DKT. MWIGULU AKUTANA NA WAZIRI MKUU WA DRC

WAZIRI MKUU Dkt. Mwigulu Nchemba amekutana na Waziri Mkuu wa Jamhuri ya Kidemkorasi ya Kongo (DRC), Judith Suminwa Tuluka na wamejadiliana njia mbalimbali za kuimarisha uchumi baina ya nchi hizo mbili.

Katika mazungumzo yao yaliyofanyika ofisini kwake Mlimwa, jijini Dodoma leo (Jumatano, Novemba 04, 2026), Dkt, Mwigulu amesema Tanzania na DRC zina fursa ya kukuza ushirikiano wa kiuchumi katika nyanja mbalimbali ikiwemo madini, usafirishaji na uchukuzi, chakula na utoaji wa huduma za afya.

“Bado kuna fursa kubwa ya kukuza ushirikiano wa kiuchumi kati ya mataifa yetu mawili. Kama ujuavyo, Tanzania na DRC ni mataifa yaliyobarikiwa kuwa na utajiri mkubwa, ikiwemo madini, ardhi yenye rutuba, misitu, maziwa na mito.”

Akielezea uwepo wa fursa za kibiashara, Waziri Mkuu Mwigulu amesema nchi hizo bado zinaweza kuongeza kiwango cha sasa  cha biashara ikiwa watahamasisha sekta binafsi kutumia fursa zinazotolewa na mifumo ya kikanda na ya bara. “Tanzania na DRC tuna nafasi chanya nyingi za kufanya biashara zaidi. Tutawatuma mawaziri wa sekta zinazohusika ili waendelee kukutana na kukamilisha hayo masuala,” amesema.

Dkt. Mwigulu amesema DRC ni mtumiaji namba moja wa Bandari ya Dar es Salaam, ikiwa na mchango wa asilimia 48 ya shehena yote ya mizigo ya nchi zisizo na bandari na akatumia  fursa hiyo kumpongeza Waziri Mkuu wa DRC kwa kutenga muda na kutembelea bandari hiyo.

“Nimefurahi kwenye ziara hii umepata fursa ya kutembelea Bandari ya Dar es Salaam na Bandari Kavu ya Kwala, ambako tumetoa eneo kubwa kwa DRC. Kipekee nitumie fursa hii kuipongeza Serikali ya DRC kwa uamuzi wake wa kujenga barabara kutoka Lubumbashi kuja Kalemie. Hatua hii itafungua fursa za kibiashara kwa upande wa Tanzania,” amesema.

Kwa upande wake, Waziri Mkuu wa DRC, Judith Suminwa Tuluka aliishukuru Serikali ya Tanzania kwa misaada yote iliyoipatia nchi hiyo ikiwemo ya kijeshi, kutunza wakimbizi na vyakula na vifaa tiba wakati nchi hiyo ilipopata maafa.

“Tunaishukuru na Serikali ya Tanzania na hasa Mheshimiwa Rais Samia Suluhu Hassan ambaye kupitia vikao mbalimbali vya kikanda na kimataifa alipambana na kuisaidia Jamhuri ya Kidemokrasi ya Kongo iweze kubaki na amani,” alisema na kuongeza:

“Hatuwezi kuisahau Tanzania kwa kuwapokea na kuwapa hifadhi wakimbizi zaidi ya 90,000 wakati nchi yetu ilipokuwa inapambana na Rwanda. Tunaishukuru sana Tanznaia kwa mshikamano huo.”

Akielezea mafanikio ya nchi hiyo, alisema wamefanya mageuzi ya kiuchumi kupitia programu mbalimbali za ndani na nje. “Tumefanya mageuzi katika mfumo wetu wa kifedha na tukafanikiwa kujenga imani yetu kwenye medani za kimataifa. Faranga imepanda thamni ikilinganishwa na dola ya Marekani. Wakati naingia ofisini Juni 2024, dola moja ya Marekani ilikuwa sawa na Faranga 3,000 lakini hivi sasa dola moja ni sawa na Faranga 2,250.”

