Shirika la Nyumba la Taifa Latoa Kauli: “Hatukuwatuma Madalali Kupangisha Majengo ya Ubia”

 

Mkurugenzi Mkuu wa Shirika la Nyumba la Taifa ( NHC), Bw. Hamad Abdallah, amekutana na Kamati ya Wapangaji na Wamiliki wa Awali wa majengo yaliyopo Kariakoo Jijini Dar es Salaam, kikao kilicholenga kujua mrejesho wa kinachoendelea katika utekelezaji wa miradi ya ubia na wamiliki hao kufuatia zoezi la ujenzi wa ubia ulioanza Januari 2024 katika eneo la Kariakoo.

Mwenyekiti wa Kamati ya Wapangaji wa Kariakoo, Bw. Shafiq Mohamed,wakati wa kikao cha Kamati ya Wapangaji na Shirika la Nyumba la Taifa na baadhi ya wapangaji wa zamani wa NHC.

Dar es Salaam, Oktoba 2024 – Shirika la Nyumba la Taifa (NHC) limetoa tamko rasmi kwamba halijamtuma dalali yeyote kusimamia upangaji wa majengo mapya yanayojengwa kwa ushirikiano na wabia katika maeneo mbalimbali, ikiwemo Kariakoo. Mkurugenzi Mkuu wa NHC, Hamad Abdallah, alitoa kauli hiyo wakati wa kikao cha Kamati ya Wapangaji na baadhi ya wapangaji wa zamani, kufuatia malalamiko kutoka kwa wafanyabiashara wakidai madalali wamekuwa wakitumia majengo hayo kujinufaisha, huku wakidai Shirika halihusiki na fedha zinazokusanywa.

Mkurugenzi Mkuu aliahidi kwamba NHC itaendelea kuboresha mazingira ya biashara na kuhakikisha haki za wapangaji zinalindwa ili kuondoa changamoto zilizopo na kutekeleza miradi ya ubia kwa manufaa ya pande zote. Aidha, aliweka wazi kuwa wapangaji wanaotarajiwa kurejea kwenye majengo ya zamani hawatakuwa na uhakika wa kurudi kwenye nafasi walizokuwa nazo, kwani upangaji mpya utazingatia mipangilio ya sasa na mahitaji mapya.

Katika hatua nyingine, Shirika limeamua kuwa vibao vidogo vya matangazo vilivyowekwa na wapangaji havitatozwa ada, lakini mabango makubwa yatatozwa kwa mujibu wa viwango vilivyowekwa na NHC, TRA, na Tanroads. Vilevile, wapangaji waliokwenda mahakamani kufungua kesi dhidi ya NHC wamepoteza haki ya upangaji wa majengo hayo.

Shirika limeahidi kuweka wazi michoro ya majengo mapya ya ubia kwa kamati ya wapangaji, na kufanikisha mipango ya kuwapatia wapangaji na wabia ushirikiano wa karibu na mipango endelevu.

Akizungumza kwa niaba ya wapangaji, Mwenyekiti wa Kamati ya Wapangaji wa Kariakoo, Bw. Shafiq Mohamed, aliishukuru NHC kwa kusikiliza maoni yao na kuahidi kuendelea kushirikiana na kamati katika kupanga mipango endelevu. Hata hivyo, wafanyabiashara wameeleza kuwa vizimba na sehemu zilizotengwa ni ndogo ikilinganishwa na maduka ya awali, hali inayoweza kuathiri biashara zao. Walieleza matumaini yao kuwa Shirika litaweka mpango bora wa kuwapa mazingira rafiki ya biashara.

Changamoto nyingine ni malalamiko kuhusu madalali kupewa nguvu zaidi katika usimamizi wa majengo hayo, jambo lililoleta migogoro kati ya wapangaji na wabia. Takribani wapangaji 437 wameeleza kuwa wanahitaji msaada wa Mkurugenzi Mkuu ili kuboresha mazingira ya biashara.

Kwa upande wa malipo ya ada za mabango, NHC ilibainisha kuwa suala hilo litajadiliwa ili kuweka uwazi wa ada hizo kwa wapangaji na kuondoa migogoro. Pia, wapangaji wameomba waruhusiwe kuingia kwenye majengo yanapokuwa yamekamilika kwa sehemu kubwa, badala ya kusubiri mpaka ujenzi ukamilike kwa asilimia 100. Shirika limesema kwamba endapo kuna sehemu itakayotumika kabla ya kukamilika kwa asilimia 100, wapangaji watalipa nusu ya kiwango cha kodi.

