TRIL.6/- ZIMETOLEWA KWENYE MIRADI CHINI YA TAMISEMI MIAKA 3 YA RAIS SAMIA

Waziri wa Nchi, Ofisi ya Rais Tawala za Mikoa na Serikali za Mitaa Mhe. Mohamed Mchengerwa amesema Serikali imetoa fedha takribani Sh. Trilioni sita tangu Mhe. Rais Samia Suluhu Hassan aingie madaraka kwa ajili ya kutekeleza miradi mbalimbali ya maendeleo iliyopo chini ya Ofisi ya Rais – TAMISEMI.

Mhe. Mchengerwa ameyasema hayo wakati akitoa salam za Wizara kwenye mkutano wa hadhara wa kuhitimisha ziara ya siku sita ya Rais Samia mkoani Ruvuma uliofanyika kwenye uwanja wa Majimaji leo 28.09.2024.

Amesema “Mhe. Rais fedha ulizotoa zimeenda kila Mkoa, Halmashauri, Tarafa, Kata, Kijiji, Kitongoji na kila mtaa na zimegusa wanawake kwa wanaume, wazee, vijana, watoto na hata walemavu.”

“Hakuna kundi ambalo halijafikiwa na huduma zilizopelekwa kupitia fedha hizo ulizotoa, umegusa maisha ya watanzania, umegusa mioyo yao na umeboresha upatikanaji wa huduma bora kwa wananchi,”amesema.

Amefafanua miradi iliyotekelezwa kwa kipindi hicho kuwa ni Hospitali za Wilaya 129 mpya zimejengwa na hospitali Kongwe 50 zimekarabatiwa, Vituo vya Afya 367 vimejengwa, majengo ya kutoa huduma za dharura (EMD) 87 zimejengwa, Majengo ya kutoa huduma za Wagonjwa mahututi 28 yamejengwa, Mitambo ya kuzalisha hewa tiba ya Oksjen 21 imesimikwa, magari ya kubebea wagonjwa pamoja na usimamizi wa shughuli za Afya 523 yamenunuliwa.

“Kila Halmashauri nchini imepata gari la kubebea wagonjwa pamoja na gari la usimamizi wa shughuli za afya na hapa kwenye Mkoa wa Ruvuma wamepokea magari ya Wagonjwa kwa kila Halmashauri,”amesema

Aidha, amesema kwa upande wa elimu hadi sasa Shule mpya za Sekondari kwa Kata 458 zimejengwa, Shule za Msingi 665 zenye madarasa ya awali na vyumba vya madarasa 50,050 vimejengwa pamoja na nyumba za walimu 366 zimejengwa.

“Kwa upande wa TARURA umeongeza bajeti kutoka Sh.Bilioni 253 mpaka kufikia Sh.Trilioni 1.3, ongezeko hili ni zaidi ya asilimia 300 na hii ni kwa sababu unataka kuona barabara za vijijini zikifunguliwa na wananchi wanasafirisha bidhaa zao kwa urahisi.”

“ Mhe. Rais kupitia ongezeko hili umeweza kujenga barabara za lami maeneo ambao hayakudhaniwa kuwa na lami umepandisha hadhi barabara nyingi za vijijini na mijini na zaidi umeagiza tuongeze mtandao wa barabara za lami yenye urefu wa Kilometa 23 na kwa hapa Songea Manispaa tu barabara ya lami itajengwa yenye urefu wa Kilometa 12.

MKURUGENZI MKUU Aanza Ziara Mikoa ya Nyanda za Juu Kusini

 

Mkurugenzi Mkuu wa NHC Bw. Hamad Abdallah akikagua maduka ya biashara eneo la Mlandege Manispaa ya Iringa na ameupongeza Mkoa wa Shirika Iringa kwa ubunifu walioufanya wa kujenga maduka hayo ya kisasa kwa muda mfupi ambayo sasa yaliingizia shirika mapato zaidi. Maduka hayo tisa kwa sasa yaliingizia Shirika mapato na kuwapa wananchi fursa za kufanya biashara.

Eneo la maduka ya biashara na nyumba za makazi lililopo Gangilonga katika Manispaa ya Iringa limetemebelewa na Mkurugenzi Mkuu wa NHC Bw. Hamad Abdallah ambaye yupo katika ziara ya kutembelea Mikoa ya Shirika la Nyumba la Taifa iliyopo Kanda ya Nyanda za Juu Kusini kukagua miradi na kuhimiza utendaji kazi wenye kuleta tija kubwa.

Meneja wa NHC Mkoa wa Iringa Bi Esther Magese akiwasilisha taarifa ya Mkoa kwa Mkurugenzi Mkuu wa NHC Bw. Hamad Abdallah ambaye yupo Mkoani humo kukagua utendaji wa kazi na kuhimiza utendaji kazi wenye kuleta matokeo chanya.

Eneo la maduka ya biashara na nyumba za makazi lililopo Gangilonga katika Manispaa ya Iringa limetemebelewa na Mkurugenzi Mkuu wa NHC Bw. Hamad Abdallah ambaye yupo katika ziara ya kutembelea Mikoa ya Shirika la Nyumba la Taifa iliyopo Kanda ya Nyanda za Juu Kusini kukagua miradi na kuhimiza utendaji kazi wenye kuleta tija kubwa.

Mkurugenzi Mkuu wa NHC Bw. Hamad Abdallah akikagua jengo la Ubia la Iringa Plaza ambapo amehimiza Shirika kufanya maamuzi ya kuhakikisha jengo hilo la ghorofa nne linaliletea Shirika tija iliyokusudiwa.

Mkurugenzi Mkuu wa NHC Bw. Hamad Abdallah akikagua jengo la Ubia la Iringa Plaza ambapo amehimiza Shirika kufanya maamuzi ya kuhakikisha jengo hilo la ghorofa nne linaliletea Shirika tija iliyokusudiwa.