Alisema kutokana na hali hiyo, nchi yao imefanikiwa mikopo ya Dola za Marekani milioni moja na imeanza kujiondoa kwenye orodha ya nchi zenye madeni chechefu. “DRC kwa sasa ina imani chanya katika ngazi ya kimataifa,” alisisitiza

WAZIRI MKUU WA DRC AVUTIWA NA MJI WA SERIKALI MTUMBA, ASEMA NI FUNZO KWA UJENZI WA MJI WA SERIKALI KINSHASA

Waziri Mkuu wa Jamhuri ya Kidemokrasia ya Congo (DRC), Mhe. Judith Suminwa Tuluka, amesema nchi yake imepata fursa ya kujifunza uzoefu wa Tanzania katika ujenzi wa Mji wa Serikali Mtumba jijini Dodoma, ambao utakuwa chachu ya kuendeleza mipango ya ujenzi wa mji wa Serikali katika mji mkuu wa Kinshasa.

Mhe. Judith ameyasema hayo leo Novemba 4, 2026, jijini Dodoma, mara baada ya kutembelea Mji wa Serikali Mtumba na kukagua eneo lililotengwa kwa ajili ya ujenzi wa Ubalozi wa Jamhuri ya Kidemokrasia ya Congo katika eneo hilo.

Ameshukuru ushirikiano unaoendelea kuimarishwa kati ya Tanzania na DRC, akieleza kuwa kupitia ushirikiano huo wamepata fursa ya kujifunza mambo mbalimbali yatakayosaidia katika utekelezaji wa mipango ya maendeleo ya nchi yao.

Aidha, ameupongeza Ubalozi wa Tanzania nchini DRC kwa kuendelea kuwa karibu na nchi hiyo, akibainisha kuwa hata baada ya kuteuliwa kushika nafasi ya Waziri Mkuu, ubalozi huo ulikuwa miongoni mwa taasisi za kwanza kumpongeza.

Kwa upande wake, Waziri wa Mawasiliano na Teknolojia ya Habari, Mhe. Anjela Kairuki, amesema Tanzania imefurahishwa na ziara hiyo, akieleza kuwa uhusiano kati ya Tanzania na Jamhuri ya Kidemokrasia ya Congo ni wa muda mrefu na nchi hizo zimekuwa na udugu unaozipa nafasi ya kuendeleza ushirikiano katika maeneo mbalimbali.

Amesisitiza kuwa Tanzania ipo tayari kuendelea kushirikiana na DRC katika masuala mbalimbali ya maendeleo kulingana na uwezo na fursa zilizopo.

Waziri Mkuu Judith Suminwa Tuluka ameambatana na ujumbe wake, ukiwemo wa Waziri wa Ujenzi wa Jamhuri ya Kidemokrasia ya Congo, Bwana John Banza Lunda.

Ziara hiyo ni sehemu ya kuimarisha ushirikiano wa Tanzania na DRC, hususan katika kubadilishana uzoefu wa utekelezaji wa miradi ya maendeleo na mipango ya ujenzi wa miundombinu ya Serikali.

TANZANIA NA UGANDA ZAIMARISHA USHIRIKIANO, MRADI WA BOMBA LA MAFUTA EACOP WAPEWA MSUKUMO MPYA!

Makamu wa Rais wa Jamhuri ya Muungano wa Tanzania, Mhe. Deogratius Ndejembi, kwa niaba ya Rais Mhe. Dkt. Samia Suluhu Hassan, amekutana na kufanya mazungumzo na Rais wa Uganda, Mhe. Yoweri Kaguta Museveni, kuhusu maendeleo ya ujenzi wa Bomba la Mafuta Ghafi la Afrika Mashariki (EACOP).

Mazungumzo hayo yaliyofanyika Ikulu ya Entebbe nchini Uganda yamejikita katika kuimarisha ushirikiano wa kimkakati kati ya mataifa hayo mawili, hususan katika utekelezaji wa mradi wa EACOP unaounganisha Hoima nchini Uganda na Chongoleani, Tanga nchini Tanzania.

Mradi huo ni hatua muhimu katika kukuza ushirikiano wa kiuchumi na uwekezaji katika sekta ya nishati, huku ukitarajiwa kufungua fursa za ajira, biashara na maendeleo kwa wananchi wa nchi zote mbili.

Katika mazungumzo hayo, Makamu wa Rais ameambatana na viongozi waandamizi wa Serikali, akiwemo Naibu Waziri wa Mambo ya Nje na Ushirikiano wa Afrika Mashariki, Dkt. Ngwaru Maghembe, Balozi wa Tanzania nchini Uganda, Meja Jenerali Marco Gaguti, pamoja na viongozi wa Wizara ya Nishati na Shirika la Maendeleo ya Petroli Tanzania (TPDC).