Mradi wa Sh 60 Bilioni Kuleta Mapinduzi ya Huduma za Usafiri Ziwa Victoria

Serikali ya Tanzania imewekeza Sh60 bilioni kwa ajili ya kuboresha bandari kuu tatu za Ziwa Victoria ili kuimarisha ufanisi na uwezo wa huduma za usafiri.

Meneja wa Bandari za Ziwa Victoria, Bw. Erasto Lugenge, alifafanua kwa waandishi wa habari waliotembelea bandari za Bukoba na Kemondo kwamba miradi ya maboresho katika bandari za Kemondo, Bukoba na Mwanza Kaskazini inaendelea kwa kasi, na matarajio ni kuwa uwekezaji huu utaleta mageuzi katika sekta ya usafiri wa ziwani.

Bw. Lugenge, anayesimamia bandari 12 upande wa Tanzania wa Ziwa Victoria, alieleza kuwa maboresho ya Bandari ya Kemondo, yenye thamani ya Sh20.339 bilioni, yamekamilika kwa asilimia 98, huku hatua za mwisho zikiwa ni kusafisha na kuandaa mazingira kwa ajili ya uzinduzi rasmi. Aidha, mradi wa Sh19.544 bilioni wa kuboresha Bandari ya Bukoba umefikia asilimia 75 ya kukamilika, na unatarajiwa kufikia tamati ifikapo tarehe 4 Novemba 2024.

Maboresho hayo yamelenga kuongeza kina cha maji kutoka mita 3.5 hadi mita 5 katika Bandari za Kemondo na Bukoba, pamoja na kuongeza urefu wa gati kutoka mita 75 hadi 92. Pia, zimeimarishwa sakafu kwa muundo wa zege na kufungwa uzio kwa ajili ya usalama. Maboresho haya yanajumuisha ujenzi wa maeneo ya kusubiri abiria, vituo vya ukaguzi wa mizigo, na mfumo wa kisasa wa umeme, sambamba na kinga ya upepo ili kuboresha hali ya hewa kwa wasafiri na mizigo.

Bw. Lugenge alisema kuwa maboresho hayo yanakusudia kupokea meli mpya, MV Mwanza Hapa Kazi Tu, ambayo itakuwa na uwezo wa kubeba abiria 1,200, tani 400 za mizigo, magari madogo 20, na magari makubwa matatu. Meli hii inatarajiwa kuanza safari zake mwishoni mwa mwaka 2024 au mwanzoni mwa 2025, hivyo kuongeza maradufu uwezo wa usafiri ukilinganisha na MV Victoria inayobeba abiria 600 kwa sasa.

Aidha, Bw. Lugenge alifafanua kuwa bandari hizo zinaanzisha vituo vya huduma vya sehemu moja, zikiunganisha huduma za Mamlaka ya Usimamizi wa Bandari Tanzania (TPA), Mamlaka ya Mapato Tanzania (TRA), Shirika la Viwango Tanzania (TBS), pamoja na huduma za misitu, uhamiaji, afya, forodha, na vikosi vya ulinzi kwa lengo la kuboresha utoaji wa huduma kwa wananchi na wageni.

Nchi za Burundi, Jamhuri ya Kidemokrasia ya Kongo (DRC), na Rwanda tayari zimeonyesha nia ya kutumia bandari hizo mara tu zitakapokamilika, huku usafiri ukitarajiwa kuimarishwa zaidi kutokana na uwepo wa reli ya kisasa ya SGR na reli ya MGR zinazounganisha Dar es Salaam na Ziwa Victoria kupitia Mwanza.

Uwekezaji huu wa serikali unatarajiwa sio tu kuboresha huduma za usafiri wa ziwani bali pia kuchochea shughuli za kiuchumi katika kanda hiyo, na kuweka viwango vipya kwa usafiri wa ziwani Afrika Mashariki.

