DKT. LEKASHINGO: MAFANIKIO YA TUME YA MADINI YAPIMWE KWA MATOKEO, SI IDADI YA SHUGHULI

🔸 Ataka Tume kujikita katika matokeo yanayopimika, uwajibikaji na matumizi yenye tija ya rasilimali za Taifa.

🔸 Asisitiza kuimarishwa kwa mifumo ya ukusanyaji wa maduhuli, usimamizi wa leseni na mazingira ya uwekezaji katika Sekta ya Madini.

📍 DODOMA

Novemba 6, 2026

Mwenyekiti wa Tume ya Madini, Dkt. Janet R. Lekashingo, ameitaka Tume kubadili mtazamo wa kupima mafanikio kwa idadi ya shughuli zilizotekelezwa na badala yake kujikita katika kupima matokeo halisi ya utendaji, ili kuhakikisha usimamizi wa sekta ya madini unaleta tija, unaongeza mapato ya Serikali na kuchangia maendeleo endelevu ya Taifa.

Dkt. Lekashingo ametoa maelekezo hayo wakati wa kikao cha Kamisheni ya Tume ya Madini kilichofanyika jijini Dodoma, Novemba 6, 2026, kwa lengo la kupitia na kujadili taarifa za utekelezaji wa majukumu ya Tume kwa robo ya kwanza ya Mwaka wa Fedha 2026/2027, kutathmini mafanikio na changamoto pamoja na kuweka mikakati ya kuimarisha utendaji wa Tume.

Amesisitiza kuwa Tume inapaswa kuimarisha mfumo wa ufuatiliaji na tathmini unaopima matokeo ya shughuli zinazotekelezwa, badala ya kujikita katika kuripoti idadi ya shughuli zilizofanyika pekee.

"Hatupaswi kupima mafanikio yetu kwa idadi ya leseni tulizotoa, ukaguzi tuliofanya au mikutano tuliyofanya pekee. Tunapaswa kujiuliza, shughuli hizo zimeleta matokeo gani? Zimeongeza uzalishaji kwa kiwango gani? Zimeimarisha usalama migodini kwa kiasi gani? Na zimeongeza manufaa gani kwa wananchi na Taifa kwa ujumla?" amesisitiza Dkt. Lekashingo.

Ameeleza kuwa matarajio ya Serikali kwa Sekta ya Madini ni makubwa, hivyo Tume ina wajibu wa kuhakikisha ukuaji wa sekta unaendana na ongezeko la uzalishaji, uwekezaji wenye tija, ukusanyaji wa maduhuli na manufaa yanayowafikia Watanzania.

Kuhusu ukusanyaji wa maduhuli, Mwenyekiti amesisitiza kuwa mafanikio ya Tume hayapaswi kutazamwa kwa kiwango cha fedha zinazokusanywa pekee, bali pia kwa ufanisi wa mifumo ya usimamizi wa uzalishaji, biashara rasmi ya madini na udhibiti wa mianya ya upotevu wa mapato ya Serikali.

Ameitaka Tume kuendelea kuimarisha mifumo ya ukusanyaji wa maduhuli, kufanya uchambuzi wa vyanzo vya mapato na kuhakikisha mafanikio yanayopatikana yanakuwa endelevu.

Kuhusu uwekezaji, Dkt. Lekashingo ameitaka Tume kuendelea kuboresha mazingira ya uwekezaji kwa kuimarisha utoaji wa huduma kwa wawekezaji wa ndani na nje ya nchi, kuhakikisha taratibu zinakuwa wazi, rahisi, zenye ufanisi na zinazotekelezwa kwa wakati, ili kuvutia na kuwezesha uwekezaji wenye tija, unaozingatia sheria na kulinda maslahi mapana ya Taifa.

Katika hatua nyingine, amewataka watendaji wa Tume kuimarisha ufuatiliaji wa leseni za madini zinazotolewa ili kuhakikisha wamiliki wake wanatekeleza shughuli za utafti, uchimbaji na uzalishaji kwa mujibu wa masharti ya leseni na matakwa ya sheria.

