MADEREVA 27 WAKAMATWA KWA MAKOSA YA USALAMA BARABARANI VIGWAZA

 

Madereva 27 wamekamatwa na kuwekwa mahabusu kwa makosa mbalimbali ya usalama barabarani, kufuatia operesheni maalumu ya ukaguzi wa magari iliyofanywa na Jeshi la Polisi katika eneo la Vigwaza, Wilaya ya Kipolisi Chalinze, Mkoa wa Pwani.

Operesheni hiyo iliyofanyika nyakati za usiku ilihusisha ukaguzi wa magari 210 na kuongozwa na Kamishna Msaidizi wa Polisi Julius Mwakabonga, Mkuu wa Operesheni kutoka Kikosi cha Usalama Barabarani, akishirikiana na Mkuu wa Usalama Barabarani Mkoa wa Pwani, Mrakibu Mwandamizi wa Polisi Edson Mwakihaba, kwa lengo la kudhibiti ukiukwaji wa sheria za barabarani.

Ametoa rai kwa wamiliki wa mabasi kuhakikisha wanakuwa na madereva wawili kwa kila safari ili kuwezesha kubadilishana majukumu na kupata muda wa kupumzika.

Aidha, amewataka Wakuu wa Usalama Barabarani wa Mikoa (RTO) kuimarisha ukaguzi wa mabasi na kudhibiti ubebaji wa abiria wanaozidi idadi inayoruhusiwa, akisisitiza kuwa hakuna mtu anayepaswa kupewa upendeleo, bila kujali nafasi au cheo chake.

Katika hatua nyingine, Mwakabonga amewataka madereva na watumiaji wengine wa barabara kuzingatia sheria, hasa kuelekea mwisho wa mwaka ambapo safari huongezeka, huku akionya kuwa Jeshi la Polisi litaendelea kuwafuatilia wanaokiuka taratibu, wakiwemo madereva wa magari ya kubeba mchanga.

Amewahimiza abiria kutoa taarifa wanapobaini uzembe wa madereva ili kusaidia kuzuia ajali na kulinda maisha ya watu.

WANAFUNZI UDOM WAPEWA ELIMU YA KUZUIA VITENDO VYA UKATILI

 Na WMJJWM – Dodoma 

Kamishna msaidizi wa Ustawi wa jami kutoka Wizara ya Maendeleo ya Jamii Jinsia Wanawake na Makundi Maalum Wakili Happy Msimbe amewasihi wanafunzi wa Chuo Kikuu cha Dodoma kujiepusha na matumizi yaisiyo sahihi ya mitandao ili kulinda maadili na utu wao. 

Amesema hayo mara baada ya ibada ya misa ya jumapili iiliyofanyika tarehe 15 Novemba 2026, chuoni hapo ikiambatana na semina kwa wanafunzi hao iliyolenga kuwapa elimu wanafunzi kwa kulinda maadili, kujiepusha na matumizi yasiyo sahihi ya mitandao ya kijamii na kujiepusha na vitendo vya ukatili wa kijinsia.

“Nawaomba sana mzingatie maadili mema, mana ninnyi ni wazazi wa kesho, hivyo mnatakiwa kuwa mfano bora kwa jamii na Taifa”amesema Kamishna Happy

kwa upande wake Msaikolojia kutoka Wizara ya Habari, Utamaduni Sanaa na Michezo Tito Lulandala amesema kuwa ili wanafunzi wafanikiwe katika maisha yao ni lazima kuamua kuishia masisha yenye misingi ya maadili, kujituma na kuchagua marafiki sahihi. 

“Naomba mfahamu kwamba kesho yako inaamuliwa na maamuzi na uchaguzi utakaofanya leo, hivyo jifunze maarifa mbalimbali Kadiri uwezavyo ili kuwa na hazina ya uwezo wa kitaaluma na ujuzi utakaokusaidia kutatua chagamoto mbalimbali za kijamii.” amesema Lulandali.

Naye Meneja wa Makao ya watoto ya Taifa Kikombo Darius Kalijongo amewahimiza wanafunzi kuepuka kufanya vitendo vya ukatili wa kimwili, kihisia na kiuchumi kwa sababu vitendo hivyo huathiri mafanikio ya kimasomo na maendeleo binafsi.

