KIKUNDI CHA UTAMADUNI CHA ILKIDING’A CHAFURAHIA UTALII WA IKOLOJIA PUGU KAZIMZUMBWI

Wageni kutoka Ilkiding’a Cultural Tourism Programme ya Arusha wametembelea Hifadhi ya Mazingira Asilia ya Pugu Kazimzumbwi jijini Dar es Salaam tarehe 29 Januari 2025, kwa lengo la kufurahia utalii wa ikolojia. Ziara hiyo imefanyika siku chache baada ya kumalizika kwa Mkutano wa Nishati wa Wakuu wa Nchi za Afrika uliofanyika katika Kituo cha Mikutano cha Kimataifa cha Julius Nyerere tarehe 27-28 Januari 2025.

Kiongozi wa kikundi hicho, Eliakimu Laizer, amesema, “Tumefurahishwa sana na uwekezaji mkubwa uliofanyika katika utalii wa ikolojia hapa Pugu Kazimzumbwi. Tunawaasa wananchi wote kutembelea hifadhi za mazingira kama hii ili kufurahia uzuri wa asili na kujifunza umuhimu wa uhifadhi wa mazingira.”

Ilkiding’a Cultural Tourism Programme imejipatia umaarufu kwa kucheza ngoma za asili za kabila la Maasai, na imekuwa kivutio kikubwa kwa watalii wa ndani na nje ya nchi, ikipata mialiko mbalimbali ya kutumbuiza.

Hifadhi ya Pugu Kazimzumbwi, inayojulikana kama “mapafu ya Dar es Salaam”, ni moja ya mabaki machache ya misitu ya pwani na ni muhimu kwa wakazi wa Dar es Salaam, Wilaya ya Kisarawe, na maeneo jirani.