Amesisitiza kuwa mafanikio ya utoaji wa leseni yanapaswa kupimwa kwa kiwango ambacho leseni hizo zinaendelezwa, uwekezaji unaofanyika, ajira zinazozalishwa na mchango wake katika uchumi wa Taifa. Aidha, ameelekeza hatua stahiki zichukuliwe kwa leseni zisizoendelezwa kwa mujibu wa masharti ya sheria, ikiwemo kufutwa kwa leseni pale inapostahili.

Vilevile, amewataka watendaji kuimarisha ukaguzi wa shughuli za uchimbaji wa madini, hususan katika maeneo yenye viashiria vya hatari, pamoja na kutoa elimu kwa wachimbaji kuhusu afya, usalama na utunzaji wa mazingira.

Ameeleza kuwa mafanikio ya ukaguzi hayapaswi kupimwa kwa idadi ya migodi iliyokaguliwa pekee, bali pia kwa kiwango ambacho ukaguzi huo umesaidia kuzuia ajali, kurekebisha kasoro na kuimarisha uzingatiaji wa sheria na kanuni.

Kuhusu Ushirikishwaji wa Watanzania katika Sekta ya Madini, Mwenyekiti amesisitiza umuhimu wa kuhakikisha mipango inayoidhinishwa inaleta matokeo yanayopimika, ikiwemo kuongezeka kwa ajira kwa Watanzania, thamani ya mikataba inayopatikana kwa kampuni za ndani, uhamishaji wa teknolojia na ukuaji wa uwezo wa wazabuni wa Kitanzania.

Aidha, ameitaka Tume kuimarisha uwajibikaji katika matumizi ya fedha na rasilimali, kwa kuhakikisha kila shughuli inayotekelezwa ina malengo yaliyo wazi, viashiria vya kupima mafanikio na matokeo yanayolingana na rasilimali zilizotumika.

"Lengo letu si kukusanya mapato mengi pekee, bali kuhakikisha kila shilingi inayokusanywa, kila leseni inayotolewa na kila uamuzi tunaoufanya unalinda rasilimali za Taifa na kuleta manufaa ya kudumu kwa Watanzania," amesisitiza Dkt. Lekashingo.

Aidha, ameupongeza uongozi na watendaji wa Tume ya Madini Makao Makuu pamoja na Ofisi za Maafisa Madini Wakazi wa Mikoa kwa ushirikiano wao katika kusimamia shughuli za madini na kufanikisha ukusanyaji wa maduhuli ya Serikali.

Akiwasilisha taarifa ya utekelezaji wa majukumu ya Tume kwa robo ya kwanza ya Mwaka wa Fedha 2026/2027, Katibu Mtendaji wa Tume ya Madini, Mhandisi Ramadhani Lwamo, amesema mafanikio yaliyopatikana katika ukusanyaji wa maduhuli yamechangiwa na kupanda kwa bei ya dhahabu, kuongezeka kwa uzalishaji wa madini pamoja na kuimarishwa kwa usimamizi na ukaguzi wa shughuli za madini.

Ameeleza kuwa katika kipindi cha Julai hadi Septemba 2026, Tume imekusanya Shilingi bilioni 411.67, sawa na asilimia 117.12 ya lengo la makusanyo la Shilingi bilioni 351.50 kwa kipindi hicho.

Ameongeza kuwa Tume itaendelea kuimarisha usimamizi wa masoko na vituo vya ununuzi wa madini, utoaji wa elimu kwa wadau, ukaguzi wa shughuli za uchimbaji na biashara ya madini pamoja na udhibiti wa mianya ya upotevu wa mapato ya Serikali.

Katika kikao hicho, Kamati mbalimbali za Tume zimewasilisha taarifa za utekelezaji wa majukumu yake, zikiwemo Kamati ya Ufundi, Kamati ya Ushirikishwaji wa Watanzania katika Sekta ya Madini, Kamati ya Ajira na Usimamizi wa Rasilimaliwatu pamoja na Kamati ya Fedha na Mipango.