Mafunzo hayo yametolewa kwa wanafunzi wa ndaki ya elimu na tiba katika chuo kikuu cha Dodoma yanalenga kuwajenga wanafunzi kuwa na maadili mema, nidhamu, malezi na makuzi na kuwaandaa kuwa viongozi bora kuanzia katika familia, jamii na Taifa.

WANANCHI NANGURUKURU WAMPOKEA MAKAMU WA RAIS AKIWA ZIARANI MKOANI LINDI

Makamu wa Rais wa Jamhuri ya Muungano wa Tanzania, Mhe. Deogratius Ndejembi, leo tarehe 15 Novemba 2026 amezungumza na wananchi wa Ngurukuru Wilaya ya Kilwa, akiwa ziarani mkoani Lindi.

Makamu wa Rais, amewahakikishia wananchi wa Kilwa, kwamba Serikali itaendelea na jitihada za kuboresha maisha ya wananchi kwa kuimarisha huduma za kijamii na miundombinu ili waweze kufanya shughuli za uzalishaji kwa ufanisi.

TANZANIA YAPATA DOLA MILIONI 120 KWA MIRADI YA MAJI, MILIONI 150 KWA UWEKEZAJI WA KILIMO

 

Mkurugenzi wa Mawasiliano ya Rais, Ikulu Ndugu Bakari Machumu, pamoja na viongozi mbalimbali wakizungumza kwenye mkutano na Waandishi wa Habari, Ikulu Jijini Dar es Salaam tarehe15 Novemba, 2026, kuhusu mafanikio ya Ziara ya Kikazi ya Mhe. Rais Dkt. Samia Suluhu Hassan, Antalya nchini Uturuki ambapo alishiriki katika Mkutano wa 31 wa Nchi Wanachama wa Mkataba wa Umoja wa Mataifa kuhusu Mabadiliko ya Tabianchi (COP31), pamoja na mikutano ya pembezoni ya Ngazi za Juu kuhusu masuala ya Nishati Safi ya Kupikia.

Ushiriki wa Tanzania katika COP31 nchini Uturuki, chini ya uongozi wa Rais Dkt. Samia Suluhu Hassan, umeimarisha nafasi ya Taifa kimataifa na kufungua fursa za biashara, uwekezaji, nishati safi, teknolojia na ajira.

………….. 

Na Sophia Kingimali, Dar es Salaam

ZIARA ya Rais wa Jamhuri ya Muungano wa Tanzania, Mhe. Dkt. Samia Suluhu Hassan, nchini Uturuki na kushiriki Mkutano wa Umoja wa Mataifa wa Mabadiliko ya Tabianchi (COP31), imeiwezesha Tanzania kupata fursa za ufadhili wa miradi ya maji yenye thamani ya Dola za Marekani milioni 120 na uwekezaji wa zaidi ya Dola milioni 150 katika sekta ya kilimo.

Matokeo hayo ni miongoni mwa mafanikio ya ziara hiyo iliyolenga kuimarisha ushirikiano wa kimataifa, kuvutia mitaji na kutafuta rasilimali za kutekeleza miradi ya maendeleo, hususan katika kukabiliana na mabadiliko ya tabianchi.

Akizungumza na waandishi wa habari leo, Novemba 15, 2026, jijini Dar es Salaam kuhusu matokeo ya ziara hiyo, Mkurugenzi wa Mawasiliano ya Rais, Ikulu, Bakari Machumu, amesema ziara hiyo imefungua fursa za uwekezaji, biashara na ushirikiano na washirika wa maendeleo katika sekta mbalimbali.

Amesema kupitia mkutano wa COP31, Rais Samia alitumia jukwaa hilo kutetea haki ya tabianchi kwa nchi zinazoendelea, akisisitiza kuwa Afrika inachangia kwa kiwango kidogo katika mabadiliko ya tabianchi, lakini inaendelea kukabiliwa na athari zake.

Machumu amesema ziara hiyo pia imeweka msisitizo katika kuimarisha sekta ya nishati, ambapo upatikanaji wa umeme nchini umeongezeka kutoka asilimia 6.9 mwaka 2012 hadi kufikia asilimia 66, huku wadau wakisaidia zaidi ya shule 200 katika mikoa 31.

Kwa upande wake, Katibu Mkuu wa Ofisi ya Makamu wa Rais, Muungano na Mazingira, Dkt. Richard Muyungi, amesema Mfuko wa Kimataifa wa Tabianchi (GCF) umekubali kutoa fedha zilizobaki kwa ajili ya kukamilisha mradi wa maji katika maeneo ya Ziwa Victoria na Simiyu, unaogharimu Dola za Marekani milioni 120.

