Dodoma, 09 Agosti 2025 — Hatua mpya katika safari ya kisiasa ya Tanzania imechukuliwa leo jijini Dodoma baada ya Mgombea wa Nafasi ya Rais wa Jamhuri ya Muungano wa Tanzania na Mwenyekiti wa Chama cha Mapinduzi (CCM) Taifa, Dkt. Samia Suluhu Hassan, kupokea rasmi begi lenye fomu za kugombea nafasi ya Rais wa Jamhuri ya Muungano wa Tanzania.
Tukio hilo muhimu limefanyika katika Ofisi za Tume Huru ya Taifa ya Uchaguzi (NEC) zilizopo Njedengwa, ambapo Mwenyekiti wa NEC, Mhe. Jaji wa Mahakama ya Rufani Jacobs Mwambegele, alikabidhi fomu hizo kwa Dkt. Samia kwa niaba ya Tume.
Akishuhudiwa na viongozi mbalimbali wa chama na Serikali, Dkt. Samia alifuatana na Mgombea Mwenza, Dkt. Emmanuel John Nchimbi, ambaye pia alipokea fomu ya kugombea nafasi ya Makamu wa Rais.
Hatua hii inafungua rasmi ukurasa wa mchakato wa kampeni za Uchaguzi Mkuu wa mwaka 2025, ikionesha dhamira ya CCM kuendelea kusimamia ajenda za maendeleo, mshikamano wa kitaifa, na kulinda amani ya taifa.
Kwa mujibu wa NEC, wagombea wote watatakiwa kurejesha fomu hizo wakiwa wametimiza masharti ya kisheria, ikiwa ni pamoja na kupata idadi ya kutosha ya wadhamini kutoka mikoa mbalimbali ya Tanzania Bara na Zanzibar.
Tukio la leo limekuwa kivutio kikubwa kwa Watanzania na wadau wa siasa duniani kote, likiwa ni sehemu ya mchakato wa kidemokrasia unaoendelea kuimarika nchini Tanzania.
#Uchaguzi2025 #DktSamiaSuluhuHassan #CCMTanzania #NEC #Tanzania
No comments:
Post a Comment