Taarifa hizo zimejadiliwa kwa lengo la kutathmini mafanikio na changamoto za utekelezaji, kubaini maeneo yanayohitaji maboresho na kuweka mikakati ya kuimarisha ufanisi, uwajibikaji na matokeo ya usimamizi wa Sekta ya Madini nchini.

RAIS SAMIA AAGANA NA BALOZI WA AFRIKA KUSINI, AZUNGUMZA NA MWEKEZAJI KUTOKA QATAR

 

Mheshimiwa Dkt. Samia Suluhu Hassan, Rais wa Jamhuri ya Muungano wa Tanzania, akiagana na Mhe. Noluthando Mayende-Malepe, Balozi wa Afrika Kusini anayemaliza muda wake nchini Tanzania, Ikulu Jijini Dar es Salaam, tarehe 06 Novemba, 2026.

Mheshimiwa Dkt. Samia Suluhu Hassan, Rais wa Jamhuri ya Muungano wa Tanzania, akiwa kwenye mazungumzo na Mhe. Noluthando Mayende-Malepe, Balozi wa Afrika Kusini anayemaliza muda wake nchini Tanzania, Ikulu Jijini Dar es Salaam, tarehe 06 Novemba, 2026.

Rais wa Jamhuri ya Muungano wa Tanzania, Mhe. Dkt. Samia Suluhu Hassan, leo Novemba 6, 2026, amekutana na kufanya mazungumzo na Balozi wa Jamhuri ya Afrika Kusini nchini, Mhe. Noluthando Mayende-Malepe, anayemaliza muda wake wa utumishi nchini, pamoja na Mwenyekiti wa Kampuni ya Thirty-Five Investment Holding ya Doha, Qatar, Dkt. Khalid bin Mohammed bin Abdullah Al Attiyah, Ikulu jijini Dar es Salaam.

Katika mazungumzo na Balozi Mayende-Malepe, Rais Samia amempongeza kwa kukamilisha muda wake wa utumishi nchini na kumshukuru kwa mchango wake katika kuimarisha uhusiano wa kidiplomasia, biashara na uwekezaji kati ya Tanzania na Afrika Kusini.

Kwa upande wake, Balozi Mayende-Malepe amemshukuru Rais Samia, Serikali na wananchi wa Tanzania kwa ushirikiano na ukarimu alioupata katika kipindi chote cha utumishi wake, akieleza kuwa Tanzania imekuwa na nafasi ya kipekee katika maisha yake kutokana na uhusiano wa kihistoria na kindugu kati ya mataifa hayo mawili.

Aidha, Balozi huyo amepongeza mchango wa Tanzania katika masuala ya kikanda na kimataifa na kuyakaribisha makampuni ya Tanzania kutumia fursa za biashara na uwekezaji nchini Afrika Kusini.

Rais Samia ameeleza kuwa biashara kati ya Tanzania na Afrika Kusini imeongezeka katika kipindi cha utumishi wa Balozi huyo, huku akisisitiza umuhimu wa kuendeleza ushirikiano huo kwa manufaa ya nchi zote mbili.

Katika hatua nyingine, Rais Samia amefanya mazungumzo na Dkt. Khalid Al Attiyah kuhusu fursa za uwekezaji nchini Tanzania, hususan katika sekta za kilimo, ufugaji, uvuvi na miundombinu ya usafiri.

Dkt. Al Attiyah ameeleza nia ya kampuni yake kuwekeza katika uzalishaji wa sukari na ufugaji wa ng'ombe katika eneo la Kongwa mkoani Dodoma, pamoja na uvuvi wa bahari kuu, uchakataji na uhifadhi wa samaki katika Bandari ya Uvuvi Kilwa.

Vilevile, kampuni hiyo inatathmini fursa za uwekezaji katika miundombinu ya usafiri Zanzibar, ambapo majadiliano ya awali tayari yameanza kati ya wawakilishi wa kampuni na wataalamu wa taasisi husika.