Dkt. Abbasi: Hakuna Kizuizi Kufikia Watalii Milioni 5 Mwaka 2025

 

Katibu Mkuu wa Wizara ya Maliasili na Utalii, Dkt. Hassan Abbasi, amesema kwa mikakati ya kutangaza Utalii inayotekelezwa na Serikali ya Awamu ya Sita chini ya Rais, Dkt. Samia Suluhu Hassan, hakuna jambo litakalozuia kufikiwa kwa lengo la watalii milioni 5 ifikapo mwaka 2025.

Dkt. Abbasi ameyasema hayo Oktoba 28, 2024, alipokuwa akitoa mada kuhusu hali na maendeleo ya sekta ya utalii nchini Tanzania ikiwa moja ya sekta muhimu kwa maendeleo ya watu na ulinzi wa Taifa kwa washiriki wa Kozi Fupi ya 13 inayoendelea kwenye Chuo cha Ulinzi cha Taifa (NDC), jijini Dar es Salaam.

Kozi hiyo inahusisha washiriki kutoka nchi zaidi ya 20 duniani wengi wakiwa kutoka mabara ya Afrika na Asia.

Ameeleza mikakati kama filamu ya “Tanzania: The Royal Tour” na “Amazing Tanzania” na ushirikishaji wa sekta binafsi wakiwemo wadau wenyewe wa utalii katika kuitangaza nchi kuwa ni mambo ambayo nchi nyingine za Afrika na dunia zinaweza kujifunza kutoka Tanzania.

Ametoa wito pia kwa wataalamu hasa kutoka Bara la Afrika kuja na mikakati ya pamoja kulitangaza Bara hilo (Brand Africa Strategy) na kuhakikisha amani na usalama vinashamiri kwani sekta ya utalii, pamoja na jitihada za nchi na nchi, kukosekana kwa usalama katika nchi moja kunaweza kulifanya Bara zima kama la Afrika kuonekana ni la migogoro na hivyo kuathiri ujio wa wageni hata katika nchi zenye amani.

“Ulikuwa wakati mujarabu kujadiliana na wabobezi hao na kubadilishana uzoefu wa nchi mbalimbali katika sekta ya utalii, uchumi na ulinzi wa Taifa. Wengi wao wameeleza kujifunza mengi kutoka mikakati na mafanikio makubwa ambayo Tanzania imeyafikia katika utalii, uhifadhi na zaidi ulinzi wa raslimali za Taifa,” amesema Dkt. Abbasi.

 

MADEREVA WATAKIWA KUZINGATIA TIJA, UFANISI KATIKA UTENDAJI KAZI WAO

 Naibu Katibu Mkuu Ofisi ya Waziri Mkuu - Kazi, Vijana, Ajira na Wenye Ulemavu Zuhura Yunus, amewataka Madereva kuzingatia tija na ufanisi katika utendaji kazi wao ili kuhakikisha jamii inafanya kazi  za kiuchumi kwa usalama na muda muafaka, hivyo kukuza uchumi  wa mtu mmoja na Taifa kwa ujumla.

Amebainisha hayo wakati wa  kufungua Mafunzo ya Tija na Ufanisi wa Madereva, leo Oktoba 29,  2024 Jijini Dar es salaam.

"Nchi yetu inakabiliwa na changamoto za ajali barabarani ambazo zinaathiri nguvu kazi ya Taifa na kupunguza pato, hivyo basi ni muhimu kuzingatia mafunzo haya ili kupunguza ajali ambazo zinaweza kuepukika" amesema.

Akizungumza Mkurugenzi wa Ukuzaji Tija, Ofisi ya Waziri Mkuu - Kazi, Vijana, Ajira na Wenye Ulemavu Yohana Madadi, amesema lengo la Mafunzo hayo ni kutoa ujuzi na mbinu za udereva bora ili kupunguza ajali barabarani na kutii sheria bila shuruti.

Kwa upande wake Meneja Uratibu na Mazingira  Mamlaka ya Udhibiti Usafiri Ardhini (LATRA) Geofrey Silanda, ameipongeza Ofisi ya Waziri ya Mkuu kwa kuandaa mafunzo hayo, ambayo yakikamilika yataongeza ufanisi na tija  katika utendaji kazi wao.

