RAIS SAMIA AFUNGUA DARAJA LA J.P MAGUFULI: MLANGO WA MAENDELEO, HISTORIA MPYA YA KIGONGO–BUSISI

Misungwi, Mwanza – 19 Juni 2025

Rais wa Jamhuri ya Muungano wa Tanzania, Mheshimiwa Dkt. Samia Suluhu Hassan leo amefungua rasmi Daraja la J.P Magufuli (Kigongo-Busisi), daraja refu zaidi nchini lenye urefu wa kilomita 3.0, likiwa na barabara unganishi zenye urefu wa kilomita 1.66 katika eneo la Kigongo, Wilaya ya Misungwi, Mkoa wa Mwanza.

Ufunguzi wa daraja hili kubwa na la kisasa ni hatua ya kihistoria na ya kimkakati katika kuimarisha miundombinu ya usafirishaji, kukuza uchumi wa Taifa, na kuunganisha kanda ya ziwa na maeneo mengine ya nchi kwa ufanisi zaidi.

MRADI WA KIMKAKATI WA TAIFA

Daraja la J.P Magufuli ni sehemu ya barabara ya kimkakati ya Usagara–Sengerema–Geita, ambayo ni sehemu ya barabara kuu ya kimataifa inayoanzia Sirari (mpaka wa Kenya) na kupitia mikoa ya Mara, Mwanza, Geita hadi Mtukula (mpaka wa Uganda). Ujenzi wa daraja hilo ulianza rasmi mwezi Februari 2020, ukiwa ni mradi wa kihistoria uliohusisha utaalamu wa hali ya juu, teknolojia ya kisasa, na ushirikiano wa ndani na nje ya nchi.

KUONDOA KERO YA USAFIRI WA MAJI

Kwa miongo kadhaa, wakazi wa Kigongo na Busisi walitegemea usafiri wa vivuko kuvuka ziwa, hali iliyokuwa ikisababisha ucheleweshaji wa shughuli za kiuchumi, usumbufu kwa abiria, na changamoto za usalama hasa nyakati za dharura. Kwa sasa, kupitia daraja hili, safari ya kuvuka kutoka Kigongo hadi Busisi imepungua kutoka wastani wa saa 3 hadi dakika 5 pekee, hali inayowezesha kupungua kwa gharama za usafirishaji na kuongeza tija kwenye uzalishaji na biashara.

FURSA ZA MAENDELEO NA BIASHARA

Daraja la Kigongo-Busisi limefungua ukurasa mpya wa fursa kwa wakazi wa mikoa ya Mwanza, Geita, Kagera na maeneo mengine ya Kanda ya Ziwa. Kuunganika kwa urahisi wa miundombinu kutachochea:

• Biashara ya mazao ya kilimo na uvuvi, ambayo ni uti wa mgongo wa uchumi wa mikoa ya kanda ya ziwa.

• Utalii wa ndani na nje ya nchi, hasa kwa wageni wanaotembelea Hifadhi ya Serengeti, Ziwa Victoria, na vivutio vingine vya kanda hiyo.

• Uwekezaji katika viwanda, hoteli, na huduma, kutokana na ongezeko la watumiaji wa barabara hiyo na ukuaji wa shughuli za uchumi.

MAELEZO YA KIUFUNDI

• Urefu wa daraja: km 3.0

• Barabara unganishi: km 1.66

• Aina ya daraja: Box girder bridge

• Idadi ya njia: Njia mbili za magari na njia za waenda kwa miguu

• Gharama ya mradi: Zaidi ya Tsh bilioni 700

• Mkandarasi Mkuu: CCECC & CRCC (China Civil Engineering & China Railway Construction Corporation)

• Usimamizi: TANROADS

KAULI YA RAIS

Akizungumza wakati wa hafla ya uzinduzi, Rais Samia alieleza:

“Daraja hili si tu linaunganisha Kigongo na Busisi, bali linaunganisha watu, ndoto na fursa. Huu ni ushahidi hai wa dhamira ya Serikali ya Awamu ya Sita ya kuimarisha miundombinu kwa maendeleo ya wote.”

Aidha, Rais Samia alisisitiza dhamira ya serikali kuendelea kukamilisha miradi ya kimkakati ya kitaifa, ikiwemo barabara, reli ya kisasa (SGR), na bandari, ili kuipeleka Tanzania kwenye uchumi wa kati wenye ushindani na ustawi.