu mauzo yanaanzia shilingi milioni 112 yakiwa na VAT. 

 

Kwa mkoa wa Tanga, NHC inatangaza mauzo ya nyumba mradi wa  Mkwakwani Plaza zenye vyumba viwili (80 sqm) na vitatu (108 sqm),Katika mradi huu mauzo yanaanzia shilingi milioni 185 yakiwa na VAT, huku mkoani Tabora ikitangaza kuuza nyumba kwenye mradi wa Tabora Plaza yenye vyumba viwili (95 sqm) na vitatu (124 sqm). Katika mradi huu mauzo yanaanzia shilingi milioni 225 yakiwa na VAT.

 

Bei za nyumba hizi zimepangwa kwa kuzingatia mahitaji ya Watanzania wa kipato tofauti, na lengo kuu ni kutoa fursa kwa kila mmoja kumiliki nyumba bora. Wateja wanaweza kupata huduma kwa kupiga namba ya huduma 0736 114 433 au kuwasiliana moja kwa moja na maafisa mauzo walioteuliwa.

 

Batakanwa amesema NHC itaendelea kujenga taifa kwa kutoa makazi bora na kuwataka Watanzania kutumia fursa ya kipekee ya kumiliki nyumba katika maeneo yenye miundombinu bora na mazingira salama. 

 

Kupitia miradi hii, NHC imeonesha dhamira ya kuharakisha maendeleo ya makazi nchini na kuwapa wananchi fursa ya kuishi na kufanya biashara katika mazingira ya kisasa.