Naibu Katibu Mkuu Ofisi ya Waziri Mkuu - Kazi, Vijana, Ajira na Wenye Ulemavu Zuhura Yunus, akifungua Mafunzo ya Ustadi wa Kuboresha Tija na Ufanisi kwa Madereva, leo Oktoba 29, 2024 Jijini Dar es salaam.

Mkurugenzi wa Ukuzaji Tija Ofisi ya Waziri Mkuu -Kazi, Vijana, Ajira na Wenye Ulemavu Yohana Madadi akizungumza wakati wa Mafunzo ya Ustadi wa Kuboresha Tija na Ufanisi kwa Madereva, leo Oktoba 29, 2024 Jijini Dar es salaam.

 Wakurugenzi Ofisi ya Waziri Mkuu -Kazi, Vijana, Ajira na Wenye Ulemavu wakifuatilia Mafunzo ya Ustadi wa Kuboresha Tija na Ufanisi kwa Madereva, leo Oktoba 29, 2024 Jijini Dar es salaam. 

Naibu Katibu Mkuu Ofisi ya Waziri Mkuu - Kazi, Vijana, Ajira na Wenye Ulemavu Zuhura Yunus, akiwa katika picha ya pamoja na Wakurugenzi Ofisi hiyo, pamoja na Madereva walio hudhuria Mafunzo ya Ustadi wa Kuboresha Tija na Ufanisi kwa Madereva, leo Oktoba 29, 2024 Jijini Dar es salaam.

Rais Dkt. Samia afungua mkutano wa 11 wa Merck Foundation Africa Asia Luminary Jijini Dar es Salaam

Rais wa Jamhuri ya Muungano wa Tanzania Mhe. Dkt. Samia Suluhu Hassan akizungumza na baadhi ya Wenza wa Wakuu wa nchi mbalimbali Barani Afrika kabla ya kufungua Mkutano wa 11 wa Merck Foundation Africa Asia Luminary katika hoteli ya Johari Rotana Jijini Dar es Salaam tarehe 29 Oktoba, 2024.

 

Dar es Salaam, Oktoba 29, 2024 – Rais wa Jamhuri ya Muungano wa Tanzania, Mheshimiwa Dkt. Samia Suluhu Hassan, amefungua rasmi Mkutano wa 11 wa Merck Foundation Africa Asia Luminary katika Hoteli ya Johari Rotana, jijini Dar es Salaam. Mkutano huu unaleta pamoja viongozi, wenza wa wakuu wa nchi, watunga sera, wanataaluma, watafiti, na wanahabari kutoka mataifa mbalimbali barani Afrika na Asia, wakiwa na lengo la kuimarisha ushirikiano katika masuala ya afya, hasa afya ya uzazi, saratani, na magonjwa yasiyoambukiza.

Akizungumza kabla ya ufunguzi rasmi wa mkutano huo, Rais Dkt. Samia alikutana na baadhi ya wenza wa wakuu wa nchi kutoka nchi 15 za Afrika na Asia waliokuja nchini Tanzania kwa ajili ya kushiriki mkutano huu muhimu. Mhe. Rais alisisitiza umuhimu wa kujenga ushirikiano wa kimataifa katika kuimarisha mifumo ya afya kwa ustawi wa jamii, akitilia mkazo msaada unaotolewa na Merck Foundation kwa kuwajengea uwezo wataalamu wa afya ili kukabiliana na changamoto mbalimbali zinazokabili sekta ya afya.

Mkutano huu wa siku mbili ni wa kipekee kwani unawaleta pamoja viongozi na wadau wa afya na maendeleo, wakiwemo Mawaziri wa Afya, watafiti, na wanahabari kutoka mataifa mbalimbali, kwa lengo la kubadilishana maarifa na kujadili mikakati ya kuboresha afya barani Afrika na Asia. Mhe. Dkt. Samia aliwakaribisha washiriki wote kwa furaha kubwa na kueleza kuwa Tanzania inaendelea kutekeleza sera na mipango ya kuboresha sekta ya afya, ikiwemo kuimarisha huduma za afya vijijini na mijini kupitia uwekezaji wa miundombinu na mafunzo kwa wataalamu wa afya.