. Asisitiza wafanyakazi kulinda mafanikio yaliyopatikana

. Ahimiza uadilifu na uzalendo ili kulipatia Shirika tija kubwa

. Aupongeza Mkoa wa Iringa kwa ubunifu

. Aahidi kuendelea kupigania maslahi bora kwa wafanyakazi

Na Mwandishi Wetu, Iringa

MKURUGENZI MKUU wa Shirika la Nyumba la Taifa Bw. Hamad Abdallah ameanza ziara ya kutembelea Mikoa ya NHC iliyopo Nyanda za Juu Kusini kama sehemu ya kukagua shughuli za Shirika, kuongea na wafanyakazi na kuhimiza utendaji wenye kuleta tija.

Akiwasili Mkoa wa Iringa na kukagua miradi mbalimbali iliyotekelezwa na Mkoa huo, Mkurugenzi Mkuu amefurahishwa na kuupongeza Mkoa huo kwa kuwa wabunifu katika kuliongezea Shirika mapato zaidi. 

 

" Nimefurahishwa sana na haya maduka ya biashara mliyobuni na kuyajenga katika viwanja vya Shirika ambavyo vilikaa miaka mingi bila kuliingizia Shirika mapato, hongereni sana na huu ni mfano wa kuigwa na kila Mkoa"

Akizungumza na wafanyakazi wa Mkoa huo, Mkurugenzi Mkuu amewashukuru kwa shukrani walizotoa kwake kutokana na nyongeza inayoridhisha ya mishahara na akaahidi kuendelea kupigania maslahi bora kwa wafanyakazi kama sehemu ya kuwaongezea ari ya kulitumikia Shirika kwa juhudi na maarifa.

"Mimi binafsi nafarijika kuona kiu yangu ya kufanikisha nyongeza ya maslahi ya wafanyakzi kwa kiwango ambacho serikalini huwezi kukipata imetimia, sasa mpira upo kwenu mkizalisha zaidi kwa faida ndani ya miezi sita sitasita kupiga hodi kwa Msajili wa Hazina kuwaombea fedha za likizo kwa utaratibu tuliokuwa nao zamani na kuwaombea kupewa posho ya nyumba"

Akasema kuwa siri pekee ya kuendelea kuongeza maslahi ya wafanyakazi ni kufanya kazi kwa bidii na kupata faida na kwamba safari hii hilo limewezekana baada ya Shirika kupata mapato yaliyofikia asilimia 135, hivyo akahimiza uadilifu na uchapaji kazi wenye tija ili tuendelee kulipana mishahara na maslahi bora kwa siku zijazo. Hivyo, akaupongeza Mkoa hio wa Iringa kwa kukusanya kodi kwa asilimia 105, kubuni miradi ya maduka ya kimkakati ya biashara, kufanya matengenezo ya nyumba na kupunguza kwa asilimia 74 ya madeni ya kodi ya nyumba.

"Huu ni mfano wa kuigwa, angalia sasa mapato ya haya maduka mliyojenga kwa muda mfupi na gharama nafuu za uwekezaji, yanazidi kwa mbali mapato ya jengo la ubia lenye ghorofa tano" 

 

Nawapongeza kwa kuwa wabunifu, mmeweza kuwa na mkakati bora wa kukusanya kodi kama timu moja kwa kuwapigia simu wadaiwa kwa mtindo wa kubadilishana majina ya wakati wa kupigia simu wadaiwa hao jambo linalowafanya waone sasa ni jambo la NHC yote"

"Mmewasiliana na taasisi za Serikali kuwafikia watumishi wao wanaodaiwa na mmekuwa na utaratibu wa vikao vya kila wiki kupanga mikakati ya kuliletea Shirika tija. Nimefurahishwa sana na Uongozi Shirikishi mlio nao. Chapeni kazi nasi Menejimenti tutaendelea kuwaunga mkono.

Akizungumzia uboreshaji wa taswira ya Shirika katika Mkoa huo, Mkurugenzi Mkuu ameahidi kujenga jengo kubwa la kisasa la biashara, Ofisi na makazi ambalo pia litawezesha Shirika Mkoani himo kuhamia katika jengo hilo ili kuwa na Ofisi za kisasa. 

 

Ameutaka Mkoa huo kutolitia tembo maji kwa kubweteka kutokana na mafanikio waliyoyapata, badala yake waendelee kubuni miradi yenye tija na akaahidi kuyafanyia kazi mapendekezo yao yenye lengo la kuongeza tija ya kibiashara ya Mkoa huo.

Wakati huo huo, amewapongeza wafanyakazi hao kwa kurejesha nyumba ya Shirika iliyokuwa inamilikiwa kinyemela bila Shirika kujuwa. Akawataka wafuatilie zaidi maeneo mengine yanayoashiria kuwa na majengo yanayoshabihiana na majengo ya zamani yaliyozoeleka kuwa ni ya NHC.

"Nilipokuwa napita katika mitaa na kukagua majengo yetu nimeona kama kuna majengo yanayofanana na ya NHC, huenda yanamilikiwa kinyemela, fuatilieni mjiridhishe ila msiingilie milki za watu kama hazituhusu, mjiridhishe tu"

Awali akitoa taarifa ya Mkoa huo kwa Mkurugenzi Mkuu, Meneja wa Shirika Mkoa wa Iringa Bi. Esther Magese alisema kuwa azma ya mkoa huo ni kufuta kabisa madeni sugu na kuongeza mapato kwa kuwa na uwekezaji wenye tija, na kwamba ujenzi wa maduka ya biashara walioufanya ni moja ya mikakati yao ya kuongeza mapato hayo.

Hivyo, ameuomba Uongozi wa Shirika kuutazama Mkoa wa Iringa kama moja ya mikoa yenye mahitaji makubwa ya nyumba za kupanga na ofisi kutokana na uwepo wa fursa za utalii na kilimo cha biashara. Akapendekeza Shirika kujenga majengo ya makazi, biashara na ofisi kwa kuwa tayari wana maombi mengi ya watu binafsi na taasisi zinazohitaji nyumba za aina hiyo.

