RC MANYARA AHAKIKISHA USALAMA UWANJANI KABLA YA DABI YA NBC PREMIER LEAGUE

 

Manyara, Februari 6, 2025 – Mkuu wa Mkoa wa Manyara, Mhe. Queen Cuthbert Sendiga, amefanya ziara ya kukagua hali ya usalama na utaratibu katika Uwanja wa Tanzanite, Kwaraa - Babati, kuelekea mchezo wa Ligi Kuu ya NBC kati ya Fountain Gate FC na Simba SC.

Ziara hiyo ni sehemu ya jitihada za kuhakikisha Manyara inakuwa mwenyeji bora wa michezo mikubwa na inakuwa kitovu cha maendeleo ya soka nchini. Akizungumza baada ya ukaguzi, RC Sendiga alisisitiza dhamira ya mkoa wa Manyara katika kuinua kiwango cha mpira wa miguu na kuvutia timu kubwa za Tanzania kucheza kwenye ardhi ya Manyara.

"Tulipoingia Manyara, dhamira ilikuwa moja – kukuza soka na kuleta timu kubwa za Tanzania katika ardhi yetu. Leo, sio ndoto tena, ni uhalisia!" alisema RC Sendiga kwa furaha.

Mchezo huu wa NBC Premier League unatarajiwa kuvutia mashabiki wengi kutoka ndani na nje ya Manyara, jambo linalochochea si tu maendeleo ya michezo, bali pia uchumi wa mkoa kupitia sekta ya utalii na biashara.

"Huu ni mwanzo tu, juhudi zitaendelea, na mpira wa Manyara utazidi kung'ara!" aliongeza RC Sendiga, akisisitiza kuwa mkoa wake utaendelea kuweka mazingira rafiki kwa michezo na kuhamasisha uwekezaji katika sekta hiyo.

Kwa mara ya kwanza, Manyara inakuwa mwenyeji wa mchezo mkubwa wa Ligi Kuu ya NBC, hatua inayothibitisha kuwa soka limepata makazi mapya katika mkoa huu. Je, Fountain Gate FC itaweza kuwashangaza Simba SC kwenye dimba la nyumbani? Mashabiki wanatazama kwa hamu!

#NBCPremierLeague #FountainGateFC #SimbaSC #TanzaniteStadium #ManyaraSoka #MpiraNiMaisha