RAIS SAMIA ATEMBELEA KITUO CHA BUJORA NA TAMASHA LA BULABO KANDA YA ZIWA 🇹🇿✨

 

KISESA, MWANZA – Juni 21, 2025
Rais wa Jamhuri ya Muungano wa Tanzania, Mhe. Dkt. Samia Suluhu Hassan, ameendelea kuonesha msimamo thabiti wa serikali ya awamu ya sita katika kulinda na kuendeleza utamaduni wa Mtanzania kwa kutembelea Kituo cha Utamaduni na Makumbusho ya Wasukuma Bujora, kilichopo Kisesa, mkoani Mwanza. Ziara hiyo imeenda sambamba na kushiriki Tamasha la Utamaduni la Bulabo, ambalo huwakutanisha wananchi wa makabila mbalimbali ya Kanda ya Ziwa ili kuonesha na kusherehekea urithi wao wa kiutamaduni.

Katika kituo hicho, Rais Samia alipata fursa ya kujionea namna jamii ya Wasukuma imehifadhi historia yao, kuenzi mila zao, na kuendeleza maarifa ya jadi kama vile ufinyanzi, uchezaji wa ngoma, mapishi ya asili, mavazi ya kikabila pamoja na zana za kazi na makazi ya jadi. Akiwa huko, Rais aliketi kwenye kiti cha Kitemi, alama ya heshima kwa viongozi wa mila wa Kabila la Wasukuma, jambo lililoonyesha heshima yake kwa utawala wa jadi na namna jamii hizi zilivyoundwa katika misingi ya utamaduni na maadili.

Tamasha la Bulabo, lililofanyika katika viwanja vya Bujora, lilivuta maelfu ya wakazi kutoka maeneo mbalimbali ya Kanda ya Ziwa. Matukio mbalimbali kama vile ngoma za asili, nyimbo za jadi, maigizo, maonyesho ya mavazi ya kikabila, bidhaa za mikono na vyakula vya asili vilioneshwa kwa umahiri mkubwa, vikiwa ni ushahidi wa utajiri mkubwa wa urithi wa kitamaduni tulionao kama Taifa.

Akizungumza na wananchi, Rais Samia alisisitiza kuwa “Utamaduni ni uti wa mgongo wa jamii. Taifa lisiloenzi utamaduni wake ni taifa linalopoteza mwelekeo wa asili yake.” Alihimiza jamii kuendelea kufundisha watoto mila njema, kuheshimu viongozi wa mila, na kushiriki katika matukio ya kiutamaduni kama njia ya kudumisha maadili na mshikamano wa kitaifa.

Ziara hii imeonesha dhamira ya kweli ya Serikali ya Tanzania katika kuunganisha maendeleo ya kisasa na urithi wa kitamaduni, kwa kutambua kuwa utamaduni ni msingi wa maendeleo endelevu, utalii wa ndani, na mshikamano wa kijamii.

Kwa kutembelea Bujora na kushiriki Tamasha la Bulabo, Mhe. Rais Samia amesisitiza kuwa utamaduni wa Mtanzania haupaswi kusahaulika bali kuenziwa, kuenziwa na kuendelezwa kwa faida ya vizazi vya sasa na vijavyo.

#RaisSamia #Bujora #Wasukuma #BulaboFestival #UtamaduniWaTanzania #KandaYaZiwa #UrithiWetu #SerikaliYaAwamuYaSita #TanzaniaYajengwa