EACOP si bomba la mafuta pekee, bali ni daraja la ushirikiano, uwekezaji na fursa mpya za kiuchumi kati ya Tanzania na Uganda!

NCHI ZA EAC ZATAKIWA KUJIPANGA KUKABILIANA NA ATHARI ZA EL NIÑO

Na Mwandishi Wetu – Nairobi, Kenya

Nchi wanachama wa Jumuiya ya Afrika Mashariki (EAC) zimetakiwa kuimarisha ushirikiano na kuchukua hatua za haraka kukabiliana na athari zinazoweza kusababishwa na mvua kubwa za El Niño, zikiwemo mafuriko, maporomoko ya ardhi, uharibifu wa miundombinu na kuathirika kwa biashara na maisha ya kawaida ya wananchi.

Wito huo umetolewa wakati wa ufunguzi wa Mkutano wa Dharura wa Wataalamu wa Sekta Mbalimbali kuhusu Maandalizi na Mwitikio wa Kikanda dhidi ya Mvua Zinazotarajiwa za El Niño Kali, unaofanyika Nairobi, Kenya, kuanzia Novemba 4 hadi 6, 2026.

Ujumbe wa Tanzania katika mkutano huo wa wataalamu  umeongozwa na Mkurugenzi wa Idara ya Menejimenti ya Maafa Ofisi ya Waziri Mkuu (Sera, Bunge, Uratibu na Wenye Ulemavu), Brigedia Jenerali Hosea Ndagala.

Akifungua mkutano huo Mratibu wa Mradi wa Pamoja wa Sekta Mbalimbali wa Usalama wa Chakula na Lishe wa Uganda, Bw.Julius Twinamatsiko amesema utabiri unaonesha uwezekano wa mvua kunyesha kwa kiwango kikubwa kuliko kawaida katika kipindi cha Oktoba hadi Desemba 2026, hali inayohitaji maandalizi ya haraka na hatua za pamoja.

Amezitaka nchi wanachama kubaini maeneo hatarishi katika miundombinu ya usafirishaji, kuandaa njia mbadala, kuhakikisha upatikanaji wa chakula na malisho ya mifugo, pamoja na kuimarisha huduma za afya na ufuatiliaji wa magonjwa yanayoweza kuenea kutokana na mafuriko.

Kwa upande wake, mwakilishi wa Sekretarieti ya EAC amesisitiza kuwa athari za El Niño zinaweza kuhatarisha amani, usalama na maendeleo ya kiuchumi, hivyo juhudi za kila nchi zinapaswa kuunganishwa kupitia mpango wa pamoja wa kikanda.

Mkutano huo unalenga kutathmini uwezo wa nchi wanachama kukabiliana na athari zinazotarajiwa, kubaini mapungufu na kuandaa mpango wa uratibu wa kikanda utakaosaidia kulinda maisha ya wananchi, huduma muhimu na shughuli za biashara katika Afrika Mashariki.

WAZIRI MKUU AAGIZA TAASISI ZA UMMA ZITUMIE BIDHAA ZA NDANI

 

▪️︎ Ataka mianya ya sheria inayokwamisha matumizi yake irekebishwe

▪️︎ Asisitiza kuheshimiwa kwa sekta binafsi na mitaji ya wawekezaji

WAZIRI MKUU Dkt. Mwigulu Nchemba amezitaka taasisi za umma kutumia bidhaa zinazozalishwa nchini katika ujenzi, ununuzi wa samani na mahitaji mengine, akisisitiza kuwa hatua hiyo ni muhimu katika kukuza viwanda, kulinda ajira na kuongeza mapato ya Taifa.

Ametoa maelekezo hayo leo (Jumatano, Novemba 4, 2026), wakati akimwakilisha Mheshimiwa Rais Dkt. Samia Suluhu Hassan katika uzinduzi wa Sera ya Maendeleo Endelevu ya Viwanda ya Mwaka 2025 na Sera ya Maendeleo ya Jasiriamali Ndogo na za Kati ya Mwaka 2003 (Toleo la Mwaka 2025), katika Ukumbi wa Jakaya Kikwete, Dodoma.