Rais Samia amezitaka taasisi zinazohusika kuendeleza majadiliano hayo kwa kuzingatia sheria, taratibu na kanuni zilizopo ili kubaini miradi inayoweza kutekelezwa kwa manufaa ya pande zote.

Mazungumzo hayo yameonesha dhamira ya kuendelea kuimarisha uhusiano wa kimataifa, kupanua ushirikiano wa kibiashara na kuvutia uwekezaji katika sekta mbalimbali za uchumi nchini.

POSTA TANZANIA YASHIRIKI MKUTANO WA MWAKA WA PMI, YAWASILISHA UZOEFU WAKE WA USIMAMIZI WA MIRADI

Shirika la Posta Tanzania (TPC) limeendelea kuonesha mchango wake katika kuimarisha usimamizi na utekelezaji wa miradi kwa kushiriki Mkutano wa Mwaka wa Taasisi ya Wataalamu wa Usimamizi wa Miradi Tanzania (PMI Tanzania Project Management Week & Annual Conference 2026), uliofanyika Novemba 5, 2026, katika ukumbi wa mikutano wa Cate Hotel, mkoani Morogoro.

Mkutano huo ulilenga kuwakutanisha wataalamu wa usimamizi wa miradi, viongozi wa taasisi mbalimbali na wadau wengine kwa ajili ya kubadilishana maarifa, uzoefu, ubunifu na kujadili namna bora ya kuimarisha usimamizi na utekelezaji wa miradi nchini.

Katika mkutano huo, Shirika la Posta Tanzania lilipata nafasi ya kushiriki katika mjadala wa jopo (Panel Discussion) uliokuwa na mada isemayo “Project Management Office in the Public Sector” (Ofisi ya Usimamizi wa Miradi katika Taasisi za Umma), ambapo Meneja wa Ofisi ya Miradi wa Shirika la Posta Tanzania, Bw. Seleman Daffy, alikuwa mzungumzaji (Speaker), huku Mjumbe wa Bodi na Makamu wa Rais wa Masuala ya Wanaojitolea wa Jumuiya ya Wataalamu wa Usimamizi wa Miradi Tanzania, Bi. Rahma Kova, akiwa msimamizi wa mjadala huo (Moderator).

Akizungumza mara baada ya kushiriki mjadala huo, Bw. Daffy amesema, majadiliano hayo yalikuwa na manufaa makubwa, kwani yalitoa fursa ya kubadilishana uzoefu na kuonesha umuhimu wa taasisi za umma na binafsi kuwa na ofisi maalumu za usimamizi wa miradi.

Amesema kupitia mjadala huo, imeonekana kuwa taasisi nyingine zinaweza kujifunza kutokana na uzoefu wa Shirika la Posta Tanzania katika kutekeleza mfumo huo wa usimamizi wa miradi.

Kwa upande wake, Bi. Rahma Kova, amesema Posta ilipewa nafasi hiyo kutokana na kutambuliwa kwake kama miongoni mwa taasisi chache zenye ofisi maalumu ya usimamizi wa miradi, hivyo uzoefu wake ulikuwa muhimu kushirikishwa na wataalamu wengine waliohudhuria mkutano huo.

Kupitia ushiriki huo, Shirika la Posta Tanzania limepata fursa ya kutangaza uzoefu wake katika usimamizi wa miradi na kushiriki katika mijadala ya kitaalamu inayolenga kuimarisha utendaji wa taasisi, matumizi bora ya rasilimali na utekelezaji wenye tija wa miradi kwa maendeleo ya Taifa.

SERENGETI KUWA MWENYEJI WA TUZO ZA DUNIA ZA UTALII (WORLD TRAVEL AWARDS)

London, Uingereza, Novemba 5, 2026

Tanzania imeendelea kuimarisha nafasi yake katika ramani ya utalii duniani baada ya kutangazwa kuwa mwenyeji wa hafla ya utoaji wa Tuzo za Dunia za Utalii (World Travel Awards – WTA) kwa mwaka 2026, zitakazofanyika Desemba 12, 2026 katika Hifadhi ya Taifa ya Serengeti.