Amesema mradi huo unatarajiwa kunufaisha wakazi zaidi ya 50,000 kwa kusafirisha maji umbali wa zaidi ya kilomita 25 na kuhudumia vijiji 103 mkoani Simiyu.

Dkt. Muyungi amesema Tanzania pia imepata fursa ya uwekezaji wa zaidi ya Dola milioni 150 katika sekta ya kilimo, utengenezaji wa bidhaa viwandani, misitu na usambazaji, kupitia ushirikiano na taasisi mbalimbali za ndani na nje ya nchi.

Ameongeza kuwa ziara hiyo imefungua njia ya kuifanya Tanzania kuwa kitovu cha mafunzo kuhusu mabadiliko ya tabianchi barani Afrika, huku Dar es Salaam ikitajwa kuwa eneo la kuanzisha kituo cha vijana kinachohusishwa na Umoja wa Mataifa na Umoja wa Afrika.

Naye Waziri wa Fedha, Balozi Khamis Mussa Omar, amesema Tanzania inaendelea kutafuta fedha za kutekeleza Mpango wa Taifa wa Kukabiliana na Mabadiliko ya Tabianchi (NDC), ambao unahitaji Dola za Marekani milioni 19.3, ambapo tayari Dola milioni 7.3 zimepatikana na Dola milioni 12 zinahitajika.

Amesema Serikali inaendelea kushirikiana na mifuko ya kimataifa na taasisi za fedha kupata fedha hizo, ikiwamo kuhamasisha matumizi ya hati fungani za kijani ili kuwezesha utekelezaji wa miradi inayozingatia uhifadhi wa mazingira.

Kwa upande wake, Naibu Waziri wa Mambo ya Nje na Ushirikiano wa Afrika Mashariki, Dkt. Ngwaru Jumanne Maghembe, amesema Rais Samia alikutana na Rais wa Uturuki, Recep Tayyip Erdoğan, Novemba 12, ambapo walijadili masuala ya biashara, uwekezaji, ajira na utalii.

Amesema Tanzania na Uturuki zimekubaliana kuelekeza juhudi katika kuongeza thamani ya biashara kati ya nchi hizo kutoka Dola za Marekani milioni 354 hadi kufikia Dola bilioni moja, huku Tanzania ikilenga kupanua soko la chai, kahawa, korosho, pamba, bidhaa za viwandani na madini.

Ameongeza kuwa katika mkutano huo, zaidi ya washirika 20 wa maendeleo walionesha utayari wa kuunga mkono juhudi za Tanzania katika nishati safi kwa shule na vituo vya afya, huku Rais Samia akisisitiza lengo la kuhakikisha asilimia 80 ya Watanzania wanatumia nishati safi ya kupikia ifikapo mwaka 2034.

Naye Waziri wa Nishati, Juma Homera, amesema ziara hiyo imeongeza fursa za ushirikiano katika uwekezaji wa nishati jadidifu na upatikanaji wa fedha za kijani, huku Serikali ikiendelea kuhamasisha matumizi ya magari yanayotumia umeme na gesi ili kupunguza uzalishaji wa hewa ukaa na kuimarisha ukuaji wa uchumi.

MAKAMU WA RAIS AAGIZA TAKUKURU, POLISI KUCHUNGUZA BILIONI 4.22 ZA MRADI WA LINDI

▪️ Ahoji malipo ya mabilioni wakati ujenzi umefikia asilimia 24 pekee

▪️ Akataa maelezo ya barua 16 alizoandikiwa mkandarasi bila hatua madhubuti

▪️ Ataka taarifa ya uchunguzi ili aiwasilishe kwa Rais Samia

Makamu wa Rais wa Jamhuri ya Muungano wa Tanzania, Mhe. Deogratius Ndejembi, ameagiza Taasisi ya Kuzuia na Kupambana na Rushwa (TAKUKURU) na Jeshi la Polisi kuchunguza matumizi ya shilingi bilioni 4.22 zilizolipwa kwa mkandarasi anayetekeleza mradi wa kuboresha miundombinu ya Manispaa ya Lindi, baada ya kubainika kuwa ujenzi umefikia asilimia 24 pekee licha ya asilimia 80 ya muda wa mkataba kuwa umetumika.