Kwa niaba ya wafanyakazi ameushukuru Uongozi wa Shirika kwa kuwajali wafanyakazi na kuwangozea mishahara. " tumefurahi sana kwa nyongeza hii na tunakushukuru sana kwa uliotutendea, nasi hatutakuangusha katika uchapaji kazi, asante DG"

Katika hali ya kushangaza, wafanyakazi hao baada ya kufundishwa mada ya Huduma kwa Wateja na Meneja Habari na Uhusiano Bw. Muungano Saguya na kuwataka kupiga kura ya siri juu yakuridhika na huduma za NHC kwa wafanyakazi, wafanyakazi hao wengi wao waliridhika kwa asilimia 100 na wengine wachache walianzia asilimia 85 huku wakiomba nyongeza zaidi ya maslahi ikiwemo posho ya nyumba na likizo. 

 

Katika utafiti uliofanywa mwaka jana na Kampuni ya ABECC ya Chuo Kikuu Ardhi ilibainisha kuwa wafanyakazi wanaridhika na huduma za Shirika kwa asilimia 69.5 na utafiti kama huo uliofanywa na Synovate mwaka 2014 ulionyesha kuridhika kwa wafanyakazi kwa asilimia 76.

Mkurugenzi Mkuu leo anaendelea na ziara yake katika Mkoa wa Mbeya na wiki ijayo ataifikia Mikoa ya Ruvuma, Mtwara na Lindi kukagua miradi inayotekelezwa katika Mikoa hiyo na kuzungumza na wafanyakazi.

TEA & TOTALENERGIES MARKETING LTD WAKABIDHI MADWATI 130 WILAYANI

Mkuu wa Wilaya ya Kibiti, Kanali Joseph Kolombo (Kushoto) na Kaimu Mkurugenzi wa Huduma za Taasisi wa TEA, CPA. Mwanahamisi Chambega katika hafla ya kukabidhi madawati katika Shule ya Msingi Jaribuni.

Afisa Elimu Msingi Halmashauri ya Wilaya ya Kibiti, Bi. Zakayo Mtenduka (kushoto) na Kaimu Mkurugenzi wa Huduma za Taasisi wa TEA, CPA. Mwanahamisi Chambega katika hafla ya kukabidhi madawati katika Shule ya Msingi Jaribu Mpakani

Kaimu Mkurugenzi wa Huduma za Taasisi wa TEA, CPA. Mwanahamisi Chambega akitoa salaam katika hafla ya kukabidhi madawati katika shule ya Msingi Jaribuni Mpakani.

Mkuu wa Wilaya ya Kibiti, Kanali Joseph Kolombo katika picha ya pamoja na viongozi waliohudhuria hafla ya kukabidhi madawati katika Shule ya Msingi Jaribuni Mpakani.

Wanafunzi wa Shule ya Msingi Jaribuni Mpakani wakifuatilia hafla ya kukabidhiwa madawati.

Mkurugenzi wa Sheria na Mahusiano wa Total Energies Marketing Tanzania Ltd Bi. Getrude Mpangile (kushoto) na Kaimu Mkurugenzi wa Huduma za Taasisi wa TEA CPA. Mwanahamisi Chambega katika hafla ya kukabidhi madawati katika Shule ya Msingi Jaribuni Mpakani.

Mkuu wa Wilaya ya Kibiti, Kanali Joseph Kolombo akizungumza katika hafla ya kukabidhi madawati katika Shule ya Msingi Jaribuni Mpakani.

Kampuni ya TotalEnergies Marketing Ltd kwa kushirikiana na Mamlaka ya Elimu Tanzania (TEA) wamekabidhi madawati 130 katika shule ya Msingi Jaribuni Mpakani na Shule ya Msingi ya Kitundu za Wilayani Kibiti Mkoani Pwani ikiwa ni sehemu ya utekelezaji wa ushirikiano baina yao katika kuboresha miundombinu ya elimu nchini.

Hafla ya kukabidhi madawati hayo iliongozwa na Mkuu wa Wilaya ya Kibiti Kanali Joseph Kolombo katika Shule ya Msingi Jaribuni Mpakani tarehe 24 Septemba 2024.

Akizungumza katika hafla hiyo Kanali Kolombo ameahidi kuwa madawati hayo yatatunzwa vizuri kwa manufaa ya wanafunzi wa shule hiyo na kuongeza kuwa Wilaya ya Kibiti imekuwa ikinufaika na miradi kadhaa ya TEA ukiwemo wa ujenzi wa vyumba viwili vya madarasa kwa ajili ya wanafunzi wenye mahitaji maalum katika Shule ya Msingi Kitundu.

Kwa upande wake Mkurugenzi wa Sheria na Mahusiano wa TotalEnergies Marketing Tanzania Ltd Bi. Getrude Mpangile amesema madawati hayo 130 ni sehemu ya madawati 200 yenye thamani ya Sh. Milioni 25.9 yaliyotolewa na kampuni hiyo kwa shule tatu za Mkoa wa Pwani na Dar es Salaam.

Kufuatia msaada huyo Shule ya Msingi Jaribuni Mpakani imepata madawati 65, Shule ya Msingi Kitundu madawati 65 na Shule ya Msingi Makuburi ya Jijini Dar es Salaam imepata madawati 70.

Bi. Ambangile ameeleza matumaini yake kwamba msaada huo utasaidia kuweka hamasa kwa wanafunzi kujifunza kwa bidii na hivyo kuchangia kukuza ufanisi na ufaulu wa shule zilizonufaika na madawati hayo.

Kaimu Mkurugenzi wa Huduma za Taasisi wa TEA, CPA Mwanahamisi Chambega amekumbusha shule zilizonufaika na msaada huo wa madawati kuyatunza vyema.