Kwa upande wake, Afisa Mtendaji Mkuu wa Merck Foundation, Dr. Rasha Kelej, alielezea shukrani zake kwa Tanzania kwa kuwa mwenyeji wa mkutano huu na kupongeza jitihada zinazofanywa na Rais Samia katika kuimarisha afya ya umma. Alibainisha kuwa Merck Foundation ina lengo la kusaidia mafunzo ya taaluma za afya kwa kuendelea kushirikiana na nchi mbalimbali kuhakikisha huduma bora za afya zinapatikana kwa watu wote.

Mkutano huu wa Merck Foundation Africa Asia Luminary umehitimishwa kwa mikakati na mapendekezo muhimu yatakayosaidia kuimarisha afya ya jamii kwa kuzingatia mahitaji ya kiafya ya watu kutoka mabara ya Afrika na Asia.

HOSPITALI YA TAIFA MLOGANZILA YATUMIA MAADHIMISHO YA KIHARUSI KUTOA ELIMU KWA WANANCHI

 

Mkurugenzi Mtendaji wa Hospitali ya Taifa Muhimbili Mloganzila Dkt. Judith Magandi akizungumza na vyombo vya habari wakati wa maadhimisho ya siku ya ugonjwa wa kiharusi duniani

VICTOR MASANGU,MLOGANZILA

Hospitali ya Taifa ya Muhimbili tawi la Mloganzila katika kukabiliana na changamoto ya wimbi la kuwepo kwa idadi kubwa ya wagonjwa wa ubongo,mishipa ya fahamu na kiharusi imeamua kutoa elimu maalumu kwa wananchi kwa lengo kujikinga na magonjwa hayo.

Hospitali hiyo mbali na kutoa elimu hiyo pia imeweza kutoa huduma mbali mbali za upimaji wa afya wa magonjwa kutoka kwa madaktari bingwa wa Hospitali ya Taifa ya Muhimbili Mloganzila.

Hayo yamebainishwa na Naibu Mkurugenzi Mtendaji wa Hospitali ya Taifa Muhimbili Mloganzila Dkt. Judith Magandi wakati wa maadhimisho ya siku ya ugonjwa wa kiharusi duniani.

Naibu Mkurugenzi huyo ametumia fursa hiyo kuwahimiza wagonjwa wenye changamoto za kiharusi wajitokeze ili waweze kupatiwa tiba sahihi kwa wakati kwa lengo la kuepuka madhara zaidi.

Dkt. Magandi amesema kwamba tatizo la kiharusi ni kubwa na kuongeza kuwa kwa MNH-Mloganzila katika kliniki ya ubongo na mishipa ya fahamu ambapo kwa siku moja wanaona wagonjwa kati ya 140 hadi 170 ambapo kati ya wagonjwa hao asilimia 60 wanabainika kuwa na kiharusi.

“Baada ya kuona ukubwa wa tatizo la kiharusi Muhimbili Mloganzila tumeamua kuboresha huduma za magonjwa ya kiharusi kwa kuanzisha kitengo maalum cha kuhudumia wagonjwa wenye kiharusi ambapo tumeweka vifaa tiba vya kisasa vyenye uwezo wa kufuatilia mwenendo wa mgonjwa kwa wale wagonjwa ambao wamelazwa wodini.

Kwa Upande wake Daktari Bingwa Mbobezi wa Magonjwa ya Ubongo na Mishipa ya Fahamu MNH-Mloganzila Dkt. Mohamed Mnacho amesema kuwa ugonjwa wa kiharusi ni moja kati ya magonjwa yanayoongoza kwa kusababisha vifo na ulemavu duniani.

Pamoja na hayo, amesema takwimu za Shirika la Afya Duniani (WHO) zinaeleza kuwa zaidi ya watu milioni 12 duniani wanatatizo la kiharusi ambapo kati ya hao watu milioni 6 hupoteza maisha kutokana na ugonjwa huo kwa mwaka.

Aidha ameiomba jamii kuacha kabisa na baadhi ya tabia ambazo zinaweza kuchangia watu kupata ugonjwa wa kiharusi ikiwemo uvutaji wa sigara, unywaji wa pombe kupita kiasi, uzito mkubwa pamoja kutokufanya mazoezi.

Nao baadhi ya wananchi kutoka maeneo mbali mbali ambao wamepatiwa mafunzo ya kujikinga na ugonjwa huo wamesema kwamba elimu waliyoipata kutoka kwa madaktari bingwa itakwenda kuwasaidia.