“Na jambo hili lianzie serikalini. Hata serikalini tunajenga majengo, tutumie bidhaa zinazozalishwa hapa nchini,” amesema.

Dkt. Mwigulu ametaja vioo, nondo, marumaru na samani kuwa miongoni mwa bidhaa zinazozalishwa nchini ambazo taasisi za umma zinapaswa kutumia, akisisitiza kuwa Serikali lazima iongoze kwa vitendo katika kutekeleza sera inazozitunga.

“Tumeweka sera, kwa hiyo lazima tuyaishi maneno yetu,” amesema.

Aidha, Waziri Mkuu ametaka sheria ziangaliwe na kurekebishwa iwapo zina mianya inayokwamisha matumizi ya bidhaa za ndani au kutoa nafasi ya kukwepa utekelezaji wa maelekezo hayo.

Amesema jitihada za kujenga viwanda haziwezi kuleta matokeo yaliyokusudiwa ikiwa bidhaa zinazozalishwa hazitumiki, kwa kuwa kukosekana kwa soko kunapunguza uzalishaji, ajira na mapato.

“Tutumie bidhaa zinazozalishwa nchini kwa kujiamini, kufurahia na kujivunia, ili kulinda viwanda vyetu, ajira na mapato ya nchi yetu, pamoja na kukuza uchumi,” amesema.

Katika hatua nyingine, Dkt. Mwigulu amewataka watendaji wa Serikali kubadili mtazamo kuhusu sekta binafsi na kuitambua kuwa mshirika muhimu katika kujenga uchumi unaojitegemea.

Amesisitiza umuhimu wa kuheshimu mitaji na uwekezaji, pamoja na kuendeleza mazingira yanayoiwezesha sekta binafsi kushiriki kikamilifu katika maendeleo ya nchi.

Kuhusu utekelezaji wa sera zilizozinduliwa, Dkt. Mwigulu ameielekeza Wizara ya Viwanda na Biashara kuandaa mikakati thabiti, kufanya ufuatiliaji na tathmini, pamoja na kushirikiana na wizara za kisekta na sekta binafsi kuhakikisha malengo yanafikiwa.

Pia, ameitaka wizara kusimamia na kuratibu minyororo ya thamani ili kuwezesha jasiriamali ndogo na za kati kuzalisha malighafi na kutoa huduma zinazohitajika viwandani.

Akifikisha salamu za Mheshimiwa Rais, Waziri Mkuu amesema Serikali itaendelea kuimarisha mazingira ya biashara na uwekezaji, pamoja na kuboresha miundombinu ya nishati, maji, barabara na reli ili kuongeza uwezo wa viwanda kushindana katika masoko ya kikanda na kimataifa.

Kwa upande wake, Waziri wa Viwanda na Biashara, Judith Kapinga, amesema wizara imeandaa mkakati wa utekelezaji wa miaka kumi wenye shabaha za kila mwaka, ambazo zitafuatiliwa na kutathminiwa ili kuhakikisha sera hizo zinaleta matokeo.

Amesema utekelezaji huo utawapa nafasi jasiriamali ndogo na za kati na kupanua masoko ya bidhaa zinazozalishwa nchini, hususan katika masoko ya kikanda na Afrika.

Naye Waziri wa Nchi, Ofisi ya Rais, Mipango na Uwekezaji, Profesa Kitila Mkumbo, amesema sera hizo zinaendana na Dira ya Taifa ya Maendeleo 2050 na ni nyenzo muhimu za utekelezaji wake.

“Tusije tukatoka hapa tukasherehekea tumepata sera. Sherehe kubwa ni kuibadilisha sera hii kuwa maisha bora kwa Watanzania,” amesema.

RAIS SAMIA ATOA MAAGIZO MAZITO KWA TUME YA USULUHISHI WA MIGOGORO YA KAZI, ASISITIZA HAKI KWA WAFANYAKAZI NA WAAJIRI

Mheshimiwa Dkt. Samia Suluhu Hassan, Rais wa Jamhuri ya Muungano wa Tanzania, akimuapisha Ndugu Angelina Lubala Mabula kuwa Mkuu wa Mkoa wa Tabora kwenye hafla iliyofanyika Ikulu ya Chamwino Mkoani Dodoma, tarehe 02 Novemba, 2026.