“Miongoni mwa majukumu ya TEA ni kutafuta raslimali fedha kutoka kwa wadau mbali mbali na kuzigawa katika taasisi za elimu ili kuboresha mazingira ya kujifunzia na kufundishia hivyo tunawakumbusha kutunza vifaa hivo”. Amesema CPA Chambega.

BENKI YA ACB WANAKUAMBIA “TUPO MTAANI KWAKO”

Tumezindua rasmi program yetu ya TUPO MTAANI KWAKO kupitia timu yetu bobezi ya mauzo. Sasa tunakufikia popote ulipo kupitia timu yetu ya mauzo kupata huduma zetu za kufungua akaunti , elimu ya mikopo pamoja na jinsi ya kutumia huduma zetu za kidijitali za VISA card, ACB Mobile, Akiba Wakala na Internet Banking. Program hiyo inaenda sambamba na kampeni ya Road show ya kutoa utambulisho kwa timu ya “Tupo Mtaani kwako” katika vitongoji na mitaa mbali mbali ya jiji la DSM Tupo Mtaani kwako, tukileta huduma kwa urahisi zaidi!

Kaimu Afisa Mkuu wa Kitengo Biashara Bw: Danford Muyango akizindua rasmi kampeni ya “Tupo Mtaani Kwako” katika tawi la Kijitonyama, Letsya Tower

Baadhi ya Wafanyakazi wa ACB walioshirika katika uzinduzi wa program ya “Tupo Mtaani Kwako”

DKT. NCHEMBA AMWAKILISHA RAIS SAMIA MKUTANO WA AFRIKA50 MADAGASCAR

Waziri wa Fedha. Mhe Dkt. Mwigulu Lamewck Nchemba Madelu (Mb), akihutubia, kwa niaba ya Mhe. Rais, Dkt. Samia Suluhu Hassan, Rais wa Jamhuri ya Muungano wa Tanzania, katika Mkutano wa Mwaka wa Wanahisa wa Taasisi ya Africa50 na Jukwaa la Miundombinu la Afrika Taasisi ambayo Tanzania ni mwanachama, katika Kituo cha Mikutano cha Kimataifa cha Ivato, mjini Antananarivo nchini Madagascar. Mkutano ulioangazia masuala ya ujenzi na ufadhili wa miundombinu pamoja na matumizi ya nishati safi ya kupikia.

Waziri wa Fedha. Mhe Dkt. Mwigulu Lamewck Nchemba Madelu (Mb), Akiimba Wimbo wa taifa la Madagascar, alipomwakilisha Mhe. Rais, Dkt. Samia Suluhu Hassan, Rais wa Jamhuri ya Muungano wa Tanzania katika Mkutano wa Mwaka wa Wanahisa wa Taasisi ya Africa50 na Jukwaa la Miundombinu la Afrika Taasisi ambayo Tanzania ni mwanachama, katika Kituo cha Mikutano cha Kimataifa cha Ivato, mjini Antananarivo nchini Madagascar. Mkutano ulioangazia masuala ya ujenzi na ufadhili wa miundombinu pamoja na matumizi ya nishati safi ya kupikia.

 Waziri wa Fedha. Mhe Dkt. Mwigulu Lamewck Nchemba Madelu (Mb) (kushoto) akiwa na Rais wa Madagascar, Mhe. Andry Rojaelina (katikati) na Mwenyekiti wa Bodi ya Wakurugenzi ya Taasisi ya Africa50, ambaye pia ni Rais wa Benki ya Maendeleo ya Africa (AfDB), Dkt. Akwinumi Adesina baada ya Rais huyo kufungua rasmi  Mkutano wa Mwaka wa Wanahisa wa Taasisi ya Africa50 na Jukwaa la Miundombinu la Afrika Taasisi ambayo Tanzania ni mwanachama, katika Kituo cha Mikutano cha Kimataifa cha Ivato, mjini Antananarivo nchini Madagascar. Mkutano ulioangazia masuala ya ujenzi na ufadhili wa miundombinu pamoja na matumizi ya nishati safi ya kupikia. Mhe. Dkt. Nchemba, alipomwakilisha Mhe. Rais, Dkt. Samia Suluhu Hassan, Rais wa Jamhuri ya Muungano wa Tanzania katika Mkutano huo (Picha na Kitengo cha Mawasiliano Serikalini, Wizara ya Fedha, Antananarivo, Madagascar

Waziri wa Utamaduni, Sanaa na Michezo Mhe. Dkt. Damas Ndumbaro amewasili Songea

 

Waziri wa Utamaduni, Sanaa na Michezo Mhe. Dkt. Damas Ndumbaro tayari amewasili katika Ukumbi wa Chandamali Songea kwa ajili ya Mdahalo wa Kitaifa wa Maadili leo Septemba 14, 2024, ikiwa ni kuelekea Tamasha la tatu la Utamaduni la Kitaifa kuanzia Septemba 20 hadi 23, 2024 Uwanja wa Majimaji Songea.

Mhe. Waziri akiwa ameambatana na baadhi ya Viongozi wa Mkoa wa Ruvuma amepokelewa na  baadhi Viongozi wa Wizara na Taasisi zake.

Mdahalo huo utahusisha mada mbalimbali  zitakazojadiliwa, makundi ya wazee, vijana pamoja na wanachuo.

USHIRIKA WATAKIWA KUSAIDIA KUINUA UCHUMI WA WAKULIMA

 

Naibu Katibu Mkuu wa Wizara ya Kilimo anayeshughulikia Ushirika na Umwagiliaji, Dkt. Suleiman Serera, ameeleza kuwa, Serikali inaitaji kuona Ushirika wa kisasa ambao unafuata mifumo ya kidigiti na kuzingatia taratibu na miongozo ya uendeshaji Ili kuwainua Wakulima.