Makamu wa Rais ametoa agizo hilo leo, wakati wa ziara yake mkoani Lindi, baada ya kupokea taarifa ya maendeleo ya mradi huo wenye thamani ya shilingi bilioni 19.06.

Amesema hali hiyo inahitaji uchunguzi wa kina ili kubaini fedha zilizolipwa zimetumikaje, kwa nini ujenzi unasuasua na iwapo taratibu za malipo zilifuatwa ipasavyo.

Aidha, ameagiza taarifa ya uchunguzi huo iwasilishwe kwake moja kwa moja ili aweze kuiwasilisha kwa Rais wa Jamhuri ya Muungano wa Tanzania, Mhe. Dkt. Samia Suluhu Hassan.

BARUA 16 BILA MATOKEO

Katika hatua nyingine, Makamu wa Rais ameonesha kutoridhishwa na maelezo ya viongozi wa Halmashauri kwamba walimwandikia mkandarasi barua 16 kumtaka kuongeza kasi ya ujenzi.

Amehoji umuhimu wa kuendelea kuandika barua wakati mradi unasuasua na fedha nyingi za umma tayari zimelipwa.

Pia amehoji sababu za mkandarasi kuendelea kupokea malipo mengine wakati Halmashauri ilikuwa imebaini kuwa hakuwa na nidhamu katika matumizi ya fedha za malipo ya awali.

Amesisitiza kuwa kinachohitajika ni hatua madhubuti za kuhakikisha fedha za umma zinalindwa na miradi inakamilika kwa wakati ili wananchi wapate huduma zilizokusudiwa.

BILIONI 4.22 ZILILIPWAJE?

Kwa mujibu wa taarifa iliyowasilishwa wakati wa ukaguzi, mradi huo unatekelezwa na kampuni ya Hamerkop International Limited JV KIKIM Contractor's Limited.

Hadi sasa, mkandarasi amelipwa jumla ya shilingi bilioni 4.22, ambapo shilingi bilioni 2.86 zilikuwa malipo ya awali na shilingi bilioni 1.36 zililipwa kupitia hati ya pili ya malipo.

Hata hivyo, maendeleo ya ujenzi yamefikia asilimia 24 tu, wakati kwa mujibu wa mpango wa utekelezaji, kazi zilipaswa kuwa zimefikia asilimia 80.

Hii ina maana kwamba mradi uko nyuma ya ratiba kwa pointi 56 za asilimia.

MRADI UNAHUSISHA NINI?

Mradi huo unatekelezwa kupitia Mpango wa Uboreshaji wa Miundombinu ya Miji Tanzania (TACTIC), kwa ufadhili wa Benki ya Dunia kupitia Serikali chini ya TAMISEMI.

Unahusisha ujenzi wa Soko Kuu la Matopeni, barabara zenye urefu wa kilomita 5.3, Stendi ya Mabasi ya Mitwero pamoja na Ofisi ya Uratibu wa Mradi.

Mkataba wa ujenzi ulisainiwa Juni 25, 2025, mjini Dodoma, na kazi kuanza Novemba 7, 2025. Mradi umepangwa kukamilika Februari 5, 2027.

Usimamizi wa kitaalamu unafanywa na kampuni ya Inter-Consult Limited kwa kushirikiana na Tanzo Vision Engineering Limited.

HATUA ZILIZOCHUKULIWA AWALI

Kabla ya agizo la Makamu wa Rais, Waziri anayehusika na TAMISEMI, Profesa Riziki Shemdoe, alikagua mradi huo Septemba 14, 2026, na kuagiza hatua za haraka kuchukuliwa ili kuokoa muda wa utekelezaji.

Miongoni mwa hatua alizoelekeza ni mkandarasi kutafuta wakandarasi wadogo wenye uwezo wa kutekeleza baadhi ya kazi, pamoja na kuundwa kwa timu maalumu ya kufuatilia maendeleo ya mradi.

Baada ya kufanya tathmini, timu hiyo ilibaini kuwa mkandarasi mkuu hana uwezo wa kukamilisha mradi wote ndani ya muda uliopangwa.

Kutokana na hali hiyo, ilipendekezwa mkandarasi mkuu aendelee na ujenzi wa Soko Kuu la Matopeni, huku kazi za barabara, stendi na ofisi zikabidhiwe kwa wakandarasi wadogo.