Mheshimiwa Dkt. Samia Suluhu Hassan, Rais wa Jamhuri ya Muungano wa Tanzania, akimuapisha Ndugu Angelina Lubala Mabula kuwa Mkuu wa Mkoa wa Tabora kwenye hafla iliyofanyika Ikulu ya Chamwino Mkoani Dodoma, tarehe 02 Novemba, 2026.

Mheshimiwa Dkt. Samia Suluhu Hassan, Rais wa Jamhuri ya Muungano wa Tanzania, akimuapisha Ndugu Danford George Mpelumbe kuwa Mwenyekiti wa Tume ya Haki za Binadamu na Utawala Bora kwenye hafla iliyofanyika Ikulu ya Chamwino Mkoani Dodoma, tarehe 02 Novemba, 2026.

Mheshimiwa Dkt. Samia Suluhu Hassan, Rais wa Jamhuri ya Muungano wa Tanzania, akimuapisha Ndugu Omar Ali Omar Bhai kuwa Makamu Mwenyekiti wa Tume ya Haki za Binadamu na Utawala Bora kwenye hafla iliyofanyika Ikulu ya Chamwino Mkoani Dodoma, tarehe 02 Novemba, 2026.

Mheshimiwa Dkt. Samia Suluhu Hassan, Rais wa Jamhuri ya Muungano wa Tanzania, akimuapisha Jaji Mstaafu Wilfred Peter Dyansobera kuwa Mwenyekiti wa Tume ya Usuluhishi na Uamuzi kwenye hafla iliyofanyika Ikulu ya Chamwino Mkoani Dodoma, tarehe 02 Novemba, 2026.

Mheshimiwa Dkt. Samia Suluhu Hassan, Rais wa Jamhuri ya Muungano wa Tanzania, akimuapisha Ndugu Paul Thomas Kadushi kuwa Kamishna wa Tume ya Usuluhishi na Uamuzi kwenye hafla iliyofanyika Ikulu ya Chamwino Mkoani Dodoma, tarehe 02 Novemba, 2026.

Mheshimiwa Dkt. Samia Suluhu Hassan, Rais wa Jamhuri ya Muungano wa Tanzania, akimuapisha Ndugu Felister Emmanuel Shuli kuwa Kamishna wa Tume ya Usuluhishi na Uamuzi kwenye hafla iliyofanyika Ikulu ya Chamwino Mkoani Dodoma, tarehe 02 Novemba, 2026.

Mheshimiwa Dkt. Samia Suluhu Hassan, Rais wa Jamhuri ya Muungano wa Tanzania, akimuapisha Dkt. Alhaji Almas Seleman kuwa Kamishna wa Tume ya Usuluhishi na Uamuzi kwenye hafla iliyofanyika Ikulu ya Chamwino Mkoani Dodoma, tarehe 02 Novemba, 2026.

 Mheshimiwa Dkt. Samia Suluhu Hassan, Rais wa Jamhuri ya Muungano wa Tanzania, akimuapisha Ndugu Mwanaidi Shomari Mgowa kuwa Kamishna wa Tume ya Usuluhishi na Uamuzi kwenye hafla iliyofanyika Ikulu ya Chamwino Mkoani Dodoma, tarehe 02 Novemba, 2026.

Dodoma, Novemba 2, 2026. Rais wa Jamhuri ya Muungano wa Tanzania, Mhe. Dkt. Samia Suluhu Hassan, ameitaka Tume ya Usuluhishi na Uamuzi kuhakikisha migogoro ya kazi inatatuliwa kwa haki, usawa na bila upendeleo, huku akisisitiza umuhimu wa kulinda maslahi ya wafanyakazi na waajiri katika mazingira ya ukuaji wa sekta binafsi nchini.

Rais Samia ametoa maelekezo hayo leo, wakati wa hafla ya kuwaapisha viongozi mbalimbali aliowateua hivi karibuni, iliyofanyika Ikulu ya Chamwino, mkoani Dodoma.

Amesisitiza kuwa maamuzi ya migogoro ya kazi lazima yazingatie makosa yaliyothibitishwa, bila kujali nafasi au utambulisho wa mtu, akieleza kuwa "ili kulinda haki za wafanyakazi na waajiri," ni muhimu kwa Tume kutekeleza majukumu yake kwa uadilifu na weledi.