Ameeleza kuwa, kukiwa na Ushirika wa kisasa wakulima watapata huduma kwa haraka mahala walipo ikiwa ni pamoja na kupokea malipo yao kwa wakati kutokana na uwepo wa taarifa za wakulima kwenye mifumo.

Ameeleza hayo tarehe 12/09/2024 wakati wa ziara ya kikazi katika Mkoa wa Mtwara alipotembelea Kiwanda cha Kubangua Korosho cha TANECU kilichopo kijiji cha Mmovo, Wilayani Newala.

Vilevile amesema Serikali haitovumilia chama cha Ushirika kinachowanyonya wakulima kwani Ushirika umewekwa ili uwe daraja la kuwasaidia na kuwanyanyua wakulima ili kukuza uchumi wao.

“Hatujaweka Ushirika ili kuwanufaisha baadhi ya watu, endapo kiongozi yeyote umeingia kwenye Ushirika ili ujinufaishe mwenyewe achia ngazi mapema maana tukikubaini hautakuwa na mwisho mzuri kabisa,” Dkt. Serera amesisitiza.

Aidha, ametoa rai kwa wanachama wa Vyama vya Ushirika kuacha kuchagua viongozi ambao hawawezi kuleta tija katika Ushirika na kuhakikisha viongozi wanaowachagua wanauwezo wa kuendesha Vyama vyao na kuviletea Maendeleo.

Kwa Upande wake Mrajis na Mtendaji Mkuu wa Tume ya Maendeleo ya Ushirika, Dkt. Benson Ndiege, ameeleza kuwa Vyama vinaenda kumaliza tatizo la ucheleweshaji wa malipo kwa mkulima atakayeuza mazao yake kupitia Vyama atapata malipo yake kwa wakati.

CCM YATOA TAMKO KUUAWA KWA ALI KIBAO WA CHADEMA

 

Chama Cha Mapinduzi (CCM) kimesikitishwa sana na tukio la mauaji lililomhusisha Mjumbe wa Baraza Kuu la Chama cha Demokrasia na Maendeleo (CHADEMA), Ali Kibao. CCM kinaungana na Rais Dk. Samia Suluhu Hassan katika wito wa kuhakikisha uchunguzi wa kina unafanyika haraka ili kubaini waliohusika na kuchukua hatua stahiki dhidi yao kwa mujibu wa sheria.

Chama kimeongeza kuwa kinataka kuona wahusika wa mauaji haya wanapatikana kwa gharama yoyote, na iwapo Serikali itaona kuna ulazima wa kuwa na wachunguzi kutoka nje ya nchi, CCM kitakuwa tayari kuunga mkono mpango huo. Lengo lao kuu ni kuhakikisha wahusika wanakabiliwa na sheria bila kuchelewa.

Akizungumza na waandishi wa habari jijini Dar es Salaam tarehe 13 Septemba 2023, Katibu Mkuu wa CCM, Dk. Emmanuel Nchimbi, alisisitiza kuwa chama chake kinalaani vikali tukio hili la mauaji na kutaka uchunguzi wa haraka na wa kina ili kuhakikisha haki inatendeka. Dk. Nchimbi alisema:

“Tumeona tukio hili na tumekubaliana kuwa linahitaji kuchunguzwa kwa umakini mkubwa. Tunataka kuhakikisha kuwa wahusika wanapatikana na hatua stahiki zinachukuliwa. Tunataka kuona sheria ikichukua mkondo wake bila kuchelewa.”

Dk. Nchimbi alieleza kuwa CCM inapinga vikali juhudi zozote zinazolenga kufarakanisha wananchi na Jeshi la Polisi. Alisisitiza kwamba chama hicho kinaunga mkono juhudi zote za kuwezesha Jeshi la Polisi kufanya kazi zake kwa ufanisi. Aliongeza kuwa kati ya mwaka 2017 na 2023, polisi wengi wameuawa na kujeruhiwa katika matukio ya uhalifu, na hivyo ni muhimu kuwaunga mkono polisi katika majukumu yao.

Kuhusu Watuhumiwa na Uchunguzi

CCM inataka kuhakikisha kuwa wahusika wa mauaji ya Ali Kibao wanapatikana kwa gharama yoyote, na inatarajia kwamba Serikali itachukua hatua za haraka katika kuchunguza tukio hili. Viongozi wa CHADEMA wamepewa wito kuhakikisha kuwa wanaunga mkono juhudi za uchunguzi na kuhakikisha kuwa haki inatendeka kwa wahanga na familia zao.

“Tunataka kuona kwamba wahusika wanakabiliwa na sheria, na kama kuna ulazima wa kuwa na wachunguzi kutoka nje, tutawaunga mkono,” alifafanua Dk. Nchimbi.

Kuhusu Mazungumzo na Mshikamano

Dk. Nchimbi alisisitiza kuwa CCM inatambua umuhimu wa mazungumzo na mshikamano miongoni mwa vyama vya siasa na wananchi kwa jumla. Alikosoa matukio yanayojaribu kuharibu sifa ya jeshi la polisi na kuwataka viongozi wote kushirikiana kwa pamoja katika kuhakikisha kwamba demokrasia inaimarishwa na nchi inajengwa kwa umoja.

“Tunataka kuona maendeleo ya demokrasia yanendelea na kuwa na mazungumzo ya kina ili kuhakikisha kwamba nchi yetu inabaki kuwa na umoja na mshikamano. Rais Samia Suluhu Hassan anafanya kazi nzuri ya kuimarisha umoja, na tunahitaji kuwa pamoja katika kuhakikisha kuwa nchi yetu inasonga mbele kwa usalama na amani,” alisema Dk. Nchimbi.

DK.BITEKO:NISHATI SAFI YA KUPIKIA NI AJENDA YA KUOKOA MAISHA YA WATU

NAIBU Waziri Mkuu na Waziri wa Nishati, Dk. Doto Biteko,akizungumza wakati wa uiznduzi wa  jengo la Wakala wa Nishati Vijijini (REA) lililoenda sambamba  na utiaji saini wa mikataba sita ya utekelezaji wa mkakati wa kitaifa wa matumizi ya nishati safi za kupikia,hafla iliyofanyika leo Septemba 13,2024 jijini Dodoma.

