Rais wa Jamhuri ya Muungano wa Tanzania, Mhe. Dkt. Samia Suluhu Hassan, amekutana na kufanya mazungumzo na Naibu Katibu Mkuu wa Umoja wa Mataifa, Bi. Amina Mohammed, tarehe 15 Februari 2026 jijini Addis Ababa, Ethiopia.
Katika mazungumzo hayo, viongozi hao walijadili masuala ya ushirikiano kati ya Tanzania na Umoja wa Mataifa, hususan katika maeneo ya maendeleo endelevu, uwekezaji katika rasilimali watu, mabadiliko ya tabianchi, pamoja na juhudi za kukuza amani na utulivu barani Afrika. Rais Dkt. Samia alisisitiza dhamira ya Tanzania kuendelea kushirikiana kwa karibu na taasisi za kimataifa katika kufanikisha Ajenda ya Maendeleo Endelevu ya 2030, sambamba na vipaumbele vya kitaifa vinavyolenga ustawi wa wananchi.
Kwa upande wake, Bi. Amina Mohammed alieleza utayari wa Umoja wa Mataifa kuendeleza ushirikiano na Tanzania katika miradi ya kimkakati inayogusa sekta za afya, elimu, nishati safi na uwezeshaji wa wanawake na vijana kiuchumi.
Rais Dkt. Samia yupo nchini Ethiopia kwa ziara ya kikazi ya siku nne, ambapo pamoja na shughuli nyingine, alishiriki Mkutano wa Wakuu wa Nchi na Serikali wa Umoja wa Afrika (AU) uliofanyika tarehe 14 na 15 Februari 2026. Mkutano huo umejadili ajenda pana za maendeleo ya bara, ikiwemo kuimarisha biashara ya ndani ya Afrika, usalama wa chakula na mageuzi ya kiuchumi.
Ziara hiyo inaendelea kudhihirisha nafasi ya Tanzania katika majukwaa ya kimataifa na kikanda, huku Rais Samia akiendeleza diplomasia ya uchumi na maendeleo kwa manufaa ya Taifa.
No comments:
Post a Comment