TANZANIA YAADHIMISHA SIKU YA WANYAMAPORI DUNIANI KWA KUIMARISHA UHIFADHI NA KUVUTIA UTALII

 

Dodoma, Machi 3, 2025 – Tanzania imeungana na mataifa mengine duniani kuadhimisha kilele cha Maadhimisho ya 11 ya Siku ya Wanyamapori Duniani, yaliyofanyika jijini Dodoma. Maadhimisho haya yamelenga kuhamasisha umma kuhusu umuhimu wa kuhifadhi rasilimali za wanyamapori kwa maendeleo endelevu ya taifa na sekta ya utalii.

Mgeni rasmi katika maadhimisho haya alikuwa Waziri wa Maliasili na Utalii, Mhe. Balozi, Dkt. Pindi Chana (Mb), ambaye alikagua gwaride maalum la Jeshi la Uhifadhi kama ishara ya kuonyesha utayari wa serikali na wadau katika kulinda rasilimali za taifa.

Katika hotuba yake, Waziri Dkt. Pindi Chana alieleza kuwa Tanzania imeendelea kuwa mstari wa mbele katika jitihada za uhifadhi wa wanyamapori kwa kuhakikisha rasilimali za maliasili zinalindwa kwa faida ya kizazi cha sasa na kijacho. “Serikali inaendelea kuchukua hatua thabiti za kupambana na ujangili, kuhifadhi mazingira ya asili, na kuimarisha usimamizi wa mbuga za wanyama ili kuhakikisha sekta ya utalii inazidi kukua na kuchangia pato la taifa,” alisema Waziri.

Kwa mujibu wa Waziri, sekta ya utalii inachangia zaidi ya asilimia 17 ya Pato la Taifa na asilimia 25 ya mapato ya fedha za kigeni nchini. Hii ni ishara kuwa uhifadhi wa wanyamapori una mchango mkubwa katika kukuza uchumi wa Tanzania.

Katika kuimarisha uhifadhi na kuvutia watalii zaidi, Tanzania imeendelea kutekeleza mikakati mbalimbali ikiwemo:

1. Kuboresha miundombinu ya utalii – Serikali inaendelea kuboresha barabara, viwanja vya ndege, na huduma za hoteli ndani ya hifadhi ili kuongeza urahisi wa kufika katika maeneo ya vivutio.

2. Kuimarisha usalama wa wanyamapori – Kupitia Jeshi la Uhifadhi, doria zinafanyika mara kwa mara ili kupambana na ujangili na kulinda bioanuai ya taifa.

3. Kampeni za kimataifa za kutangaza vivutio vya utalii – Kupitia Bodi ya Utalii Tanzania (TTB), serikali imekuwa ikishiriki maonyesho ya kimataifa na kutumia vyombo vya habari kutangaza utalii wa Tanzania.

4. Ubunifu wa bidhaa mpya za utalii – Mbali na safari za wanyamapori, Tanzania inahamasisha utalii wa utamaduni, utalii wa ikolojia, na utalii wa michezo ili kuvutia wageni wa aina mbalimbali.

Kwa upande wake, Kamishna wa Uhifadhi wa Wanyamapori, Brigedia Jenerali Wilfred Mbano, alisisitiza kuwa Jeshi la Uhifadhi litaendelea kutekeleza majukumu yake kwa weledi ili kuhakikisha rasilimali za taifa zinalindwa ipasavyo. “Tunawashukuru wananchi kwa ushirikiano wao katika kuhifadhi mazingira na wanyamapori. Uhifadhi ni jukumu letu sote,” alisema Brigedia Jenerali Mbano.

Maadhimisho haya yameleta pamoja wadau mbalimbali wa uhifadhi na utalii, wakiwemo wawakilishi wa mashirika ya kimataifa, wanaharakati wa mazingira, na wanajamii wanaoishi karibu na hifadhi za taifa.

Serikali inawataka Watanzania kuendelea kushiriki kikamilifu katika juhudi za uhifadhi wa maliasili ili kuhakikisha Tanzania inasalia kuwa moja ya maeneo bora zaidi ya utalii duniani.

Mwisho.