Naibu Waziri Mkuu na Waziri wa Nishati, Mhe. Dkt. Doto Biteko (kulia) akifunua kitambaa kuashiria uzinduzi jengo la Wakala wa Nishati Vijijini (REA)lililopo jijini Dodoma. Kushoto ni Mwenyekiti wa Bodi ya REA, Meja Jenerali Mstaafu Jacob Kingu. Wa pili kushoto ni Katibu Mkuu wa Wizara ya Nishati, Mhandisi Felchesmi Mramba

Naibu Waziri Mkuu na Waziri wa Nishati, Mhe. Dkt. Doto Biteko akishuhudia Mkurugenzi Mkuu wa Wakala wa Nishati Vijijini (REA) Mhandisi Hassan Saidy, na Kamishna Jenerali wa Jeshi la Magereza  (CPG) Jeremia  katungu  wakionesha mkataba wa ushirikiano wa  utekelezaji wa Nishati Safi ya Kupikia mara baada kuusaini.

SEHEMU ya washiriki wakimsikiliza Naibu  Waziri Mkuu na Waziri wa Nishati, Dk. Doto Biteko (hayupo pichani) ,akizungumza wakati wa uiznduzi wa  jengo la Wakala wa Nishati Vijijini (REA) lililoenda sambamba  na utiaji saini wa mikataba sita ya utekelezaji wa mkakati wa kitaifa wa matumizi ya nishati safi za kupikia,hafla iliyofanyika leo Septemba 13,2024 jijini Dodoma.

NAIBU Waziri Mkuu na Waziri wa Nishati, Dk. Doto Biteko,akishuhudia utiaji saini wa mikataba sita ya utekelezaji wa mkakati wa kitaifa wa matumizi ya nishati safi ya kupikia kati ya REA na Jeshi la Magereza na Jeshi la kujenga Taifa (JKT),hafla iliyofanyika leo Septemba 13,2024 jijini Dodoma.

NAIBU  Waziri Mkuu na Waziri wa Nishati, Mhe.Dkt. Doto Biteko amesema Serikali inafanya kila jitihada kuhakikisha kunakuwa na unafuu katika upatikanaji wa bidhaa za nishati safi ya kupikia ikiwemo mitungi ya gesi  ili kumwezesha kila mwananchi  kutumia nishati iliyo safi na salama.

Katika kutekeleza jitihada hizo, Serikali  imetoa ruzuku kwa mitungi ya gesi zaidi ya 400,000 itakayouzwa kwa nusu gharama ya awali ambayo inasambazwa katika mikoa yote Tanzania Bara huku zoezi hilo likiwa ni endelevu.

Dkt. Biteko amesema hayo tarehe 13 Septemba 2024 jijini Dodoma wakati wa hafla ya Kusainiwa mikataba ya ushirikiano ya utekelezaji wa Nishati Safi ya Kupikia yenye thamani ya shilingi bilioni 50.98 kati ya Wakala wa Nishati Vijijini (REA) na taasisi sita ambazo ni Jeshi la Kujenga Taifa (JKT) Jeshi la Magereza (TPS) na Wasambazaji wa Gesi ya kupikia, hafla ambayo ilienda sambamba na uzinduzi wa jengo la REA.

“Namshukuru Rais, Dkt. Samia Suluhu Hassan kwa maono yake yanayowezesha Sekta ya Nishati kuendeshwa kwa mafanikio ambayo yamepelekea leo hii tushuhudie hatua ikizidi kupigwa katika kutekeleza Mkakati wa Taifa wa Matumizi ya Nishati Safi ya Kupikia unaolenga kuokoa maisha ya watanzania na pia kuiwezesha Wizara ya Nishati kutatua changamoto zinazojitokeza lengo likiwa ni kutoa huduma iliyo bora kwa wananchi.” Amesema Dkt. Biteko

Kuhusu mikataba hiyo ya Nishati Safi ya Kupikia, Dkt.Biteko ameiagiza REA na wadau kuhakikisha kuwa matokeo yanaonekana tena kwa uharaka akieleza kuwa “itakuwa aibu sana watanzania wanaona mikataba imesainiwa huku kukiwa hakuna matokeo, tusione kawaida kwa ndugu zetu kupoteza maisha kwa kutumia nishati isiyo safi, tuwaokoe kupitia miradi hii na tutumie kila fursa inayojitokeza.”

Amesisitiza kuwa, ajenda ya Nishati Safi ya Kupikia ni ya wote na inalenga kuokoa maisha ya watanzania hivyo hivyo iwe ni kipaumbele cha watu wote.

Kuhusu usambazaji wa nishati vijijini ikiwemo umeme, ameipongeza Bodi ya REA kwa kusimamia ipasavyo miradi hiyo vijijini na kwa kuwahimiza wakandarasi kukamilisha kazi kwa wakati.

Akizungumzia jengo la REA alilolizindua, Dkt.Biteko amesema litawawezesha watumishi kutoa huduma kwa wananchi na kuwapongeza REA kwa kujenga jengo hilo la kisasa lenye ghorofa tano kwa gharama ya shilingi bilioni 9.8 kwa miezi 18 badala ya  shilingi bilioni 13 zilizopangwa awali.

Pamoja na kuipongeza REA kwa ujenzi wa jengo hilo la kisasa amewakumbusha kuwa, uwepo wa jengo wa jengo hilo lazima uende sambamba na utoaji wa huduma bora kwa wananchi.