Siku ya kiharusi Duniani uadhimishwa Oktoba 29 kila mwaka ambapo kwa Muhimbili Mloganzila imeadhimisha siku hiyo kwa kutoa huduma mbalimbali bure ikiwemo upimaji wa shinikizo la damu, elimu ya lishe pamoja na ugonjwa wa kiharusi.

WADAU WA AFYA WAKUSANYIKA JIJINI ARUSHA KUJADILI BIMA YA AFYA KWA WOTE

 Kongamnao kuhusu Mpango wa Bima ya Afya kwa Wote na Mdahalo wa Kitaifa kuhusu Mpango wa Ufadhili wa Sekta ya Afya yanafanyika kwenye Kituo cha Kimataifa cha Mikutano cha Arusha jijini Arusha kuanzia tarehe 29 na 30 Oktoba 2024 na 31 Oktoba na 01 Novemba 2024 mutawalia.

Matukio hayo mawili yatakayofunguliwa na Waziri Mkuu wa Jamhuri ya Muungano wa Tanzania, Mhe. Kassim Majaliwa Majaliwa (Mb) siku ya tarehe 30 Oktoba 2024 yamekusanya wataalamu kutoka sekta mbalimbali wa ndani na nje ya nchi kujadili mikakati inayofaa kutumiwa na nchi za Jumuiya ya Afrika Mashariki kuboresha huduma za afya kwa wote.
Wizara ya Mambo ya Nje na Ushirikiano wa Afrika Mashariki kwa kushirikiana na Wizara ya Afya, Sekretarieti ya Jumuiya ya Afrika Mashariki na wabia wa maendeleo imeshiriki uratibu wa maandalizi ya matukio hayo muhimu ambapo Mdahalo wa Kitaifa kuhusu Mpango wa Ufadhili wa Sekta ya Afya, kufanyika kwake ni utekelezaji wa maagizo ya Baraza la Kisekta la Mawaziri wa Afya wa Jumuiya ya Afrika Mashariki wakati wa kikao chao kilichofanyika jijini Dar Es Salaam mwezi Mei 2024.
Aidha, mdahalo huo ni utekelezaji wa maazimio ya Wakuu wa Nchi na Serikali wa Umoja wa Afrika waliyoyatoa katika Mkutano wao uliofanyika jijini Addis Ababa, Ethiopia Julai 2019.
Katika siku yake ya kwanza, washiriki wa kongamano hilo walipata fursa ya kusikiliza mada mbalimbali zilizokuwa zinawasilishwa na watalaam wa afya. Kabla ya mada hizo kuanza kuwasilishwa, zilitanguliwa na hotuba fupi kutoka kwa Mganga Mkuu wa Serikali, Prof. Tumaini Nagu na Mkurugenzi wa Sera na Mipango katika Wizara ya Afya, Bw. Amoury A. Amoury. Watalaamu hao waliwambia washiriki madhumuni ya kongamano hilo na matokeo yanayotarajiwa na dira ya mpango wa bima ya afya kwa wote nchini Tanzania.
Mada nyingine zilizowasilishwa katika siku ya kwanza ni pamoja na Kugharamia Mfumo wa Afya kwa Wote: Kuangalia kwa kina mikakati ya kibunifu kwa ajili ya Upatikanaji Endelevu wa Fedha; (Financing Universal Health: Exploring Innovative Strategies for Sustainable Funding in Tanzania); Nafasi ya Teknolojia na Ubunifu katika Kuboresha Ufanisi na Upatikanaji wa Huduma ya Bima ya Afya kwa Wote; (Role of Technology and Innovation in Improving Access and Efficiency in Universal Health Insurance); na Enrolment and Re-enrolment Strategies – what works and what does not work.
Wizara inawakilishwa na timu ya watalaamu katika kongamano hilo inayoongozwa na Mkurugenzi wa Miundombinu ya Uchumi na Huduma za Jamii, Mhandisi Abdillah Mataka na siku ya ufunguzi, Naibu Waziri wa Mambo ya Nje na Ushirikiano wa Afrika Mashariki anayeshughulikia masuala ya Afrika Mashariki, Mhe. Denis Londo (Mb) atashiriki hafla ya ufunguzi ya matukio hayo.