Taarifa zinaonesha kuwa mkandarasi mdogo wa ujenzi wa barabara tayari amepatikana, wakati taratibu za kupata wakandarasi wa stendi na ofisi zikiendelea.

FEDHA ZA UMMA LAZIMA ZILINDWE

Agizo la Makamu wa Rais linaweka msisitizo katika uwajibikaji wa wote wanaohusika na utekelezaji na usimamizi wa miradi ya maendeleo.

Lengo ni kuhakikisha fedha zinazotolewa kwa ajili ya miradi zinatumika kwa madhumuni yaliyokusudiwa na wananchi wanapata huduma bora kwa wakati.

Uchunguzi ulioagizwa unatarajiwa kusaidia kubaini chanzo cha ucheleweshaji, uhalali wa malipo yaliyofanyika na hatua zinazostahili kuchukuliwa kwa mujibu wa sheria na taratibu.

MAKAMU WA RAIS NDEJEMBI: SERIKALI IMEDHAMIRIA KUENDELEA KUBORESHA MAISHA YA WANANCHI

TANDAHIMBA, MTWARA: Makamu wa Rais wa Jamhuri ya Muungano wa Tanzania, Mhe. Deogratius Ndejembi, amewahakikishia wananchi wa Wilaya ya Tandahimba mkoani Mtwara kuwa Serikali ya Awamu ya Sita, chini ya uongozi wa Rais Dkt. Samia Suluhu Hassan, itaendelea kuweka kipaumbele katika kuboresha huduma za kijamii, kuimarisha mazingira ya shughuli za kiuchumi na kuhakikisha wananchi wanaendelea kuishi kwa amani na usalama.

Akizungumza na wananchi wa Tandahimba leo, Alhamisi, Novemba 12, 2026, katika muendelezo wa ziara yake katika mikoa ya Kusini, Mhe. Ndejembi amefikisha salamu za Rais Dkt. Samia Suluhu Hassan na kusisitiza dhamira ya Serikali ya kuendelea kuwaletea wananchi maendeleo yanayogusa maisha yao ya kila siku.

Ziara hiyo ni sehemu ya utaratibu wa Serikali ya Awamu ya Sita wa kuwafuata wananchi katika maeneo yao, kusikiliza changamoto zinazowakabili na kuchukua hatua za kuzipatia ufumbuzi.

Ujumbe mkuu ukiwa wazi: Maendeleo ya kweli ni yale yanayomfikia mwananchi, yanayoboresha maisha yake na kumpa fursa ya kushiriki kikamilifu katika uchumi wa Taifa.

#MakamuWaRais #DeogratiusNdejembi #RaisSamia #Tandahimba #Mtwara #SerikaliYaAwamuYaSita #MaendeleoKwaWote

RAIS SAMIA NA ERDOĞAN WAIMARISHA DIPLOMASIA YA TANZANIA NA UTURUKI

ANTALYA, UTURUKI: Uhusiano wa kidiplomasia kati ya Tanzania na Uturuki umeendelea kupewa msukumo katika ngazi ya juu kufuatia mazungumzo kati ya Rais wa Jamhuri ya Muungano wa Tanzania, Mheshimiwa Dkt. Samia Suluhu Hassan, na Rais wa Jamhuri ya Uturuki, Mheshimiwa Recep Tayyip Erdoğan.

Katika mazungumzo hayo yaliyofanyika jijini Antalya, Uturuki, leo tarehe 12 Novemba 2026, viongozi hao wawili waliongoza ujumbe wa nchi zao, ikiwa ni sehemu ya kuendeleza uhusiano wa kirafiki na ushirikiano wa kidiplomasia kati ya mataifa hayo mawili.

Mkutano huo unaakisi umuhimu wa diplomasia ya viongozi wakuu katika kufungua milango ya ushirikiano wa kimataifa, hususan katika maeneo ya biashara, uwekezaji, teknolojia na maendeleo ya kiuchumi.

Kupitia diplomasia ya uchumi, Tanzania inaendelea kujijengea nafasi katika jukwaa la kimataifa, huku uhusiano wake na mataifa mbalimbali ukiwa nyenzo muhimu ya kuvutia fursa za maendeleo.

Kutoka Antalya, Tanzania inaendelea kuimarisha urafiki wa kimataifa na kufungua milango ya fursa mpya za ushirikiano.

#RaisSamia #Tanzania #Uturuki #DiplomasiaYaUchumi #MahusianoYaKimataifa #Antalya2026