“ Mimi naamini Jengo hili kweli ni muhimu lakini muhimu zaidi ni huduma kutoka kwenu kwenda kwa wananchi, kama tunasema kwamba tuna jengo zuri la ghorofa tano, halafu tukatoa huduma mbaya, jengo hili halitakuwa na maana yoyote hivyo uzuri wake uonekane kwenye huduma kuanzia sehemu ya mapokezi na wananchi watoke katika jengo hili wakiwa na furaha.” Amesisitiza Dkt. Biteko

Katika hatua nyingine, Dkt. Biteko ameagiza Watendaji wa Wizara ya Nishati kuhakikisha kuwa majengo ya Wizara ya Nishati na Taasisi zake yanafungwa mfumo wa umeme jua ikiwa ni kuonesha kwa vitendo matumizi ya nishati safi yenye gharama nafuu.

kwa upande wake, Naibu Waziri wa Mambo ya Ndani ya Nchi, Mhe.Daniel  Sillo amesema tukio hilo ni alama ya ushirikiano kati ya REA na Taasisi za Jeshi ambapo amemshukuru Rais Dkt.Samia Suluhu Hassan kwa jitihada zake za dhati katika kukabiliana na mabadiliko ya tabia nchi, udhibiti wa rasilimali za misitu na kutengeneza fursa za ajira kupitia Nishati Safi ya Kupikia.

Amesema kusainiwa kwa mikataba hiyo ni utekelezaji wa maelekezo ya Rais, Dkt. Samia na  utekelezaji wa Mkakati wa Taifa wa Matumizi ya Nishati Safi ya Kupikia (2024-2034) kuwa taasisi zinazolisha watu zaidi ya 100 ziache matumizi ya kuni na mkaa na kuanza  kutumia vyanzo vya Nishati safi ya Kupikia ikwemo gesi asilia, umeme, bayogesi na makaa ya mawe yaliyoboreshwa.

Amesema kwa sasa nishati inayotumika kupikia chakula cha Wafungwa na Mahabusu  ni kuni kwa asilimia  98 ambapo Jeshi hilo lilianza kutekeleza Mkakati wa Nishati Safi ya Kupikia kwa kuanza kutumia nishati safi kupitia  gesi asilia na mkaa mbadala hivyo  kusainiwa kwa mkataba huo kutawezesha Jeshi la Magereza kutumia nishati safi ya kupikia kwenye magereza yake.

Amesema kuwa Wizara ya Mambo ya Ndani itahakikisha fedha zilizotengwa pamoja vifaa kwenye programu hiyo zinasimamiwa ipasavyo ili lengo tarajiwa lifikiwe na hii ikienda sambamba na utoaji wa mafunzo  kwa watumishi wa Jeshi ili waweze kuisimamia na kutunza miundombinu itakayofungwa.

Mkuu wa Mkoa wa Dodoma, Rosemary Senyamule ametoa pongezi kwa REA kwa kukamilisha jengo kubwa la kisasa ambalo linaifaharisha Dodoma  na pia amemshukuru Rais, Dkt. Samia Suluhu Hassan  kwa kutoa sh.bilioni 214 kwa ajili ya shughuli za umeme mijini na vijijini ambapo mkoani Dodoma asilimia 92.2 ya vijiji  vimefikiwa na umeme huku kazi hiyo usambazaji umeme ikiendelea.

Pia amempongeza Rais, kwa miradi ya Nishati Safi ya Kupikia kupitia uhamasishaji wa nishati hiyo na kueleza kuwa kasi ya kutumia nishati safi kwa wananchi inaongezeka.

Kwa upande wake, Katibu Mkuu wa Wizara ya Nishati, Mhandisi Felchesmi Mramba amesema kusainiwa kwa mikataba hiyo ni utekelezaji wa agizo la Rais, Dkt. Samia Suluhu Hassan alilolitoa wakati akizindua  mjadala wa kitaifa wa Nishati Safi ya kupikia na kutilia mkazo wakati akizindua Mkakati wa Taifa wa Matumizi ya Nishati Safi ya Kupikia na kwamba Wizara ya Nishati ina wajibu wa kutekeleza agizo hilo na ndio maana taasisi yake ya REA  imesaini mikataba husika

Amesema Mikataba iliyosainiwa inahusisha masuala mbalimbali ikiwemo kufunga mifumo ya nishati safi  ya kupikia pamoja na usambazaji wa majiko na mitungi ya gesi  ipatayo laki nne ambayo inatolewa kwa bei ya ruzuku kwa wananchi hasa maeneo ya vijijini.

Awali, Mkurugenzi Mkuu wa Wakala wa Nishati Vijijini (REA), Mhandisi Hassan Saidy alisema kuwa, Wakala huo kuhamia kwenye jengo lake kumewezesha kuokoa shilingi milioni 650 zilizokuwa zikitumika kwa mwaka kulipia kodi ya pango ambazo sasa zinaelekezwa kwenye maendeleo ya huduma zinazotolewa.

Kuhusu mikataba ya Nishati Safi ya Kupikia alisema kwa upande wa Jeshi la Magereza,  mikataba iliyosainiwa ina thamani ya shilingi bilioni 35.23 ambapo kati ya fedha hizo 75.5% ambayo ni sawa na shilingi bilioni 26.57 zitatolewa na REA na 24.6% sawa na shilingi bilioni 8.66 zitatolewa na Jeshi hilo kwa mradi utakaotekelezwa kwa muda wa miaka mitatu katika Magereza 129 ya Tanzania Bara.

Mkataba wa Magereza unahusisha masuala mbalimbali ikiwemo ujenzi wa mifumo ya bayogesi (gesi vunde) 126, usimikaji wa mifumo 64 ya gesi ya LPG, usimikaji wa mfumo wa gesi asilia, usambazaji wa mitungi ya gesi (LPG) ya kilo 15 ikiwa na jiko la sahani mbili ipatayo 15,920 kwa watumishi wa Magereza na usambazaji wa tani 865 za mkaa mbadala unaotokana na makaa ya mawe kutoka STAMICO.

