Dar es Salaam, 3 Machi 2025 – Rais wa Jamhuri ya Muungano wa Tanzania, Mhe. Dkt. Samia Suluhu Hassan, amewaandalia futari watoto yatima na watoto wenye mahitaji maalum katika hafla iliyofanyika Ikulu, jijini Dar es Salaam, jana jioni.
Hafla hiyo ilihudhuriwa na watoto kutoka makundi mbalimbali ya wale wanaoishi katika mazingira magumu, pamoja na wale wanaohifadhiwa kwenye vituo vya kulelea watoto yatima na wenye uhitaji maalum. Pia, viongozi wa serikali, wadau wa maendeleo, viongozi wa dini, na wanajamii walishiriki katika tukio hilo lenye kugusa nyoyo za wengi.
Katika hotuba yake, Rais Dkt. Samia alieleza kuwa futari hiyo ni ishara ya upendo, mshikamano, na kuendeleza utamaduni wa kusaidiana, hasa katika kipindi hiki cha Mwezi Mtukufu wa Ramadhani. Alisisitiza kuwa serikali itaendelea kuweka mazingira bora kwa watoto wote nchini, kuhakikisha wanapata haki zao za msingi ikiwa ni pamoja na elimu, afya, na malezi bora.
“Tanzania ni jamii inayojali na kuthamini utu wa kila mmoja wetu. Watoto hawa wanahitaji faraja, upendo na fursa za maisha bora kama watoto wengine. Serikali itaendelea kushirikiana na wadau kuhakikisha wanapata huduma muhimu ili waweze kufikia ndoto zao,” alisema Rais Dkt. Samia.
Aidha, Rais alitoa wito kwa wananchi wote kuendeleza moyo wa huruma kwa kusaidia wenye uhitaji, hususan katika kipindi hiki cha Ramadhani ambapo watu wanapaswa kushiriki katika ibada za sadaka na kusaidia makundi yenye uhitaji zaidi katika jamii.
Watoto walioshiriki hafla hiyo walionyesha furaha kubwa na kushukuru kwa mwaliko huo, wakieleza kuwa ni tukio la kipekee linaloonesha upendo wa Rais kwao. “Tunamshukuru sana Mama kwa kutufikiria na kutuletea furaha katika siku hii. Tunamuombea baraka na afya njema,” alisema mmoja wa watoto waliohudhuria.
Hafla hiyo iliambatana na burudani mbalimbali ikiwemo qaswida, nyimbo za dini, na michezo, huku watoto wakipata fursa ya kushiriki chakula pamoja na Rais na viongozi wengine wa kitaifa.
No comments:
Post a Comment