Dodoma, 11 Machi 2025 – Rais wa Jamhuri ya Muungano wa Tanzania, Mheshimiwa Dkt. Samia Suluhu Hassan, amekutana na kufanya mazungumzo na Mkurugenzi Mtendaji wa Shirika la Umoja wa Mataifa linalohudumia Watoto (UNICEF), Bi. Catherine Russell, katika Ikulu ya Chamwino, Jijini Dodoma.
Katika mazungumzo hayo, Mheshimiwa Rais Dkt. Samia ameishukuru UNICEF kwa mchango wake mkubwa katika kuboresha sekta za afya, elimu, lishe kwa watoto, pamoja na huduma za afya ya msingi. Ameeleza kuwa ushirikiano kati ya Tanzania na UNICEF umekuwa na matokeo chanya, hasa katika kuhakikisha watoto wa Tanzania wanapata haki zao za msingi na huduma bora zinazowasaidia kukua katika mazingira salama na yenye fursa za maendeleo.
Aidha, Rais Dkt. Samia ameeleza dhamira ya Serikali ya Tanzania kuendelea kushirikiana na UNICEF katika kuboresha huduma za kijamii zinazowalenga watoto, hususan katika kupambana na utapiamlo, kuboresha mifumo ya elimu kwa watoto wa rika zote, kuongeza upatikanaji wa chanjo, na kuimarisha huduma za afya kwa mama na mtoto.
Kwa upande wake, Mkurugenzi Mtendaji wa UNICEF, Bi. Catherine Russell, amepongeza jitihada za Serikali ya Tanzania katika kuhakikisha watoto wanapata huduma bora. Amesema UNICEF itaendelea kushirikiana na Tanzania katika maeneo muhimu kama elimu jumuishi, afya bora kwa watoto wachanga, kupambana na ukatili dhidi ya watoto, na kuongeza fursa za upatikanaji wa maji safi na huduma za usafi wa mazingira.
Mazungumzo haya yameonesha dhamira ya dhati ya pande zote mbili kuimarisha ushirikiano katika kuhakikisha ustawi wa watoto unakuwa kipaumbele cha maendeleo ya taifa. Serikali ya Tanzania kwa kushirikiana na UNICEF itaendelea kutekeleza miradi na programu mbalimbali zinazolenga kuboresha maisha ya watoto, kuhakikisha wanalindwa dhidi ya changamoto mbalimbali na kuwajengea mazingira mazuri ya kukua na kustawi kwa ajili ya mustakabali bora wa taifa.
#UNICEF #Tanzania #SamiaSuluhuHassan #WatotoNiTaifaLaKesho
No comments:
Post a Comment