Mhandisi saidy alisema kwa upande wa Jeshi la Kujenga Taifa (JKT) mikataba iliyosainiwa ina thamani ya shilingi bilioni 5.75 ambapo kati ya fedha hizo asilimia 76 ambayo ni sawa na shilingi bilioni 4.37 itatolewa na REA na huku asilimia 24 sawa na shilingi bilioni 1.39 itatolewa na JKT.

Amesema  fedha hizo zitatumika kutekeleza miradi katika Kambi 22 za JKT kwa muda wa miaka miwili itakayohusisha ujenzi wa mitambo 9 ya bayogesi, majiko 291 ya kutumia mkaa mbadala (makaa ya mawe na tungamotaka), ujenzi wa mifumo 180 ya kupikia inayotumia LPG na sufuria zake, ununuzi wa tani 110 za mkaa unaotokana na makaa ya mawe, ununuzi wa mashine 60 za kutengeneza mkaa mbadala na mafunzo kwa vijana wapatao 50,000.

Wadau wengine waliosaini mikataba ya Nishati Safi ya Kupikia ni kampuni zinazofanya biashara ya gesi ya mitungi ikiwemo Taifa Gas, Manjis, Oryx pamoja na Lake Oil ambapo wanasambaza mitungi ya gesi ya kupikia ipatayo 452,445  kwa bei ya ruzuku katika mikoa yote ya Tanzania Bara.

BoT, AZAKI WAJADILI KUBORESHA HUDUMA JUMUISHI ZA FEDHA KWA JAMII

 Katibu Mtendaji wa Baraza la Ushauri la Watumiaji wa Huduma za Mawasiliano (TCRA - CCC) Mary Msuya, (kulia), akizungumza namna taasisi yao inavyotekeleza majukumu yake kwa mujibu wa sheria.

PICHA NA; FCS Na; Hughes Dugilo, ARUSHA

Benki Kuu ya Tanzania (BoT) imesema itaendelea kufanya jitihada mbalimbali za kusaidia ukuaji wa huduma za malipo kidigitali kwa kuweka miundombinu rafiki ili kuhakikisha inamlinda mwananchi katika shughuli za uchumi ikiwemo kuwa na unafuu wa kutuma miamala ya fedha.

Akizungumza Jijini Arusha katika mdahalo wa kujadili Biashara Jumuishi kati ya Sekta Binafsi na Asasi za Kiraia, Mchambzi Mwandamizi wa Masuala ya Fedha, Idara ya Huduma Jumuishi za Fedha, Benki Kuu ya Tanzania (BoT), Dastan Massawe, amesema kuwa Benki hiyo inatambua umuhimu wa huduma za fedha kama chachu ya ukuaji wa biashara na uchumi nchini.

Massawe amesema BoT inaendelea na jitihada za kuwezesha biashara ya ndani na nje ya nchi pamoja na kuangalia usalama wa fedha ili kuondokana na changamoto zinazojitokeza ikiwemo uwepo wa matapeli mtandaoni.

Amesema kuna sera wezeshi ambazo haziingiliani na sera nyingine zenye ubunifu katika mifumo inayoimarisha usalama wa miamala baina ya wafanyabiashara mbalimbali.

“Wafanyabiashara wengi bado hawajafikiwa na huduma rasmi za kifedha, asilimia kubwa wanafanya biashara nje ya mifumo, hivyo kuwakosesha fursa ya kupata mitaji” Amesema Massawe.

Kwa upande wake Mkuu wa Programu kutoka Shirika la Foundation For Civil Society (FCS) Nasim Losai, amesema kuwa Shirika hilo linatekeleza mradi wa miaka mitatu wenye lengo la kuyawezesha makundi matatu ambayo ni wanawake, vijana na watu wenye ulemavu ili kuwajengea uelewa mpana wa kuzitambua haki zao za msingi za masuala ya biashara na fedha.

"Kuna fursa na faida nyingi ambazo watu wanazipata lakini sio makundi yote ambayo wanaweza kupata, ndiomaana FCS tumekuja na mradi huu ili kuyafika makundi yote” Amesema Lasai. 

Akizungumza katika mdahalo huo, Katibu Mtendaji wa Baraza la Ushauri la Watumiaji wa Huduma za Mawasiliano (TCRA - CCC) Mary Msuya, amesema kuwa matumizi ya teknolojia yamerahisisha huduma jumuishi za fedha kupitia miamala ya simu tofauti na ilivyokuwa awali.

Msuya amesema kuwa kwa mujibu wa takwimu zilizotolewa na Mamlaka ya Mawasiliano Tanzania (TCRA), Juni 2024 zinaonesha kuna laini za simu milioni 76.6 zinazotumika, ambapo akaunti za fedha kwa njia ya ni simu milioni 55.7, huku watumiaji wa huduma ya internet wakiwa milioni 39.3.

Amesisitiza kuzingatia umuhimu wa kutoa na kulinda taarifa binafsi kwa watoa huduma za fedha wakati wa kujisajili, kwani baadhi yao wamekuwa sio waaminifu katika utekelezaji wa zoezi hilo.

Naye mwakilishi wa Wizara ya Viwanda na Biashara, Perodius Makubi, amesema licha ya faida zinazopatikana katika biashara za mtandaoni kuna madhara ambayo yanajitokeza ikiwemo baadhi wa watu kwenda kinyume na malengo yaliyokusudiwa na kuleta usumbufu kwa wengine.

Mkuu wa Programu kutoka Shirika la Foundation For Civil Society (FCS) Nasim Losai,akizungumza alipokuwa akitoa maelezo ya awali kuhusu mdahalo huo.

Mchambzi Mwandamizi wa Masuala ya Fedha, Idara ya Huduma Jumuishi za Fedha, Benki Kuu ya Tanzania (BoT), Dastan Massawe, Akizungumza katika mdahalo wa kujadili Biashara Jumuishi kati ya Sekta Binafsi na Asasi za Kiraia uliofanyika leo Septemba 12, 2024 Jijini Arusha.