Tangazo hilo limetolewa Novemba 5, 2026 na Mwanzilishi na Rais wa World Travel Awards, Bw. Graham Cooke, wakati wa hafla maalumu iliyofanyika katika kilele cha Maonesho ya Kimataifa ya Utalii ya World Travel Market (WTM) jijini London, Uingereza.

Akizungumza katika hafla hiyo, Bw. Cooke amesema Tanzania imechaguliwa kutokana na upekee wake katika sekta ya utalii, akibainisha kuwa Serengeti ni moja ya majina makubwa yanayotambulika barani Afrika na duniani kutokana na utajiri wake wa wanyamapori na vivutio vya kipekee.

Ameongeza kuwa uwepo wa Mlima Kilimanjaro, ambao ni mlima mrefu zaidi barani Afrika, pamoja na uzuri wa vivutio vya asili na ukarimu wa Watanzania, ni miongoni mwa sababu zilizoifanya Tanzania kuwa chaguo sahihi la kuandaa tukio hilo la kimataifa.

Kwa upande wake, Waziri wa Maliasili na Utalii, Mhe. Dkt. Ashatu Kijaji (Mb), amemshukuru Bw. Cooke na taasisi ya World Travel Awards kwa kuichagua Tanzania kuwa mwenyeji wa hafla hiyo muhimu, akieleza kuwa nchi ipo tayari kuhakikisha wageni kutoka sehemu mbalimbali duniani wanapata uzoefu wa kipekee wa utalii wa Tanzania.

Amesema Serengeti nayo ipo tayari kupokea wageni zaidi ya 500 wanaotarajiwa kuhudhuria hafla hiyo kutoka mataifa mbalimbali duniani, huku akisisitiza kuwa tukio hilo ni fursa muhimu ya kuitangaza Tanzania, kuongeza muonekanowake kimataifa na kuimarisha nafasi yake katika soko la utalii duniani.

Aidha, Dkt. Kijaji ametoa shukrani kwa Rais wa Jamhuri ya Muungano wa Tanzania, Mhe. Dkt. Samia Suluhu Hassan, kwa juhudi na uongozi wake katika kuifungua Tanzania na kuimarisha diplomasia, akisema kazi kubwa inayofanyika chini ya uongozi wake imechangia kwa kiasi kikubwa kuitangaza Tanzania na kuiweka katika nafasi nzuri zaidi katika jukwaa la kimataifa la utalii.

Hafla hiyo ilihudhuriwa pia na Katibu Mkuu wa Wizara ya Maliasili na Utalii Dkt. Hassan Abbasi na Mkurugenzi Mkuu wa Bodi ya Utalii Tanzania, Dkt. Thereza Mugobi.

DKT. MWIGULU AKUTANA NA WAZIRI MKUU WA DRC

WAZIRI MKUU Dkt. Mwigulu Nchemba amekutana na Waziri Mkuu wa Jamhuri ya Kidemkorasi ya Kongo (DRC), Judith Suminwa Tuluka na wamejadiliana njia mbalimbali za kuimarisha uchumi baina ya nchi hizo mbili.

Katika mazungumzo yao yaliyofanyika ofisini kwake Mlimwa, jijini Dodoma leo (Jumatano, Novemba 04, 2026), Dkt, Mwigulu amesema Tanzania na DRC zina fursa ya kukuza ushirikiano wa kiuchumi katika nyanja mbalimbali ikiwemo madini, usafirishaji na uchukuzi, chakula na utoaji wa huduma za afya.

“Bado kuna fursa kubwa ya kukuza ushirikiano wa kiuchumi kati ya mataifa yetu mawili. Kama ujuavyo, Tanzania na DRC ni mataifa yaliyobarikiwa kuwa na utajiri mkubwa, ikiwemo madini, ardhi yenye rutuba, misitu, maziwa na mito.”