Katika hatua nyingine, Rais Samia ameitaka Tume ya Haki za Binadamu na Utawala Bora kuimarisha ulinzi wa haki za binadamu, kushughulikia malalamiko ya wananchi kuhusu ukiukwaji wa misingi ya utawala bora na kutendaji wa taasisi za umma.

Aidha, ameitaka Tume hiyo kulinda maslahi ya nchi kwa kufuatilia nafasi ya Tanzania kimataifa katika masuala ya utawala bora na kutoa ufafanuzi kwa wakati.

RAIS SAMIA AMPA MAJUKUMU MAZITO MKUU MPYA WA MKOA WA TABORA

Katika hafla hiyo, Rais Samia pia amemuapisha Mhe. Angelina Lubala Mabula kuwa Mkuu wa Mkoa wa Tabora, akimtaka kusimamia matumizi ya fedha za umma, utekelezaji wa miradi ya Serikali na kuhakikisha kero za wananchi zinapatiwa ufumbuzi.

VIONGOZI WALIOAPISHWA

Katika Tume ya Usuluhishi na Uamuzi, Rais Samia amewaapisha:

• Jaji Mstaafu Wilfred Peter Dyansobera – Mwenyekiti.

• Dkt. Alhaji Almas Seleman – Kamishna.

• Felister Emmanuel Shuli – Kamishna.

• Paul Thomas Kadushi – Kamishna.

Kwa upande wa Tume ya Haki za Binadamu na Utawala Bora, walioapishwa ni:

• Danford George Mpelumbe – Mwenyekiti.

• Omar Ali Omar Bhai – Makamu Mwenyekiti.

Hafla hiyo pia imeshuhudia kuapishwa kwa Mhe. Angelina Lubala Mabula kuwa Mkuu wa Mkoa wa Tabora.

Maelekezo ya Rais Samia yanaweka msisitizo katika kuimarisha uwajibikaji wa taasisi za umma, kulinda haki za wananchi, kusimamia matumizi sahihi ya rasilimali za Serikali na kuhakikisha migogoro inatatuliwa kwa haki na kwa wakati.

Uadilifu, haki na uwajibikaji ni msingi wa utawala bora na maendeleo ya Taifa.

#RaisSamia #Ikulu #Dodoma #HakiZaWafanyakazi #UtawalaBora #Tanzania

MAKAMU WA RAIS NDEJEMBI AFUNGUA MKUTANO WA KIMATAIFA WA WANAWAKE WA MABUNGE YA UKANDA WA MAZIWA MAKUU

Tanzania yaendelea kuwa kitovu cha mshikamano, amani na uwezeshaji wa wanawake barani Afrika.

Makamu wa Rais wa Jamhuri ya Muungano wa Tanzania, Mhe. Deogratius Ndejembi, akimwakilisha Rais wa Jamhuri ya Muungano wa Tanzania, Mhe. Dkt. Samia Suluhu Hassan, anashiriki katika ufunguzi wa Mkutano wa Kimataifa wa Wanawake wa Jukwaa la Mabunge la Ukanda wa Maziwa Makuu (ICGLR), unaofanyika katika Ukumbi wa Mikutano wa Kimataifa wa Julius Nyerere (JNICC), jijini Dar es Salaam.

Mkutano huo ni jukwaa muhimu la kuimarisha nafasi ya wanawake katika uongozi na maamuzi, kukuza ushiriki wao katika juhudi za kudumisha amani na utulivu, pamoja na kuchochea maendeleo endelevu katika nchi za Ukanda wa Maziwa Makuu.

Aidha, mkutano huo unadhihirisha umuhimu wa mshikamano, usawa na ushirikiano wa kikanda katika kukabiliana na changamoto zinazowakabili wanawake na jamii kwa ujumla.

Kwa Tanzania kuwa mwenyeji wa mkutano huu, inaendelea kuonesha nafasi yake muhimu katika kuimarisha diplomasia, kukuza ushirikiano wa Kiafrika na kuendeleza juhudi za kujenga ukanda wenye amani, umoja na maendeleo.

Mkutano huu pia unakumbusha mchango wa kihistoria wa Tanzania katika kuhimiza mshikamano wa mataifa ya Afrika na kuunga mkono juhudi za kuleta amani na ustawi wa wananchi wake.

Wanawake ni nguzo ya uongozi, amani na maendeleo ya Afrika!

#Tanzania #ICGLR #UongoziWaWanawake #AmaniNaMaendeleo #UshirikianoWaKikanda