Akielezea uwepo wa fursa za kibiashara, Waziri Mkuu Mwigulu amesema nchi hizo bado zinaweza kuongeza kiwango cha sasa  cha biashara ikiwa watahamasisha sekta binafsi kutumia fursa zinazotolewa na mifumo ya kikanda na ya bara. “Tanzania na DRC tuna nafasi chanya nyingi za kufanya biashara zaidi. Tutawatuma mawaziri wa sekta zinazohusika ili waendelee kukutana na kukamilisha hayo masuala,” amesema.

Dkt. Mwigulu amesema DRC ni mtumiaji namba moja wa Bandari ya Dar es Salaam, ikiwa na mchango wa asilimia 48 ya shehena yote ya mizigo ya nchi zisizo na bandari na akatumia  fursa hiyo kumpongeza Waziri Mkuu wa DRC kwa kutenga muda na kutembelea bandari hiyo.

“Nimefurahi kwenye ziara hii umepata fursa ya kutembelea Bandari ya Dar es Salaam na Bandari Kavu ya Kwala, ambako tumetoa eneo kubwa kwa DRC. Kipekee nitumie fursa hii kuipongeza Serikali ya DRC kwa uamuzi wake wa kujenga barabara kutoka Lubumbashi kuja Kalemie. Hatua hii itafungua fursa za kibiashara kwa upande wa Tanzania,” amesema.

Kwa upande wake, Waziri Mkuu wa DRC, Judith Suminwa Tuluka aliishukuru Serikali ya Tanzania kwa misaada yote iliyoipatia nchi hiyo ikiwemo ya kijeshi, kutunza wakimbizi na vyakula na vifaa tiba wakati nchi hiyo ilipopata maafa.

“Tunaishukuru na Serikali ya Tanzania na hasa Mheshimiwa Rais Samia Suluhu Hassan ambaye kupitia vikao mbalimbali vya kikanda na kimataifa alipambana na kuisaidia Jamhuri ya Kidemokrasi ya Kongo iweze kubaki na amani,” alisema na kuongeza:

“Hatuwezi kuisahau Tanzania kwa kuwapokea na kuwapa hifadhi wakimbizi zaidi ya 90,000 wakati nchi yetu ilipokuwa inapambana na Rwanda. Tunaishukuru sana Tanznaia kwa mshikamano huo.”

Akielezea mafanikio ya nchi hiyo, alisema wamefanya mageuzi ya kiuchumi kupitia programu mbalimbali za ndani na nje. “Tumefanya mageuzi katika mfumo wetu wa kifedha na tukafanikiwa kujenga imani yetu kwenye medani za kimataifa. Faranga imepanda thamni ikilinganishwa na dola ya Marekani. Wakati naingia ofisini Juni 2024, dola moja ya Marekani ilikuwa sawa na Faranga 3,000 lakini hivi sasa dola moja ni sawa na Faranga 2,250.”

Alisema kutokana na hali hiyo, nchi yao imefanikiwa mikopo ya Dola za Marekani milioni moja na imeanza kujiondoa kwenye orodha ya nchi zenye madeni chechefu. “DRC kwa sasa ina imani chanya katika ngazi ya kimataifa,” alisisitiza

WAZIRI MKUU WA DRC AVUTIWA NA MJI WA SERIKALI MTUMBA, ASEMA NI FUNZO KWA UJENZI WA MJI WA SERIKALI KINSHASA

Waziri Mkuu wa Jamhuri ya Kidemokrasia ya Congo (DRC), Mhe. Judith Suminwa Tuluka, amesema nchi yake imepata fursa ya kujifunza uzoefu wa Tanzania katika ujenzi wa Mji wa Serikali Mtumba jijini Dodoma, ambao utakuwa chachu ya kuendeleza mipango ya ujenzi wa mji wa Serikali katika mji mkuu wa Kinshasa.

Mhe. Judith ameyasema hayo leo Novemba 4, 2026, jijini Dodoma, mara baada ya kutembelea Mji wa Serikali Mtumba na kukagua eneo lililotengwa kwa ajili ya ujenzi wa Ubalozi wa Jamhuri ya Kidemokrasia ya Congo katika eneo hilo.

Ameshukuru ushirikiano unaoendelea kuimarishwa kati ya Tanzania na DRC, akieleza kuwa kupitia ushirikiano huo wamepata fursa ya kujifunza mambo mbalimbali yatakayosaidia katika utekelezaji wa mipango ya maendeleo ya nchi yao.

Aidha, ameupongeza Ubalozi wa Tanzania nchini DRC kwa kuendelea kuwa karibu na nchi hiyo, akibainisha kuwa hata baada ya kuteuliwa kushika nafasi ya Waziri Mkuu, ubalozi huo ulikuwa miongoni mwa taasisi za kwanza kumpongeza.

Kwa upande wake, Waziri wa Mawasiliano na Teknolojia ya Habari, Mhe. Anjela Kairuki, amesema Tanzania imefurahishwa na ziara hiyo, akieleza kuwa uhusiano kati ya Tanzania na Jamhuri ya Kidemokrasia ya Congo ni wa muda mrefu na nchi hizo zimekuwa na udugu unaozipa nafasi ya kuendeleza ushirikiano katika maeneo mbalimbali.

Amesisitiza kuwa Tanzania ipo tayari kuendelea kushirikiana na DRC katika masuala mbalimbali ya maendeleo kulingana na uwezo na fursa zilizopo.

Waziri Mkuu Judith Suminwa Tuluka ameambatana na ujumbe wake, ukiwemo wa Waziri wa Ujenzi wa Jamhuri ya Kidemokrasia ya Congo, Bwana John Banza Lunda.

Ziara hiyo ni sehemu ya kuimarisha ushirikiano wa Tanzania na DRC, hususan katika kubadilishana uzoefu wa utekelezaji wa miradi ya maendeleo na mipango ya ujenzi wa miundombinu ya Serikali.

TANZANIA NA UGANDA ZAIMARISHA USHIRIKIANO, MRADI WA BOMBA LA MAFUTA EACOP WAPEWA MSUKUMO MPYA!

Makamu wa Rais wa Jamhuri ya Muungano wa Tanzania, Mhe. Deogratius Ndejembi, kwa niaba ya Rais Mhe. Dkt. Samia Suluhu Hassan, amekutana na kufanya mazungumzo na Rais wa Uganda, Mhe. Yoweri Kaguta Museveni, kuhusu maendeleo ya ujenzi wa Bomba la Mafuta Ghafi la Afrika Mashariki (EACOP).

Mazungumzo hayo yaliyofanyika Ikulu ya Entebbe nchini Uganda yamejikita katika kuimarisha ushirikiano wa kimkakati kati ya mataifa hayo mawili, hususan katika utekelezaji wa mradi wa EACOP unaounganisha Hoima nchini Uganda na Chongoleani, Tanga nchini Tanzania.

Mradi huo ni hatua muhimu katika kukuza ushirikiano wa kiuchumi na uwekezaji katika sekta ya nishati, huku ukitarajiwa kufungua fursa za ajira, biashara na maendeleo kwa wananchi wa nchi zote mbili.

Katika mazungumzo hayo, Makamu wa Rais ameambatana na viongozi waandamizi wa Serikali, akiwemo Naibu Waziri wa Mambo ya Nje na Ushirikiano wa Afrika Mashariki, Dkt. Ngwaru Maghembe, Balozi wa Tanzania nchini Uganda, Meja Jenerali Marco Gaguti, pamoja na viongozi wa Wizara ya Nishati na Shirika la Maendeleo ya Petroli Tanzania (TPDC).

EACOP si bomba la mafuta pekee, bali ni daraja la ushirikiano, uwekezaji na fursa mpya za kiuchumi kati ya Tanzania na Uganda!